Hoofstuk 24

Waarom Jesus aarde toe gekom het

JESUS het ’n besige dag saam met sy vier dissipels in Kapernaüm gehad, en daardie aand bring die mense van Kapernaüm al hulle siekes na hom toe sodat hy hulle kan genees. Daar was geen tyd vir privaatheid nie.

Nou is dit vroeg die volgende oggend. Terwyl dit nog donker is, staan Jesus op en gaan alleen uit. Hy gaan na ’n eensame plek waar hy in privaatheid tot sy Vader kan bid. Maar Jesus se privaatheid is van korte duur, want toe Petrus en die ander besef dat hy weg is, gaan soek hulle na hom.

Toe hulle Jesus kry, sê Petrus: “Almal soek U.” Die mense van Kapernaüm wil hê dat Jesus by hulle moet bly. Hulle waardeer werklik wat hy vir hulle gedoen het! Maar het Jesus aarde toe gekom hoofsaaklik om sulke wonderdadige genesings te verrig? Wat sê hy hiervan?

Volgens een Bybelverslag antwoord Jesus sy dissipels: “Laat ons na die naburige dorpe gaan, sodat Ek ook daar kan preek; want daarvoor het Ek uitgegaan.” Hoewel die mense by Jesus aandring om te bly, sê hy vir hulle: “Ek moet aan die ander stede ook die evangelie van die koninkryk van God bring, want daarvoor is Ek gestuur.”

Ja, Jesus het aarde toe gekom veral om te preek oor God se Koninkryk wat sy Vader se naam sal regverdig en wat alle menslike kwale vir ewig uit die weg sal ruim. Maar om te bewys dat hy deur God gestuur is, verrig Jesus wonderdadige genesings. Moses het eeue tevore eweneens wonderwerke verrig om sy geloofwaardigheid as God se kneg te bevestig.

Toe Jesus Kapernaüm verlaat om in ander stede te gaan preek, gaan sy vier dissipels saam met hom. Hulle is Petrus en sy broer Andreas, en Johannes en sy broer Jakobus. Jy onthou dalk dat hulle net die vorige week genooi is om Jesus se eerste reisende medewerkers te wees.

Jesus se predikingsreis deur Galilea saam met sy vier dissipels is ’n wonderlike sukses! Trouens, berigte oor sy bedrywighede versprei selfs deur die hele Sirië. Groot menigtes uit Galilea, Judea en van oorkant die Jordaanrivier volg Jesus en sy dissipels. Markus 1:35-39; Lukas 4:42, 43; Mattheüs 4:23-25; Exodus 4:1-9, 30, 31.

▪ Wat gebeur die oggend ná Jesus se besige dag in Kapernaüm?

▪ Waarom is Jesus aarde toe gestuur, en wat is die doel van sy wonderwerke?

▪ Wie gaan saam met Jesus op sy predikingsreis deur Galilea, en wat is die reaksie op Jesus se bedrywighede?