Jesus se lewe en bediening
Ywer vir Jehovah se aanbidding
NA DIE bruilof in Kana reis Jesus na Kapernaüm, ’n stad naby die See van Galilea. Sy dissipels, sy moeder en sy broers, Jakobus, Joses, Simon en Judas, is saam met hom. Maar voor hulle hierdie reis aanpak, moet hulle dalk eers by Jesus se huis in Nasaret aangaan sodat die gesin kan pak wat hulle nodig sal hê.
Maar waarom gaan Jesus na Kapernaüm in plaas van sy bediening in Kana, in Nasaret of in die een of ander plek in die heuwels van Galilea voort te sit? Eerstens, Kapernaüm is beter geleë en is klaarblyklik ’n groter stad. Die meeste van Jesus se dissipels woon ook in of naby Kapernaüm, en gevolglik sal hulle nie hulle huise hoef te verlaat om deur hom opgelei te word nie.
Gedurende sy verblyf in Kapernaüm verrig Jesus wonderwerke, soos hy self maande later getuig. Maar Jesus en sy metgeselle val weldra weer in die pad. Dit is lente en hulle is op pad na Jerusalem om die Pasga van 30 G.J. by te woon. Terwyl hulle daar is, sien sy dissipels iets omtrent Jesus wat hulle miskien nie tevore gesien het nie.
Volgens God se Wet moet die Israeliete diereoffers bring. Vir hulle gerief verkoop handelaars in Jerusalem dus diere of voëls vir hierdie doel. Maar hulle verkoop dit binne-in die tempel, en hulle kul die mense deur hulle te veel te vra.
Jesus is diep verontwaardig. Hy maak ’n sweep van toutjies en dryf die verkopers uit. Hy gooi die geldwisselaars se geld uit en keer hulle tafels om. “Neem daardie dinge hier weg”, sê hy vir die duiweverkopers. “Moenie die huis van my Vader ’n handelshuis maak nie!”
Toe Jesus se dissipels dit sien, onthou hulle die profesie omtrent God se Seun: “Die ywer vir u huis het my verteer.” Maar die Jode vra: “Watter teken toon U aan ons, dat U hierdie dinge doen?” Jesus antwoord: “Breek hierdie tempel af, en in drie dae sal Ek dit oprig.”
Die Jode neem aan dat Jesus van die letterlike tempel praat, maar hy praat van die tempel van sy liggaam. En toe Jesus drie jaar later uit die dode opgewek word, onthou sy dissipels hierdie woorde van hom. Johannes 2:12-22; Mattheüs 13:55; Lukas 4:23.
♦ Na watter plekke reis Jesus na die bruilof in Kana?
♦ Waarom is Jesus verontwaardig, en wat doen hy?
♦ Wat onthou Jesus se dissipels toe hulle sy optrede sien?
♦ Wat het Jesus oor “hierdie tempel” gesê, en wat het hy bedoel?