Deel 6
Waarom is daar soveel lyding en ongeregtigheid?
1, 2. Watter vrae kan gevra word met die oog op wat die mens al deurgemaak het?
1 Maar as dit die Opperwese se voorneme was dat volmaakte mense vir ewig onder paradystoestande op aarde lewe en as dit steeds sy voorneme is, waarom is daar nie nou ’n paradys nie? Waarom het die mensdom in plaas daarvan soveel eeue van lyding en ongeregtigheid deurgemaak?
2 Die mensegeskiedenis is ongetwyfeld gevul met ellende wat veroorsaak is deur oorlog, imperialistiese verowerings, uitbuiting, ongeregtigheid, armoede, rampe, siekte en die dood. Waarom het soveel slegte dinge met soveel onskuldige slagoffers gebeur? As God almagtig is, waarom het hy duisende jare lank soveel verskriklike lyding toegelaat? Aangesien God die heelal so goed ontwerp en georganiseer het, waarom het hy wanorde en vernietiging op aarde toegelaat?
’n Voorbeeld
3-5. (a) Watter illustrasie kan ons help om te verstaan waarom ’n God van orde wanorde op die aarde sou toelaat? (b) Watter een van etlike moontlikhede kom met die situasie op aarde ooreen?
3 Laat ons ’n voorbeeld gebruik om toe te lig waarom ’n God van orde wanorde op die aarde sou toelaat. Stel jou voor dat jy in ’n woud instap en op ’n huis afkom. Wanneer jy na die huis kyk, sien jy dat dit verwaarloos is. Die vensters is stukkend, die dak is erg beskadig, die houtstoep is vol gate, die deur hang aan een skarnier en die watertoevoerstelsel werk nie.
4 Sou al hierdie tekortkominge jou laat dink dat ’n intelligente ontwerper onmoontlik daardie huis kon ontwerp het? Sou die wanorde jou oortuig dat die huis bloot per toeval ontstaan het? Of as jy tot die gevolgtrekking kom dat iemand dit wel ontwerp en gebou het, sou jy dink dat hierdie persoon onbedrewe en nalatig was?
5 Wanneer jy die huis van naderby bekyk, sien jy dat dit oorspronklik goed gebou was en van veel oorleg en sorg getuig. Maar nou is dit net verwaarloos en besig om vervalle te raak. Waarvan kan die tekortkominge en probleme ’n aanduiding wees? Dit kan ’n aanduiding wees dat (1) die eienaar dood is; (2) dat hy ’n bekwame bouer is, maar nie meer in die huis belangstel nie of (3) dat hy sy huis tydelik aan nalatige mense verhuur het. Laasgenoemde stem met die situasie op hierdie aarde ooreen.
Wat skeef geloop het
6, 7. Wat het met Adam en Eva gebeur toe hulle God se wet oortree het?
6 Uit die eerste Bybelverslag leer ons dat dit nie God se voorneme was dat mense ly of sterf nie. Ons eerste ouers, Adam en Eva, het slegs gesterf omdat hulle aan God ongehoorsaam was (Genesis, hoofstukke 2 en 3). Toe hulle ongehoorsaam was, het hulle nie meer God se wil gedoen nie. Hulle het hulle aan God se sorg onttrek. Hulle het hulle in werklikheid van God, “die bron van die lewe”, afgesny.—Psalm 36:10, NAV.
7 Soos ’n masjien wat al hoe stadiger loop en gaan staan wanneer hy van sy kragbron afgesny word, het hulle liggaam en verstand agteruitgegaan. Gevolglik het Adam en Eva verswak, oud geword en uiteindelik gesterf. Wat het toe gebeur? Hulle het teruggegaan na waar hulle vandaan gekom het: “Stof is jy, en tot stof sal jy terugkeer.” God het hulle gewaarsku dat ongehoorsaamheid aan sy wette tot die dood sou lei: ‘Jy sal sekerlik sterwe.’—Genesis 2:17; 3:19.
8. Watter uitwerking het die sonde van ons eerste ouers op die mensdom gehad?
8 Dit was nie net ons eerste ouers wat gesterf het nie, maar al hulle nakomelinge, die hele mensdom, is ook aan die dood onderwerp. Waarom? Want volgens die wette van genetika erf kinders hulle ouers se kenmerke. En al die kinders van ons eerste ouers het onvolmaaktheid en die dood geërf. Romeine 5:12 sê vir ons: “Soos deur een mens [Adam, die mensdom se voorvader] die sonde in die wêreld ingekom het en deur die sonde die dood, en so die dood tot alle mense deurgedring het, omdat almal gesondig het [deur onvolmaaktheid, oftewel sondige neigings, te erf].” En aangesien sonde, onvolmaaktheid en die dood al is wat mense ken, beskou sommige dit as natuurlik en onvermydelik. Maar die eerste mense is geskep met die vermoë en begeerte om vir ewig te lewe. Dit is waarom die meeste mense die vooruitsig dat hulle lewe deur die dood kortgeknip gaan word so frustrerend vind.
Waarom so lank?
9. Waarom het God toegelaat dat lyding so lank voortduur?
9 Waarom het God mense so lank toegelaat om te doen wat hulle wil? Waarom het hy lyding soveel eeue lank toegelaat? Een vername rede is dat ’n baie belangrike geskil geopper is: Wie het die reg om te regeer? Moet God die Heerser van die mens wees, of kan hulle sonder hom met welslae oor hulleself heers?
10. Watter vermoë het die mens ontvang, en met watter verantwoordelikheid?
10 Mense is geskep met wilsvryheid, oftewel met die vermoë om te kies. Hulle is nie soos robotte gemaak of soos diere, wat hoofsaaklik deur instink gelei word, nie. Mense kan dus kies wie hulle gaan dien (Deuteronomium 30:19; 2 Korinthiërs 3:17). God se Woord vermaan ons derhalwe: “[Wees soos] vrymense en nie asof julle die vryheid het as ’n dekmantel vir die boosheid nie, maar as diensknegte van God” (1 Petrus 2:16). Hoewel mense die wonderlike gawe van keusevryheid het, moet hulle egter die gevolge aanvaar van die weg wat hulle gekies het.
11. Wat sou die enigste manier wees om vas te stel of die keuse om onafhanklik van God te wees geluk kon meebring?
11 Ons eerste ouers het die verkeerde keuse gedoen. Hulle keuse was om onafhanklik van God te wees. God kon weliswaar die eerste opstandige mensepaar doodgemaak het onmiddellik nadat hulle hulle wilsvryheid misbruik het. Maar dit sou nie die geskil oor die regmatigheid van God se heerskappy oor die mens besleg het nie. Aangesien die eerste mensepaar onafhanklik van God wou wees, moet die vraag beantwoord word: Kon daardie keuse tot ’n gelukkige, suksesvolle lewe gelei het? Die enigste manier waarop dit vasgestel kon word, was om ons eerste ouers en hulle nakomelinge toe te laat om hulle eie pad te gaan, aangesien dit hulle keuse was. Die tyd sou leer of mense geskep is om met welslae oor hulleself te regeer as hulle onafhanklik van hulle Skepper is.
12. Hoe het Jeremia menseheerskappy geëvalueer, en waarom is dit so?
12 Die Bybelskrywer Jeremia het geweet wat die gevolge sou wees. Onder leiding van God se magtige heilige gees, of werkende krag, het hy hierdie ware woorde geskryf: “Ek weet, o HERE, dat aan die mens sy weg nie toebehoort nie; nie aan ’n man om te loop en sy voetstappe te rig nie. Tugtig my, HERE” (Jeremia 10:23, 24). Hy het geweet dat mense die leiding van God se hemelse wysheid moet hê. Waarom? Omdat God mense eenvoudig nie geskep het om sonder sy leiding gelukkig te wees nie.
13. Wat het die gevolge van duisende jare van menseheerskappy buite alle twyfel getoon?
13 Die gevolge van duisende jare van menseheerskappy toon buite alle twyfel dat mense nie hulle aangeleenthede sonder hulle Skepper kan behartig nie. Hulle het probeer, maar hulle kan net hulleself vir die katastrofiese gevolge blameer. Die Bybel stel dit duidelik: “Die Rots [God], volmaak is sy aktiwiteit, want al sy weë is geregtigheid. ’n God van getrouheid, by wie geen onreg is nie; regverdig en opreg is hy. Hulle het van hulle kant verderflik gehandel; hulle is nie sy kinders nie, die gebrek lê by hulleself.”—Deuteronomium 32:4, 5, NW.
God gaan binnekort ingryp
14. Waarom gaan God binnekort in menseaangeleenthede ingryp?
14 Aangesien daar genoegsame bewys is dat menseheerskappy deur die eeue heen misluk het, kan God nou in menseaangeleenthede ingryp en lyding, smart, siekte en die dood tot ’n einde bring. Aangesien God mense toegelaat het om die hoogste prestasies in die wetenskap, nywerheid, geneeskunde en ander studierigtings te bereik, hoef hy nie nóg honderde jare te wag sodat mense wat onafhanklik van hulle Skepper is, kan kyk of hulle ’n vreedsame, paradysagtige wêreld teweeg kan bring nie. Hulle het nie en kan ook nie. Onafhanklikheid van God het ’n verskriklike, haatlike, dodelike wêreld tot gevolg gehad.
15. Op watter Bybelse raad moet ons ag slaan?
15 Hoewel daar al opregte heersers was wat die mensdom wou help, het hulle pogings nie geslaag nie. Vandag is daar oral bewyse dat menseheerskappy agteruitgaan. Dit is waarom die Bybel vermaan: “Vertrou nie op prinse, op die mensekind, by wie geen heil is nie.”—Psalm 146:3.
[Prent op bladsy 24, 25]
Selfs opregte wêreldheersers kon nie ’n vreedsame, paradysagtige wêreld teweegbring nie