Fisiese Skoonheid

Waarom waardeer ons skoonheid?

Die manier waarop die menslike brein skoonheid waarneem, is steeds ’n raaisel. Die Bybel verduidelik nie hoe dit gebeur nie, maar dit sê wel waarom ons mooi dinge waardeer: God het ons eienskappe soos syne gegee (Genesis 1:27; Prediker 3:11). Hy het ook die hoogs ingewikkelde menseliggaam geskep en het dit ’n wonderlike vorm en funksie gegee. In hierdie verband het ’n psalmis gesê: “Ek sal u [God] prys, omdat ek op ’n vreesinboesemende wyse wonderbaar gemaak is.”—Psalm 139:14.

Maar vandag het mense dikwels ’n ongebalanseerde beskouing van fisiese skoonheid—’n beskouing wat deur die modebedryf en gewilde media bevorder word. Die boek Body Image sê dat ’n aantal studies in Westerse kulture “toon dat ’n persoon se liggaamsbeeld die heel belangrikste faktor in sy beskouing van homself is”. So ’n bekrompe beskouing kan egter beteken dat iets baie belangriker geïgnoreer word—’n persoon se hart.—1 Samuel 16:7.

Dit gaan hand aan hand met die feit dat seksualiteit al hoe meer oorbeklemtoon word, veral die seksualiteit van vroue. ’n Verslag wat in 2007 deur die Amerikaanse Sielkundige Vereniging (APA) gedoen is, sê: “Feitlik alle vorme van die media wat ondersoek is, bevat oorgenoeg bewyse dat vroue net as sekssimbole beskou word.” Die Bybel spoor ons sterk aan om nie deur sulke beskouings beïnvloed te word nie—en met goeie rede!—Kolossense 3:5, 6.

“Laat julle versiering nie [uiterlik] wees . . . nie, maar laat dit die geheime persoon van die hart in die onverderflike versiering van die stille en sagmoedige gees wees, wat in die oë van God van groot waarde is.”—1 Petrus 3:3, 4.

Waarom is dit wys om ’n gebalanseerde beskouing te hê?

Party mense sê die volgende oor fisiese skoonheid: “Spog met wat jy het!” In kulture waar hierdie beskouing algemeen is, kan meisies wat in hulle tienerjare of selfs jonger is, leer om hulleself te beskou “as voorwerpe van ander se begeertes . . . , om bekyk te word en volgens hulle voorkoms beoordeel te word”, sê ’n verslag deur die APA. Hierdie beskouing kan baie skadelik wees. Trouens, dit het ’n ernstige maatskaplike en gesondheidsprobleem geword, wat volgens die APA, tot “verskeie negatiewe emosionele gevolge” kan lei. Dit kan angstigheid en “selfs selfveragting . . . , eetversteurings, ’n swak selfbeeld en depressie of terneergedruktheid” insluit.

“Verwyder . . . kwelling uit jou hart, en hou rampspoed weg van jou vlees; want jeug en die bloei van die lewe is nietigheid.”—Prediker 11:10.

Watter beskouing toon dat jy gesonde verstand het?

Die Bybel verbind “gesonde verstand”, of verstandigheid, met beskeidenheid (1 Timoteus 2:9). Dink aan die volgende: Beskeie persone is nie oppervlakkig, verwaand of behep met hulle voorkoms nie. Hulle het eerder ’n gesonde, gebalanseerde beskouing van hulleself. Hulle neem ook ander se gevoelens in ag en wen sodoende bewondering, respek en bowenal God se goedkeuring (Miga 6:8). Wat meer is, hulle is meer geneig om ware vriende te maak en die aandag te trek van potensiële huweliksmaats wat nie net in fisiese intimiteit belangstel nie, maar ook in ’n blywende en gelukkige huwelik.

Die Bybel vermaan ons dus om verskeie goeie redes om op die innerlike persoon te fokus—“die geheime persoon van die hart” (1 Petrus 3:3, 4). Innerlike skoonheid is werklik tydloos. Trouens, dit kan mettertyd verbeter! “Grysheid is ’n pragtige kroon wanneer dit op die weg van regverdigheid gevind word”, sê Spreuke 16:31. Mense wat dus die Bybel se voortreflike raad volg, hetsy hulle oud of jonk is, sal die sleutel vind tot blywende skoonheid, sowel as waardigheid en vergenoegdheid.

“Bekoorlikheid kan vals wees, en skoonheid kan nietig wees; maar die vrou wat Jehovah vrees, sy verwerf lof vir haarself.”—Spreuke 31:30.