Jongmense vra

Waarom hou meisies nie van my nie?

Ek beïndruk haar nou regtig baie. Ek het haar alles van my vertel—wat ek besit, waar ek al oral was, wie ek ken. Sy kan seker nie wag om met my uit te gaan nie!

Ek wens ek kan in die aarde insink! Kan hy nie sien ek stel nie belang nie? Hoe kan ek hierdie gesprek beëindig sonder om onbeskof te wees?

JY IS oud genoeg om met ’n meisie uit te gaan. Jy wil graag iemand vind wat aantreklik is en wat aan dieselfde geloof as jy behoort (1 Korintiërs 7:39). Maar elke keer dat jy in die verlede ’n verhouding met iemand probeer aanknoop het, was dit ’n totale mislukking.

Watter faktore moet jy in ag neem as jy ’n meisie beter wil leer ken? En watter Bybelbeginsels sal dit vir jou goed wees om in gedagte te hou?

Wat om eerste te doen

Voordat jy besluit om met ’n sekere meisie te probeer uitgaan, is daar ’n paar basiese vaardighede wat jy moet aanleer, wat jou sal help om met enigiemand vriende te maak. Kyk na die volgende.

◼ Leer goeie maniere aan. Die Bybel sê: “Die liefde is nie ongemanierd nie” (1 Korintiërs 13:5, Today’s English Version). Goeie maniere toon dat jy ander respekteer en dat jy ’n volwasse, Christelike persoonlikheid aankweek. Maar goeie maniere is nie soos ’n pak klere wat jy dra om ander te beïndruk, maar wat jy uittrek wanneer jy by die huis kom nie. Vra jou af: ‘Toon ek goeie maniere teenoor my gesin?’ Indien nie, sal dit geforseerd lyk wanneer jy goeie maniere teenoor ander buite die gesin toon. Onthou dat ’n meisie met onderskeidingsvermoë sal kyk na hoe jy jou gesinslede behandel om uit te vind watter soort persoon jy werklik is.—Efesiërs 6:1, 2.

Wat meisies sê: “Ek vind dit regtig aantreklik as ’n ou goeie maniere het in klein dingetjies, soos om die deur vir my oop te maak, sowel as in groter dinge, soos om nie net teenoor my vriendelik en bedagsaam te wees nie, maar ook teenoor my gesin.”—Tina, 20.a

“Dit sit my af as ek iemand skaars ontmoet het en hy vra vrae wat te persoonlik is, soos: ‘Gaan jy met iemand uit?’ en ‘Wat is jou doelwitte?’ Dis ongeskik en laat my baie ongemaklik voel!”—Kathy, 19.

◼ Handhaaf goeie persoonlike higiëne. Goeie higiëne toon dat jy nie net vir ander respek het nie, maar ook vir jouself (Matteus 7:12). As jy jouself respekteer, is dit waarskynliker dat ander jou sal respekteer. Aan die ander kant, as jy jou higiëne verwaarloos, sal jy jou pogings om ’n meisie te beïndruk, in die wiele ry.

Wat meisies sê: “’n Seun wat in my belanggestel het, se asem het regtig gestink. Ek kon eenvoudig nie daarmee saamleef nie.”—Kelly, 24.

◼ Verbeter jou kommunikasievermoë. Die grondslag van ’n blywende verhouding is goeie kommunikasie. Dit behels dat jy nie net praat oor waarin jy belangstel nie, maar ook waarin jou vriendin belangstel.—Filippense 2:3, 4.

Wat meisies sê: “Dit beïndruk my wanneer ’n jong man heel natuurlik met my kan praat, wanneer hy kan onthou wat ek vir hom vertel het en hy vrae kan vra wat die gesprek aan die gang hou.”—Christine, 20.

“Ek dink dat ouens aangetrek word deur wat hulle sien, maar dat meisies eerder aangetrek word deur wat hulle hoor.”—Laura, 22.

“Geskenke is wonderlik. Maar as ’n jong man ’n goeie gesprek kan hou, as hy jou met sy woorde kan vertroos en aanmoedig . . . Sjoe! Dít is aantreklik.”—Amy, 21.

“Ek sal iemand beslis beter wil leer ken as hy ’n sin vir humor het maar ook oor ernstiger dinge kan praat sonder om oppervlakkig te klink.”—Kelly, 24.

As jy die wenke hierbo toepas, sal dit jou help om goeie vriendskappe op te bou. Maar wat moet jy doen wanneer jy voel dat jy gereed is om ’n ernstige verhouding met ’n spesifieke meisie aan te knoop?

Die volgende stap

◼ Neem die inisiatief. As jy dink dat ’n vriendin wat jy bewonder, dalk ’n goeie huweliksmaat sal wees, moet jy vir haar sê dat jy in haar belangstel. Wees openhartig wanneer jy vir haar sê hoe jy voel. Ja, dit kan senutergend wees. Jy is bang dat jy verwerp sal word. Maar die feit dat jy bereid is om die inisiatief te neem, is ’n teken dat jy volwasse is.

Wat meisies sê: “Ek kan nie gedagtes lees nie. As iemand my dan beter wil leer ken, moet hy eerlik en reguit wees en dit eenvoudig vir my sê.”—Nina, 23.

“As julle al ’n ruk lank vriende is, kan die oorgang ongemaklik wees. Maar ek sal iemand respekteer as hy eenvoudig sê dat hy nie net vriende wil wees nie, maar my beter wil leer ken.”—Helen, 25.

◼ Respekteer die meisie se besluit. Sê nou jou vriendin wil nie hê dat julle verhouding ernstiger moet raak nie? Toon dat jy haar respekteer deur te glo dat sy weet hoe sy voel en dat haar nee, nee beteken. Dit openbaar ’n gebrek aan volwassenheid as jy ’n laspos van jouself maak. As dit duidelik is dat ’n meisie nie in jou belangstel nie en jy dit ignoreer—of jou selfs daaroor vererg—dink jy werklik aan haar belange of aan jou eie?—1 Korintiërs 13:11.

Wat meisies sê: “Dit irriteer my wanneer ek uitdruklik nee sê vir iemand maar hy aanhou probeer.”—Colleen, 20.

“Ek het vir ’n ou gesê dat ek nie in hom belangstel nie, maar hy het my bly vra vir my telefoonnommer. Ek wou nie ongeskik wees nie. Dit was immers nie vir hom maklik om die moed bymekaar te skraap om te sê hoe hy oor my voel nie. Maar ek moes uiteindelik baie ferm met hom wees.”—Sarah, 23.

Wat om nie te doen nie

Party jong mans meen dat hulle nie sukkel om meisies te kry om van hulle te hou nie. Hulle wedywer dalk selfs met hulle portuurs om te kyk wie die meeste meisies se aandag kan trek. Maar sulke wedywering is wreed en sal jou ’n slegte reputasie gee (Spreuke 20:11). Jy kan dít vermy deur die volgende punte toe te pas.

◼ Moenie flirt nie. ’n Flirt gebruik vleiende woorde en uitlokkende lyftaal. Hy is glad nie van plan om ’n eerbare romantiese verhouding aan te knoop nie. Sulke dade en gesindhede ignoreer die Bybel se raad om “jonger vroue soos susters met alle kuisheid” te behandel (1 Timoteus 5:2). Flirts is slegte vriende en nog erger huweliksmaats. Meisies met onderskeidingsvermoë weet dit.

Wat meisies sê: “Ek dink dis baie onaantreklik wanneer iemand jou vlei terwyl jy weet dat hy net verlede maand dieselfde dinge vir jou vriendin gesê het.”—Helen, 25.

“’n Oulike jong man het eenkeer met my begin flirt, en het hoofsaaklik oor homself gepraat. Toe ’n ander meisie by ons groep aangesluit het, het hy dieselfde met haar gedoen. Toe ’n derde meisie by ons groep aangesluit het, het hy dieselfde dinge vir haar gesê. Dit was verskriklik!”—Tina, 20.

◼ Moenie met ’n meisie se gevoelens speel nie. Moenie verwag dat ’n vriendskap met iemand van die teenoorgestelde geslag volgens dieselfde reëls sal werk as ’n vriendskap met iemand van dieselfde geslag nie. Hoekom nie? Dink hieraan: As jy sê dat ’n vriend goed lyk in sy nuwe pak of as jy gereeld met dié vriend praat en hom in jou vertroue neem, is dit onwaarskynlik dat hy sal dink dat jy romanties in hom belangstel. Maar as jy vir ’n meisie sê dat sy mooi lyk of gereeld met haar praat en haar in jou vertroue neem, sal sy waarskynlik dink dat jy ’n romantiese belangstelling in haar toon.

Wat meisies sê: “Ek dink regtig nie ouens verstaan dat hulle meisies nie dieselfde as hulle ander vriende kan behandel nie.”—Sheryl, 26.

“’n Seun sal my telefoonnommer kry, en dan kry ek ’n SMS van hom af. Wel, . . . wat beteken dit? Jy kan soms ’n SMS-verhouding hê en geheg raak aan die ander persoon, maar hoeveel kan jy in ’n SMS sê?”—Mallory, 19.

“Ek dink nie ’n ou besef hoe gou ’n meisie emosioneel betrokke kan raak nie, veral as hy simpatiek is en maklik is om mee te praat. Dit beteken nie dat sy desperaat is nie. Ek dink net dat die meeste meisies verlief wil raak en dat hulle altyd op die uitkyk is na die regte man.”—Alison, 25.

Wees realisties

Dis onrealisties, selfs egotisties, om te dink dat alle meisies van jou sal hou. Maar party sál as jy die volgende onthou: Jou persoonlikheid is belangriker as jou voorkoms. Dit is glad nie verbasend nie dat die Bybel klem lê op hoe belangrik dit is dat iemand “die nuwe persoonlikheid” moet aankweek.—Efesiërs 4:24.

Kate, 21, som die saak soos volg op: “Seuns dink dat hulle op ’n sekere manier moet aantrek of ’n sekere voorkoms moet hê om meisies se aandag te trek. Hoewel dit tot ’n sekere mate waar is, dink ek dat baie meisies meer deur goeie eienskappe aangetrek word.”b

Nog artikels uit die reeks “Jongmense vra” kan gevind word op die webwerf www.watchtower.org/ype

[Voetnote]

IETS OM OOR TE DINK

◼ Hoe kan jy toon dat jy jouself respekteer?

◼ Hoe kan jy toon dat jy ’n meisie se gedagtes en gevoelens respekteer?

[Prent op bladsy 19]

Goeie maniere is nie soos ’n pak klere wat jy dra om ander te beïndruk, maar wat jy uittrek wanneer jy by die huis kom nie