Deel 6
Waarom God lyding toegelaat het
1, 2. Hoe het ons eerste ouers dinge laat skeefloop ná die goeie begin wat God hulle gegee het?
WAT het verkeerd geloop? Waarom het dinge skeefgeloop ná die goeie begin wat God ons eerste ouers in die Paradys van Eden gegee het? Waarom heers goddeloosheid en lyding, pleks van die vrede en harmonie van die Paradys, al duisende jare lank?
2 Dit is omdat Adam en Eva hulle wilsvryheid misbruik het. Hulle het die feit uit die oog verloor dat hulle nie geskep is om goed te vaar as hulle onafhanklik van God en sy wette optree nie. Hulle het besluit dat hulle onafhanklik van God wil wees, omdat hulle gedink het dat dit hulle lewe sou verbeter. Hulle het dus buite die godgegewe perke van hulle wilsvryheid opgetree.—Genesis, hoofstuk 3.
Die geskil van universele soewereiniteit
3-5. Waarom het God Adam en Eva nie summier vernietig en opnuut begin nie?
3 Waarom het God Adam en Eva nie summier vernietig en opnuut met ’n ander mensepaar begin nie? Omdat sy universele soewereiniteit, dit wil sê, sy onvervreembare reg om te regeer, betwis is.
4 Die vraag was: Wie het die reg om te regeer en wie se heerskappy is reg? Die feit dat God almagtig is en die Skepper is van alles wat lewe, gee hom die reg om oor hulle te regeer. Aangesien hy ook alwys is, is sy heerskappy die beste vir alle skepsele. Maar God se heerskappy was nou betwis. En was daar iets verkeerd met sy skepping—die mens? Ons sal later uitvind hoe die geskil van die mens se onkreukbaarheid hierby betrokke is.
5 Toe die mens hom onafhanklik van God verklaar het, het nog ’n vraag ontstaan: Kon die mens beter vaar as God nie oor hom heers nie? Die Skepper het beslis die antwoord geken, maar die beste manier waarop mense kon uitvind wat die antwoord is, was om hulle die absolute vryheid te gee wat hulle wou hê. Hulle het daardie weg uit hulle eie vrye wil gekies, en God het dit dus toegelaat.
6, 7. Waarom het God die mens so lank absolute vryheid toegelaat?
6 Deur die mens genoeg tyd toe te laat om met absolute vryheid te eksperimenteer, kon God eens en vir altyd bewys of die mens beter daaraan toe is onder God se heerskappy of op sy eie. En daar moes genoeg tyd toegelaat word sodat mense die sogenoemde toppunt van hulle politieke, industriële, wetenskaplike en mediese prestasies kon bereik.
7 God het die mens derhalwe tot ons dag toe vrye teuels gegee om sonder enige twyfel te bewys of menseheerskappy onafhanklik van hom kan slaag. Die mens kon dus kies tussen goedheid en wreedheid, tussen liefde en haat, tussen geregtigheid en ongeregtigheid. Maar hy het ook te staan gekom teenoor die gevolge van sy keuse: goedheid en vrede of goddeloosheid en lyding.
Opstand van geesskepsele
8, 9. (a) Hoe het opstand in die geesteryk uitgebreek? (b) Wie behalwe Adam en Eva is deur Satan beïnvloed om in opstand te kom?
8 Daar is nog ’n faktor wat in ag geneem moet word. Ons eerste ouers was nie die enigstes wat teen God se heerskappy in opstand gekom het nie. Maar wie het ook op daardie tydstip bestaan? Geesskepsele. Voordat God die mens geskep het, het hy ’n hoër vorm van lewe, groot getalle engele, geskep om in die hemele te woon. Hulle is eweneens met wilsvryheid geskep, asook met die behoefte om hulle aan God se heerskappy te onderwerp.—Job 38:7; Psalm 104:4; Openbaring 5:11.
9 Die Bybel toon dat opstand eerste in die geesteryk uitgebreek het. ’n Geesskepsel wou absolute vryheid hê. Hy wou selfs hê dat die mens hom moes aanbid (Mattheüs 4:8, 9). Hierdie opstandeling uit die geesteryk het daartoe bygedra dat Adam en Eva in opstand gekom het deur valslik te beweer dat God iets goeds van hulle weerhou het (Genesis 3:1-5). Hy word derhalwe Duiwel (Lasteraar) en Satan (Teenstander) genoem. Later het hy ander geesskepsele oorreed om ook in opstand te kom. Hulle is van toe af demone genoem.—Deuteronomium 32:17, NW; Openbaring 12:9; 16:14, NW.
10. Wat was die gevolg van die mens en die geesskepsele se opstand?
10 Die mens het hom deur sy opstand teen God aan die invloed van Satan en sy demone oorgegee. Daarom noem die Bybel Satan “die god van hierdie wêreld” wat ‘die sinne van die ongelowiges verblind het’. God se Woord sê gevolglik dat “die hele wêreld in die mag van die Bose lê”. Jesus self het Satan “die owerste van hierdie wêreld” genoem.—2 Korinthiërs 4:4; 1 Johannes 5:19; Johannes 12:31.
Twee geskille
11. Wat was die ander geskil waaroor Satan God uitgedaag het?
11 Satan het nog ’n geskil geopper wat God uitgedaag het. Hy het God in werklikheid daarvan beskuldig dat die manier waarop Hy die mens geskep het verkeerd was en dat niemand die regte ding sou wou doen wanneer druk op hom uitgeoefen word nie. Trouens, hy het beweer dat hulle God onder druk sou vervloek (Job 2:1-5, NW). Op hierdie manier het Satan die menseskepping se onkreukbaarheid bevraagteken.
12-14. Hoe sou die tyd leer wat die waarheid is omtrent die twee geskille wat Satan geopper het?
12 God het gevolglik genoeg tyd toegelaat sodat alle intelligente skepsele kon sien hoe hierdie geskil sowel as die geskil oor God se soewereiniteit besleg sou word. (Vergelyk Exodus 9:16.) Die uiteinde van die mens se geskiedenis sou die waarheid omtrent hierdie twee geskille openbaar.
13 Wat sou die tyd eerstens toon aangaande die geskil oor universele soewereiniteit, die regmatigheid van God se heerskappy? Kon mense hulleself beter regeer as God? Sou enige stelsel van menseheerskappy onafhanklik van God ’n gelukkige wêreld sonder oorlog, misdaad en ongeregtigheid tot stand kon bring? Sou enige stelsel van sulke menseheerskappy armoede kon uitwis en sorg dat almal in welvaart lewe? Sou enigeen siekte, ouderdom en die dood kon oorwin? God se heerskappy sou dit alles kon doen.—Genesis 1:26-31.
14 Wat sou die tyd aangaande die tweede geskil, naamlik die waarde van die menseskepping, toon? Het God ’n fout begaan toe hy die mens op sy manier geskep het? Sou enigeen van hulle die regte ding onder beproewing doen? Sou daar mense wees wat toon dat hulle eerder God se heerskappy as onafhanklike menseheerskappy verkies?
[Prent op bladsy 13]
God het tyd toegelaat sodat mense die toppunt van hulle prestasies kon bereik
[Erkenning]
Shuttle: Based on NASA photo