Deel 7
Wat was die gevolg van opstand?
1-3. Hoe het die tyd geleer dat Jehovah reg gehad het?
WAT het al hierdie eeue van menseheerskappy onafhanklik van God getoon ten opsigte van die geskil oor God se reg om te regeer? Het mense bewys dat hulle beter heersers as God is? Te oordeel aan die rekord van die mens se onmenslikheid teenoor sy medemens kan ons sê dat dit beslis nie die geval is nie.
2 Toe ons eerste ouers God se heerskappy verwerp het, het rampspoed gevolg. Hulle het lyding oor hulleself en oor die hele mensdom gebring wat uit hulle gebore is. En hulle kon niemand behalwe hulleself blameer nie. God se Woord sê: “Hulle het van hulle kant verderflik gehandel; hulle is nie sy kinders nie, die gebrek lê by hulleself.”—Deuteronomium 32:5, NW.
3 Die geskiedenis het getoon dat God se waarskuwing aan Adam en Eva korrek was, naamlik dat hulle agteruit sou gaan en uiteindelik sou sterf as hulle God se voorsienings verwerp (Genesis 2:17; 3:19). Hulle hét God se heerskappy verwerp, en hulle hét mettertyd agteruitgegaan en gesterf.
4. Waarom word ons almal onvolmaak gebore, onderhewig aan siekte en die dood?
4 Wat daarna met al hulle nakomelinge gebeur het, is soos Romeine 5:12 verduidelik: ‘Deur een mens [Adam, die mensdom se gesinshoof] het sonde in die wêreld ingekom en deur die sonde die dood, en so het die dood tot alle mense deurgedring.’ Toe ons eerste ouers dus in opstand gekom het teen God se opsienerskap het hulle gebrekkige sondaars geword. In ooreenstemming met die wette van genetika was die onvolmaaktheid wat daaruit voortgespruit het ál wat hulle aan hulle nageslag kon oordra. Daarom is ons almal onvolmaak gebore, onderhewig aan siekte en die dood.
5, 6. Wat het die geskiedenis getoon ten opsigte van die mens se pogings om ware vrede en voorspoed te bring?
5 Baie eeue het verstryk. Heerskappye het gekom en gegaan. Elke denkbare regeringsvorm is al op die proef gestel. Maar daar het keer op keer afgryslike dinge met die mensdom gebeur. Ná sesduisend jaar sou ’n mens dink dat die mens sover sou gevorder het dat hulle vrede, geregtigheid en voorspoed oor die hele aarde tot stand sou gebring het en dat hulle teen hierdie tyd die positiewe waardes van goedheid, medelye en samewerking sou bemeester het.
6 In werklikheid het net die teenoorgestelde gebeur. Daar is geen vorm van menseregering wat nog ooit ware vrede en voorspoed vir almal kon bring nie. In hierdie 20ste eeu alleen het ons gesien hoe miljoene stelselmatig gedurende die Groot Slagting uitgewis is en hoe meer as 100 miljoen in oorloë afgemaai is. In ons tyd is tallose mense as gevolg van onverdraagsaamheid en politieke verskille gemartel, vermoor en in tronke gestop.
Die huidige situasie
7. Hoe kan ons die toestand van die mensdom vandag beskryf?
7 Kyk daarbenewens na die toestand waarin die mensdom hom oor die algemeen bevind. Misdaad en geweld vier hoogty. Dwelmmisbruik neem epidemiese afmetings aan. Seksueel oordraagbare siektes is pandemies. Die gevreesde siekte vigs raak miljoene mense. Tienmiljoene mense sterf jaarliks van honger of aan siektes, terwyl ’n klein aantal ontsaglike rykdom besit. Mense besoedel en vernietig die aarde. Oral verbrokkel gesinne en oral word sedelike waardes oorboord gegooi. Die lewe weerspieël vandag waarlik die afskuwelike heerskappy van ‘die god van hierdie wêreld’, Satan. Die wêreld waaroor hy gesag voer, is koud, genadeloos en totaal verdorwe.—2 Korinthiërs 4:4.
8. Hoekom kan ons nie sê dat die mens se prestasies ware vooruitgang is nie?
8 God het genoeg tyd toegelaat sodat die mens die toppunt van sy wetenskaplike en materiële vooruitgang kon bereik. Maar is dit werklike vooruitgang as die pyl en boog deur masjiengewere, tenks, straalbomwerpers en kernmissiele vervang is? Is dit vooruitgang wanneer mense ruimtereise kan onderneem, maar nie op aarde in vrede kan saamleef nie? Is dit vooruitgang wanneer mense te bang is om saans, of op sommige plekke selfs bedags, op straat te wees?
Wat die tyd geleer het
9, 10. (a) Wat het die afgelope eeue duidelik getoon? (b) Waarom sal God nie ons wilsvryheid wegneem nie?
9 Die toets van die eeue het getoon dat dit nie vir mense moontlik is om sonder God se heerskappy hulle eie voetstappe met sukses te rig nie. Dit is net so onmoontlik om dít te doen as wat dit vir hulle is om te leef sonder om te eet, te drink en asem te haal. Die bewyse is duidelik: Net so seker as wat ons geskep is om van voedsel, water en lug afhanklik te wees, is ons geskep om van ons Skepper se leiding afhanklik te wees.
10 Deur goddeloosheid toe te laat, het God eens en vir altyd bewys wat die ongelukkige gevolge is wanneer wilsvryheid misbruik word. En wilsvryheid is so ’n kosbare gawe dat God die mens eerder toegelaat het om te sien wat die misbruik daarvan beteken as om die gawe van hulle weg te neem. God se Woord praat die waarheid wanneer dit sê: ‘Dit behoort nie aan die mens om sy voetstappe te rig nie.’ Dit praat ook die waarheid wanneer dit sê: “Die een mens heers oor die ander tot sy ongeluk.”—Jeremia 10:23; Prediker 8:9.
11. Het enige regeringsvorm van die mens lyding uit die weg geruim?
11 Die feit dat God menseheerskappy sesduisend jaar lank toegelaat het, toon onteenseglik dat die mens nie die vermoë het om lyding te beëindig nie. Die mens het dit nog nooit gedoen nie. Koning Salomo van Israel kon byvoorbeeld in sy dag met al sy wysheid, rykdom en mag nie die ellende uitwis wat die gevolg van menseheerskappy is nie (Prediker 4:1-3). In ons dag kan wêreldleiers selfs met die nuutste tegnologiese vooruitgang ook nie lyding uitwis nie. Die ergste van alles is dat die geskiedenis toon dat die mens se onafhanklikheid van God se heerskappy lyding eerder laat toeneem het as om dit uit te wis.
God se langtermynbeskouing
12-14. Watter langtermynvoordele spruit uit die feit dat God lyding toegelaat het?
12 Die feit dat God lyding toegelaat het, het ons baie pyn besorg. Maar hy het ’n langtermynbeskouing gehad en hy het geweet wat die goeie gevolge uiteindelik sou wees. God se beskouing sal sy skepsele nie net ’n paar jaar of ’n paar duisend jaar lank tot voordeel strek nie, maar miljoene jare lank, ja, vir ewig.
13 As daar ook op enige tydstip in die toekoms ’n situasie sou ontstaan waar iemand hulle wilsvryheid misbruik om die manier waarop God dinge doen te bevraagteken, sal dit nie nodig wees om hom tyd toe te laat om sy standpunt te bewys nie. Aangesien opstandelinge reeds duisende jare toegelaat is, het God ’n wettige presedent geskep waarop hy hom tot in alle ewigheid en op enige plek in die heelal kan beroep.
14 Die feit dat Jehovah goddeloosheid en lyding tot nou toe toegelaat het, sal onomstootlik bewys het dat niks wat strydig met hom is, kan floreer nie. Dit sal sonder enige twyfel bewys het dat geen onafhanklike voorneme van die mens of geesskepsele blywende voordele kan bring nie. God sal derhalwe heeltemal geregverdig wees om enige opstandeling summier te vernietig. “Hy verdelg al die goddelose.”—Psalm 145:20; Romeine 3:4.
[Prente op bladsy 15]
Nadat ons eerste ouers gekies het om onafhanklik van God te wees, het hulle mettertyd oud geword en gesterf
[Prente op bladsy 16]
Menseheerskappy sonder God was rampspoedig
[Erkenning]
U.S. Coast Guard photo