Hoofstuk 28

Waarom hou meisies nie van my nie?

Nou beïndruk ek haar regtig. Ek het haar alles omtrent myself vertel—wat ek besit, waar ek al oral was, wie ek ken. Sy kan seker nie wag om met my uit te gaan nie!

Ek wens ek kon hier wegkom! Kan hy nie sien ek stel nie belang nie? Hoe kan ek hierdie gesprek beëindig sonder om onbeskof te wees?

JY IS oud genoeg om met ’n meisie uit te gaan. Jy wil graag ’n aantreklike meisie vind wat aan dieselfde geloof as jy behoort (1 Korintiërs 7:39). Maar elke keer dat jy in die verlede ’n verhouding met iemand probeer aanknoop het, was dit ’n totale mislukking. Wat het skeefgeloop? Stel meisies net in aantreklike seuns belang? “Ek sal nie omgee as hy ’n bietjie gespierd is nie”, erken ’n meisie met die naam Lisa. Maar die meeste meisies wil meer as dit hê. “Die aantreklike seuns het nie altyd die eienskappe wat vir my belangrik is nie”, sê die 18-jarige Carrie.

Watter eienskappe is belangrik? Watter faktore moet jy in ag neem as jy ’n meisie beter wil leer ken? En watter Bybelbeginsels moet jy in gedagte hou?

Wat om eerste te doen

Voordat jy besluit om ’n sekere meisie te vra om met jou uit te gaan, is daar ’n paar basiese vaardighede wat jy moet aanleer, wat jou sal help om met enigiemand vriende te wees. Kyk na die volgende.

● Kweek goeie maniere aan. Die Bybel sê: “Die liefde is nie ongemanierd nie” (1 Korintiërs 13:5, Today’s English Version). Goeie maniere toon dat jy ander respekteer en dat jy ’n volwasse, Christelike persoonlikheid ontwikkel. Maar goeie maniere is nie soos ’n pak klere wat jy dra om ander te beïndruk en wat jy dan uittrek wanneer jy by die huis kom nie. Vra jou af: ‘Toon ek goeie maniere teenoor my gesinslede?’ As jy dit nie doen nie, sal dit onnatuurlik lyk wanneer jy goeie maniere teenoor ander buite die gesin toon. Onthou, ’n verstandige meisie sal kyk hoe jy jou gesinslede behandel om uit te vind watter soort persoon jy werklik is.—Efesiërs 6:1, 2.

Wat meisies sê: “Dis vir my regtig aantreklik as ’n ou goeie maniere toon in klein dingetjies, soos om die deur vir my oop te maak, sowel as in groter dinge, soos om vriendelik en bedagsaam te wees, nie net teenoor my nie, maar ook teenoor my gesin.”—Tina.

“Dit sit my af as ek iemand pas ontmoet het en hy my vrae vra wat te persoonlik is, soos: ‘Gaan jy met iemand uit?’ en ‘Wat is jou doelwitte?’ Dis ongeskik en laat my baie ongemaklik voel!”—Kathy.

“Dis vir my disrespekvol wanneer seuns dink dat hulle met ons emosies kan speel, asof ons gevoelens nie saak maak nie en asof ons almal so desperaat is om ’n man te kry dat ons wil hê dat hulle tot ons redding moet kom.”—Alexis.

● Handhaaf goeie persoonlike higiëne. Goeie higiëne toon dat jy nie net vir ander respek het nie, maar ook vir jouself (Matteus 7:12). As jy jouself respekteer, is die kanse groter dat ander jou sal respekteer. Maar as jy jou higiëne verwaarloos, sal jy jou pogings om ’n meisie te beïndruk, in die wiele ry.

Wat meisies sê: “’n Ou wat in my belanggestel het, se asem het regtig gestink. Dit was vir my net te erg.”—Kelly.

● Verbeter jou kommunikasievermoë. Die grondslag van ’n blywende verhouding is goeie kommunikasie. Jy gesels nie net oor die dinge waarin jy belangstel nie, maar ook oor die dinge waarin jou vriendin belangstel (Filippense 2:3, 4). Jy luister werklik na wat sy sê, en haar mening is vir jou belangrik.

Wat meisies sê: “Dit beïndruk my wanneer ’n ou heel natuurlik met my kan gesels—wanneer hy kan onthou wat ek vir hom vertel het en hy vrae kan vra wat die gesprek aan die gang hou.”—Christine.

“Ek dink dat ouens aangetrek word deur wat hulle sien, maar dat meisies eerder aangetrek word deur wat hulle hoor.”—Laura.

“Geskenke is wonderlik. Maar as ’n ou lekker kan gesels, as hy jou met sy woorde kan opbeur en aanmoedig . . . Sjoe! Dís aantreklik.”—Amy.

“Ek ken ’n jong man wat goed gemanierd is en nooit voor op die wa is nie. Ons kan betekenisvolle gesprekke hê sonder dat hy dinge hoef te sê soos: ‘Jy ruik regtig lekker’ of ‘Jy lyk vandag baie oulik’. Hy luister werklik na wat ek sê, en dit laat enige meisie goed voel.”—Beth.

“Ek sal iemand beslis beter wil leer ken as hy ’n sin vir humor het, maar ook oor ernstiger dinge kan praat sonder dat dit klink asof hy aansit.”—Kelly.

● Wees verantwoordelik. Die Bybel sê: “Elkeen van ons moet sy eie vrag dra” (Galasiërs 6:5, Contemporary English Version). Meisies sal nie aangetrokke voel tot ’n jong man wat nie ’n werk kan behou omdat hy lui is of omdat hy te veel wil speel nie.

Wat meisies sê: “Ek wens party ouens wil verantwoordeliker wees, want anders sit dit ’n mens baie af. En dit skep nie ’n goeie indruk nie.”—Carrie.

“Party ouens het nie besliste doelwitte nie. As hulle in ’n meisie belangstel, vra hulle wat haar doelwitte is en dan sê hulle: ‘Dis ook wat ek wil doen!’ Maar hulle optrede bewys die teenoorgestelde.”—Beth.

Soos die kommentare hierbo toon, sal jy goeie vriendskappe kan geniet as jy verantwoordelik is. Maar wat moet jy doen as jy voel dat jy gereed is om ’n ernstige verhouding met ’n spesifieke meisie te begin?

Die volgende stap

● Neem die inisiatief. As jy dink dat ’n vriendin wat jy bewonder, dalk ’n goeie huweliksmaat sal wees, moet jy vir haar sê dat jy in haar belangstel. Wees reguit en sê openlik vir haar hoe jy voel. Ja, jy sal dalk baie senuweeagtig wees. Jy is bang dat jy verwerp sal word. Maar die feit dat jy bereid is om die inisiatief te neem, is ’n teken dat jy volwasse is. Maar onthou: Dis nie ’n huweliksaanbod nie. Gebruik dus goeie oordeel. As jou benadering te ernstig of te intens is, kan dit ’n meisie eerder afskrik as aantrek.

Wat meisies sê: “Ek kan nie gedagtes lees nie. As iemand my beter wil leer ken, moet hy eerlik en reguit wees en dit eenvoudig vir my sê.”—Nina.

“As julle al ’n ruk lank vriende is, kan die oorgang ongemaklik wees. Maar ek sal iemand respekteer as hy eenvoudig sê dat hy nie net vriende wil wees nie, maar my beter wil leer ken.”—Helen.

● Respekteer die meisie se besluit. Sê nou jou vriendin wil nie hê dat julle verhouding ernstiger moet raak nie? Toon dat jy haar respekteer deur te aanvaar dat sy weet hoe sy voel en dat haar nee, nee beteken. Dit openbaar ’n gebrek aan volwassenheid as jy ’n laspos van jouself maak. Gestel ’n meisie maak dit duidelik dat sy nie in jou belangstel nie, maar jy ignoreer dit eenvoudig—of vererg jou selfs—aan wie se belange dink jy nou eintlik, aan hare of jou eie?—1 Korintiërs 13:11.

Wat meisies sê: “Dit irriteer my wanneer ek uitdruklik vir iemand nee sê, maar hy hou aan probeer.”—Colleen.

“Ek het vir ’n ou gesê dat ek nie in hom belangstel nie, maar hy het my bly vra vir my telefoonnommer. Ek wou nie ongeskik wees nie. Dit was seker nie vir hom maklik om die moed bymekaar te skraap om te sê hoe hy oor my voel nie. Maar ek moes uiteindelik baie ferm met hom wees.”—Sarah.

Wat om nie te doen nie

Party jong mans meen dat hulle nie sukkel om meisies te kry om van hulle te hou nie. Hulle kompeteer dalk selfs met hulle portuurs om te kyk wie die meeste meisies se aandag kan trek. Maar dit is wreed en sal jou ’n slegte reputasie gee (Spreuke 20:11). Jy kan dit vermy deur die volgende punte toe te pas.

● Moenie flirt nie. ’n Flirt gebruik vleiende woorde en uitlokkende lyftaal. Hy stel glad nie in ’n eerbare romantiese verhouding belang nie. Sulke dade en gesindhede toon geen respek vir die Bybel se raad om “jonger vroue soos susters met alle kuisheid” te behandel nie (1 Timoteus 5:2). ’n Flirt sal nie ’n goeie vriend kan wees nie, en nog minder ’n goeie huweliksmaat. Verstandige meisies weet dit.

Wat meisies sê: “Ek dink dis baie onaantreklik wanneer iemand jou vlei, terwyl jy weet dat hy net verlede maand dieselfde dinge vir jou vriendin gesê het.”—Helen.

“’n Oulike jong man het eenkeer met my begin flirt, maar het hoofsaaklik oor homself gepraat. Toe ’n ander meisie by ons groep aangesluit het, het hy dieselfde met haar gedoen. Toe ’n derde meisie by ons kom staan het, het hy dieselfde dinge vir haar gesê. Dit was lelik!”—Tina.

● Moenie met ’n meisie se gevoelens speel nie. Moenie verwag dat ’n vriendskap met ’n meisie dieselfde sal werk as ’n vriendskap met ’n seun nie. Waarom nie? Dink hieraan: As jy sê dat ’n vriend goed lyk in sy nuwe pak of as jy gereeld met hom praat en hom in jou vertroue neem, is dit onwaarskynlik dat hy sal dink dat jy romanties in hom belangstel. Maar as jy vir ’n meisie sê dat sy mooi lyk of gereeld met haar praat en haar in jou vertroue neem, sal sy waarskynlik dink dat jy romantiese belangstelling in haar toon.

Wat meisies sê: “Ek dink regtig nie ouens verstaan dat hulle meisies nie dieselfde as hulle ander vriende kan behandel nie.”—Sheryl.

“’n Ou sal my telefoonnommer kry, en dan kry ek ’n SMS van hom af. Wel, . . . wat beteken dit? Jy kan soms ’n SMS-verhouding hê en geheg raak aan die ander persoon, maar hoeveel kan jy nou eintlik in ’n SMS sê?”—Mallory.

“Ek dink nie ’n ou besef hoe gou ’n meisie emosioneel betrokke kan raak nie, veral as hy gaaf is en dit maklik is om met hom te praat. Dit beteken nie dat sy desperaat is nie. Ek dink net dat die meeste meisies verlief wil raak en dat hulle altyd op die uitkyk is na die regte man.”—Alison.

LEES MEER OOR HIERDIE ONDERWERP IN DEEL 2, HOOFSTUK 3

SLEUTELTEKSTE

“[Beklee] julle met die nuwe persoonlikheid . . . , wat na God se wil in ware regverdigheid en lojaliteit geskep is.”—Efesiërs 4:24.

WENK

Vra ’n paar ervare volwassenes watter vaardigheid hulle meen die belangrikste is vir ’n jong man om aan te kweek, en kyk of dit iets is waaraan jy moet werk.

HET JY GEWEET . . . ?

Jou innerlike is belangriker as jou uiterlike.

AKSIEPLAN!

Een gebied waarop ek beter maniere aan die dag kan lê, is ․․․․․

Om my kommunikasievermoë te verbeter, sal ek ․․․․․

Wat ek graag vir my ouer(s) hieroor wil vra ․․․․․

WAT DINK JY?

● Hoe kan jy toon dat jy jouself respekteer?

● Hoe kan jy toon dat jy ’n meisie se gedagtes en gevoelens respekteer?

[Lokteks op bladsy 198]

Ouens dink dat hulle op ’n sekere manier moet aantrek of ’n sekere voorkoms moet hê om vir meisies aantreklik te wees. Hoewel dit in ’n sekere mate waar is, dink ek dat baie meisies eerder deur goeie eienskappe aangetrek word.’’—Kate

[Prent op bladsy 197]

Goeie maniere is nie soos ’n pak klere wat jy dra om ander te beïndruk en wat jy dan uittrek wanneer jy by die huis kom nie