Behep met geweld

DIE wêreld van vandag is behep met geweld. Geweld het weliswaar nog altyd in vermaak voorgekom. Maar “in onlangse jare”, sê die Media Awareness Network, “het iets omtrent mediageweld verander. Om maar een ding te noem, dit het toegeneem.” En dit is ook “baie eksplisieter, baie meer seksueel en baie meer sadisties”. Kyk na die volgende.

Musiek: Liedjies waarvan die woorde al hoe gewelddadiger word, “word nou in die musiekbedryf as normaal aanvaar”, sê die bogenoemde bron. Party liedjies gebruik vieslike taal om moord en verkragting, selfs van vrouens en moeders, te verheerlik.

Videospeletjies: “Dit is ongelukkig ’n feit dat videospeletjies ’n ongesonde beheptheid met bloedvergieting toon”, het ’n Britse tydskrif vir videospeletjie-entoesiaste gesê. Dit het bygevoeg: “In sekere mate moet jy vir geweld lief wees om vir videospeletjies lief te wees.” Byvoorbeeld, in een gewilde speletjie kan spelers vroue met bofbalkolwe doodslaan. Party deskundiges meen dat videospeletjies, aangesien dit interaktief is, ’n groter negatiewe invloed op kinders kan hê as TV.

Rolprente: Studies toon dat geweld, seks en vuil taal merkbaar toegeneem het in rolprente en dat ouderdomsbeperkings moontlik nie ’n betroubare aanduiding is of die inhoud gepas is nie. Wat meer is, dit is nie net die “slegte ouens” wat gewelddadig is nie. Volgens een studie word byna die helfte van die geweld wat op TV, in rolprente en in musiekvideo’s uitgebeeld word, deur die “goeie ouens” gepleeg.

Nuus: “As die bloed loop, sal dit verkoop”, is die leuse van baie TV-nuusvervaardigers. Die nuus is ’n reusebedryf, en verslaggewers weet dat geweld kykers lok en dat hoër kykersyfers adverteerders lok, wat in baie lande die finansiers van TV-programme is.

Webwerwe: Virtuele sowel as werklike beeldmateriaal van marteling, ledemate wat afgekap word, verminking en moord kan op die Internet gevind word. Baie kinders besoek hierdie webwerwe.

Kan mediageweld ’n invloed op jou hê?

Het geweld op televisie, in rolprente, boeke, musiek en ander vorme van vermaak ’n invloed op mense? Diegene wat geld maak uit mediageweld, beweer weliswaar dikwels dat hulle produkte onskadelik is. Maar dink hieraan: Om mense se denke te beïnvloed, betaal die sakewêreld miljarde rande vir advertensies, waarvan elkeen dalk net 30 sekondes lank is. Is dit dan redelik om te dink dat ’n rolprent van 90 minute, waarin die helde dalk onsedelik en gewelddadig is, min of geen uitwerking sal hê, veral op die ontvanklike verstande van kinders nie?

Ons Skepper, Jehovah God, ken die mensenatuur baie beter as ons. Wat het hy vir ons gesê oor assosiasie met gewelddadige mense, wat in beginsel diegene insluit wat ons deur middel van die gewilde media vermaak? Kyk na die volgende Bybelverse:

● “Jehovah ondersoek die regverdige sowel as die goddelose, en Sy siel haat beslis elkeen wat geweld liefhet.”—Psalm 11:5.

● “Moenie omgaan met iemand wat gou toornig word nie; en by ’n man wat woedebuie het, moet jy nie ingaan nie, sodat jy nie met sy paaie vertroud raak en beslis ’n strik vir jou siel span nie.”—Spreuke 22:24, 25.

Ons kan natuurlik nie blootstelling aan alle slegte invloede vermy nie. Maar ons kan ons vermaak kies, sowel as die mense met wie ons assosieer. Vra jou af: ‘Watter soort persoon wil ek wees?’ Assosieer dan met sulke mense, mense met die waardes en doelwitte wat jy wil hê.—Spreuke 13:20.

Hoewel die assosiasie en vermaak wat ons kies, ons gesindheid teenoor geweld kan beïnvloed, kan ander faktore ons ook beïnvloed. Wat kan dit wees?

[Prent op bladsy 4]

Die vermaak wat ons kies, kan ons gesindheid teenoor geweld beïnvloed