Wagte, verhef julle stemme!
“Hoor! Jou wagte! Hulle verhef die stem.”-JESAJA 52:8.
1, 2. (a) Watter vraag ontstaan in verband met Jesaja 52:8? (b) Watter belydenis het een geestelike gedoen?
WIE is die wagte wat hier gemeld word? Is hulle die wagte van die Christendom se gelowe? Wel, wat sê die geestelikes van die Christendom vandag oor die Koninkryk van God? Die volgende voorbeeld kan ons help om daardie vraag te beantwoord.
2 ’n Gesiene geestelike van die Universiteit van Aberdeen, Skotland, het die volgende klagte gelug:
“Gedurende die afgelope sestien jaar [1963-78] kan ek net twee geleenthede onthou dat ek preke gehoor het wat spesifiek oor die koninkryk van God gehandel het. . . . Ek vind hierdie stilswye nogal verrassend, want Nieu-Testamentici is dit allerweë eens dat die koninkryk van God die sentrale tema van die evangelies en van die leer van Jesus was. . . . Waarom preek mense nie oor die koninkryk van God nie? Ek reken dat een voor-die-hand-liggende antwoord eenvoudig is: ‘Omdat ons nie geleer is hoe om dit te doen nie.’
3. Hoe is die woorde van Jesaja 56:10, 11 vandag van toepassing?
3 Dit spreek vanself dat geestelikes wat versuim om die Koninkryk van God te verkondig nie die ware betekenis van die goeie nuus gesnap het nie. Hulle het nie ag geslaan op Jesaja se oproep om te ontwaak nie. Hulle kan nie goeie nuus van iets beters verkondig nie, want hulle weet van niks beters as die belydenisse en formalisme van wêreldlike godsdiens nie. Hulle is ‘blinde wagte’, van wie ’n raak beskrywing in Jesaja 56:10, 11 gegee word.
4. (a) Watter kontras vorm die wagte van Jesaja 52:8 met hedendaagse geestelikes? (b) Waarom moet ons ons Groot Onderrigter dankbaar wees?
4 ‘Ons is nie geleer hoe om dit te doen nie.’ Dit is die rede wat die gesiene geestelike aanvoer vir geestelikes se versuim om die Koninkryk van God te verkondig. Maar gelukkig is daar wagte wat vandag die Koninkryk van God verkondig, en hulle kan dit met oortuiging doen omrede hulle geleer is en steeds geleer word. Dit is van hulle wat God se profeet praat wanneer hy skryf: “Jehovah is ’n God van die gerig. Gelukkig is almal wat hom bly verwag. . . . Jou Groot Onderrigter sal hom nie langer verberg nie, en jou oë moet oë word wat jou Groot Onderrigter sien. En jou eie ore sal ’n woord agter jou hoor wat sê: ‘Dit is die weg. Wandel daarop’, ingeval julle regs of ingeval julle links sou gaan.’—Jesaja 30:18, 20, 21, NW.
5. (a) Watter organisatoriese reëlings het God vir sy volk getref? (b) In watter opsigte, in verband met die Koninkryk, kom Jehovah se Getuies vandag met Jesus en sy apostels ooreen?
5 Jehovah se Getuies word aangaande God se Koninkryk geleer, nie in die teologiese kweekskole van die Christendom se sektes nie, maar in die Teokratiese Bedieningskool en ander weeklikse vergaderinge in hulle Koninkryksale. Hulle word opgelei om die Koninkryk suksesvol van huis tot huis te verkondig en om Bybelstudies te hou met ontvanklike persone wat van die Koninkryk wil leer. Hierdie onderrigting kom van Jehovah deur sy organisasie, wat hy met hierdie woorde aanspreek: “Al jou kinders sal deur die Here geleer wees, en die vrede van jou kinders sal groot wees.” Jehovah se Getuies weet presies waaroor die Koninkryk gaan, en dat dit ongekende seëninge vir die mensdom hier op aarde sal bring. Soos Jesus en sy apostels bid hulle dat God se Koninkryk moet kom en verkondig hulle ywerig die Koninkrykshoop. —Jesaja 54:13; Mattheüs 4:17; 6:10; 10:7; 12:21; 24:14.
Wagters, roep uit!
6. (a) Wie maak vandag die wagklas uit, en watter taak verrig hulle? (b) Watter waarskuwing laat die wag nou hoor, en watter instrument gebruik hy?
6 In ’n aantal tekste maak God se profete van wagte melding. In vervloë tye was hulle gedurig op die uitkyk, gereed om ’n waarskuwing te laat hoor in verband met enige vyandelike aanval. In Jesaja 21:8 sê een van hierdie wagte: “Op die wagtoring, Here, staan ek gedurig by dag, en op my wagpos stel ek my al die nagte.” Vandag verrig ’n wagklas, die gesalfde “getroue en verstandige dienskneg” wat die Here Jesus Christus hier op aarde verteenwoordig, so ’n taak. Hierdie wag kyk hoe gebeure op aarde ontwikkel ter vervulling van Bybelprofesie, laat ’n waarskuwing hoor aangaande die naderende “groot verdrukking . . . soos daar van die begin van die wêreld af tot nou toe nie gewees het” nie en verkondig „goeie nuus van iets beters”. Die Wagtoring, met sy wêreldwye oplaag van 10 200 000 eksemplare per nommer, is een van die instrumente wat deur die wag gebruik word om die goeie nuus te verkondig.—Mattheüs 24:14, 21, 45-47; Jesaja 52:7, NW.
7. Wie dien ter ondersteuning van die “wagte”, en waarom is hulle hulp nodig?
7 Die wag-“dienskneg”-klas ontvang heelwat lojale ondersteuning in die verkondiging van die goeie nuus. Soos die vorige artikel gemeld het in sy verslag oor die Gedenkmaalopkoms vir 1983, tel die oorblyfsel van die gesalfde “dienskneg” op aarde vandag net meer as 9 000. Hulle het hulp nodig om die predikingswerk suksesvol af te handel. En hulp het hulle gekry! Miljoene metgeselle skaar hulle by die oorblyfsel en verhef ook hulle stem saam met die “wagte” wat in Jesaja 52:8 beskryf word. In baie letterlike sin voeg hulle hul stemme by die van die “wagte” om die goeie nuus uit te basuin.
8. (a) Wat toon die tabel op bladsye 10 en 11 in verband met Koninkryksuitbreiding? (b) Wat is die situasie ln plekke waar die Koninkrykswerk aan beperkinge onderworpe is?
8 Blaai na bladsye 10 en 11 van hierdie tydskrif en jy sal sien dat Jehovah hierdie wagte en hulle lojale metgeselle wêreldwyd seën. Hulle “verhef die stem” in so ’n mate dat daar oral ’n wonderlike vermeerdering in verkondigers is. Dit is te verwagte noudat Christus Jesus in sy Vader se Koninkryk heers, want Jesaja 9:5, 6 (NAV) sê immers van hierdie “Vredevors”: “Sy heerskappy sal uitbrei, en Hy sal vir altyd vrede en voorspoed bring.” Soos die tabel toon, is daar dele van die aarde, waaronder sommige lande met baie groot bevolkings, waar die Koninkrykspredikingswerk aan ernstige beperkings onderworpe is. Die Getuies in hierdie plekke doen wat hulle kan met die hulp van Jehovah se gees (Sagaria 4:6). Regerings wat hierdie werk teenstaan, en gemeenskappe wat sulke regerings ondersteun, sal swaar bloedskuld dra wanneer die groot verdrukking losbreek.—Vergelyk Esegiël 3:17-19.
Pionierverkondigers van goeie nuus
9. (a) Watter kommentaar het jy oor vermeerderinge in pioniers, soos blyk ult die tabel? (b) Watter verblydende rapporte het Wagtoringtakke ingestuur?
9 Die tabel toon ook die wêreldwye vermeerdering in pioniers gedurende 1983. Dit is waarlik verstommend! Soos blyk uit die paar rapporte hieronder, is Wagtoringtakke wêreldwyd verheug oor die groot getalle wat na vore kom om aan die hulp-, gewone en (waar nodig) spesiale pionierdiens deel te neem:
Barbados: Die aantal hulppioniers in April was 292 in 1981, 529 in 1982 en 740 in 1983.
België: Aansoeke om gewone pionierdiens het in 1983 met 30 persent toegeneem.
Chili: Die gemiddelde aantal hulppioniers was 987—’n vermeerdering van 40 persent.
Ivoorkus: Die aantal gewone pioniers het met 15 persent gestyg vergeleke met die vorige jaar.
Portugal: Die hoogtepunt van 3 046 hulppioniers in April was werklik verstommend—’n vermeerdering van 140 persent vergeleke met die vorige hoogtepunt.
Swede: Ons het ’n hoogtepunt van 796 gewone pioniers gehad.
Thailand: In April het 23 persent van ons 821 verkondigers as pioniers gerapporteer.
Venezuela: Meer as 200 broers en susters het in 1983 die gewone pionierdiens betree.
10. Wat toon dat vervolging nie die wagte kan stilmaak nie?
10 Lande waar die Koninkrykswerk aan ernstige beperkings onderworpe is, rapporteer ook ’n toename in verkondigers en pioniers. ’n Afrikaland waar die broers 15 jaar gelede baie wreed vervolg is, het gedurende die 1983-diensjaar hoogtepunte van 616 gewone en 207 hulppioniers gehad. En op dieselfde vasteland, in ’n land waar 75 broers in die gevangenis is, het die verkondigertal met 35 persent gestyg in vergelyking met die vorige jaar se gemiddelde, terwyl daar in April 151 persent meer hulppioniers was as ooit tevore. Die “wagte” en hulle metgeselle dring daarop aan om die stem te verhef!
11. Hoe vind die gemeente, sowel as die hele wêreldveld, by pionieraktiwiteit baat?
11 Al hierdie ywerige pionieraktiwiteit het ’n baie positiewe uitwerking op die Koninkrykswerk. Dit lei byvoorbeeld tot ’n baie deegliker dekking van gebied, en baie meer ure word aan die verkondiging van die goeie nuus bestee. In 1983 is daar wêreldwyd 436 720 991 uur aan die Koninkryksprediking gewy, ’n merkwaardige vermeerdering van 13,5 persent! Meer studies word begin—baie daarvan deur hulppioniers—en meer belangstellendes word na God se organisasie gerig.
12. Watter persoonlike voordele hou die pionierdiens in?
12 Die pionierdiens hou ook persoonlike voordele in. Gedurende ’n maand van hulppionierdiens word ’n verkondiger soveel vaardiger en vlotter in die wyse waarop hy die Koninkryksboodskap aan ander oordra! Dit verskaf ook groot vreugde om met ander in hierdie diens om te gaan en om meer tydskrifte te versprei, herbesoeke te doen en studies te hou. Baie het hierdie maande van hulppionierdiens so geniet dat hulle die nodige veranderinge aangebring het om gewone pioniers te word. Ander doen op ’n gereelde grondslag hulppionierdiens.
13. Watter bemoediging kan ons uit die twee ondervindinge uit Pakistan put?
13 Die Moslemgebied van Pakistan is glo baie moeilike gebied om te werk. En tog kom die volgende verslag uit daardie land:
Een broer wat die afgelope 30 maande onafgebroke as hulppionier dien, het gesê: “Dit lyk nou asof die Imdadi- (Oerdoewoord vir hulp-) pionierdiens werklik deel geword het van my, en ek dink ek sal groot moeite hê as ek ooit daarvan ontslae wil raak. Dit het deel van my lewe en daaglikse roetine geword om minstens twee uur te gebruik om vir ander te getuig.”
“Minstens twee uur” per dag in Koninkryks-diens—dit is al wat hulppionierdiens verg. Kan jy dit doen? Dit kan jou gesonder en gelukkiger maak, soos hierdie verdere ondervinding uit Pakistan toon:
’n Ander broer wat op die ouderdom van 58 afgetree en sedertdien by die geledere van die hulppioniers aangesluit het, het die volgende te sê: “Ek is al die afgelope 28 jaar ’n Getuie, maar nog nooit het ek dit so geniet en waardeer om ’n Getuie te wees as gedurende die laaste agt maande waarin ek pal ’n hulppionier was nie. In antwoord op ’n vraag van my voormalige kollegas oor hoekom ek sihatmand (gesonder, Oerdoe) en khush (gelukkiger, Oerdoe) lyk na my aftrede, sê ek vir hulle dat dit my vermeerderde diens aan die ware God, Jehovah, is wat my vreugde en tevredenheid verskaf en my sihatmand en khush laat lyk.”
Wil jy nie ook graag sihatmand en khush wees nie? Maak dan ten volle gebruik van jou geleenthede om as hulppionier te dien!
Strewe na pionierseëninge
14. Watter vooruitgang in verkondigers en pioniers sien jy in die Wêreldrapport op bladsye 14 tot 17, en op hoeveel plekke?
14 Kom ons blaai na die Wêreldrapport van Jehovah se Getuies vir die 1983-diensjaar wat op bladsye 14 tot 17 van hierdie tydskrif verskyn. Hierdie vier bladsye toon vir ons veel meer as blote syfers. Hulle getuig van die manjifieke poging wat Koninkryksverkondigers in 205 lande of gebiede aangewend het om die goeie nuus te verkondig. Bestudeer die kolom onder die opskrif “Gemiddelde pionierverkondigers” en kyk watter uitstekende bydrae so baie lande in hierdie diens gelewer het. En die pioniers het ook die lojale ondersteuning van die gemeenteverkondigers geniet, wat dieselfde gees van ywer vir die diens getoon het, al kan die bydrae van party met ‘die weduwee se penning’ vergelyk word.—Markus 12:41-44.
15. Hoe kan gesinne geseen word wanneer hulle dle pionierdiens bevorder?
15 Gesinne wat hulle lewens om die pionierdiens bou, is inderdaad geseënd. Party gesinne het hulle dit ten doel gestel om ’n ploniergesin te wees en het daardie doel bereik. Hulle doen as gesin die een of ander deeltydse werk om ‘die pot aan die kook te hou’. Ander gesinne werk saam om een gesinslid in die gewone pionierdiens te onderhou, en almal vind baat by die pioniergees wat sodoende in die huis ingebring word.
16. (a) Hoe kan ouers belangstelling toon ln hulle kinders se geestelike vooruitgang? (b) Watter goeie voorbeeld vind ons in die vroeë lewe van Jesus?
16 Almal wat die onlangse “Koninkrykseenheid”-Streekbyeenkoms bygewoon het, het ’n uitstekende toespraak oor doelwitte gehoor. Ouers wat hulle kinders se welsyn op die hart dra, kan hulle kinders leer om vir hulleself goeie doelwitte in die lewe te stel (Spreuke 22:6). Een hiervan kan die pionierdiens wees. Dink aan die opleiding wat Jesus self in sy jong dae ontvang het. Op die ouderdom van 12 was hy so goed vertroud met die Skrif dat hy met die leraars in die tempel kon redeneer (Lukas 2:46, 47). Hy het nie ’n wêreldlike loopbaan, soos in die regte of die geneeskunde, nagestreef nie. Hy het eerder geleer om met sy hande te werk as ’n timmerman, terwyl hy hom voortdurend geestelik toegerus het vir die werk wat op hom gewag het (Markus 6:3; Johannes 7:46). Vandag kan die kinders van Jehovah se Getuies ook goeie doelwitte nastreef terwyl hulle nog op skool is. Ouers kan hulle hierin aanmoedig.
17. Watter vertroue kan jong, selfopofferende pioniers hê, ln teenstelling met wêreldlike jongmense?
17 Daar word berig dat baie mense met universiteitsgrade vandag sonder werk is. Maar goed opgeleide jong Christene wat reguit van die hoërskool af in die pionierdiens ingaan, vind dikwels dat hulle geskikte deeltydse werk kan kry wanneer hulle dit nodig het. Jehovah seën en sorg vir diegene wat op hom vertrou terwyl hulle in ’n gees van selfopoffering ‘eers die koninkryk soek’.—Mattheüs 6:19-21, 31-33; Spreuke 3:5, 6; Maleagi 3:10.
18. Hoe het ’n bespreking oor pionierdiens ’n gemeente in die Filippyne tot nut gestrek?
18 Party in die gemeente sê miskien: ‘Waarom al hierdie gepraat oor die pionierdiens? Dit is werklik buite ons bereik.’ Maar vreugdevolle pioniers kan so ’n wonderlike bydrae lewer tot die gees van die gemeente en tot die plaaslike uitbreiding van die werk! Die Wagtoring van 1 Februarie 1983 het ’n studie-artikel bevat met die titel: “Die gees van die Christelike bediening.” Die vraag by paragraaf 7 het gelui: “Watter vraag moet elke Christenbedienaar homself afvra?” Dit het die aandag gevestig op die volgende vraag in die paragraaf self: “Kan ek werklik die feit dat ek nie ’n pionier is nie voor Jehovah verantwoord?” Toe hulle oor hierdie paragraaf kommentaar gelewer het by ’n Wagtoring-studie in die Filippyne, het drie van die aanwesiges, van verskillende ouderdomme, een na die ander gesê dat bepeinsing oor hierdie vraag hulle beweeg het om pioniers te word. Hulle kommentare is deur luide applous van die gemeente begroet.
19. Hoe kan diegene wat nie pioniers kan wees nie ’n waardevolle bydrae in die gemeente lewer?
19 Daar is weliswaar sommige toegewyde Getuies wat, met ’n skoon gewete voor Jehovah, nie pioniers kan wees nie. Miskien val die meeste broers en susters in ons gemeentes in hierdie kategorie. Maar hulle kan nogtans ’n waardevolle bydrae lewer tot ’n pioniergees in die gemeente. Ouere manne en gesinshoofde kan jongmense aanspoor om die pionierdiens hulle doelwit te maak. Die hele gemeente kan hulle heelhartige ondersteuning gee aan die wat reeds pioniers is. By gepaste geleenthede, soos gedurende die Gedenkmaalseisoen, die besoek van die kringopsiener of tydens skoolvakansies, kan baie ’n poging aanwend om as hulppioniers te dien. Toon geloof dat Jehovah jou sal versterk wanneer jy die poging aanwend. “Laat dit vir [jou] wees volgens [jou] geloof” (Mattheüs 9:29). Behou ’n positiewe gesindheid, al staan swak gesondheid, verantwoordelikhede of ander dinge in die weg van selfs hulppionierdiens. Bestee soveel tyd as moontlik daaraan om “goeie nuus van iets beters” te verkondig, en ondersteun en bemoedig die wat wel pioniers is.
20. (a) Aan watter wêreldsituasie moet ons altyd gedagtig wees? (b) Wat moet dan ons gesindheid teenoor die verlossingswerk wees?
20 Ons lewe vandag in ’n gewelddadige en onsedelike wêreld. Jehovah gaan eersdaags sy oordeel voltrek, net soos hy in vervloë tye gedoen het (Genesis 6:11; 18:20; Lukas 17:26-30). Hierdie is werklik “die laaste dae” (2 Timotheüs 3:1-5, 13). Laat ons, soos ons die geleentheid het, deelneem aan die groot werk om verlossing te verkondig aan almal wat nog uit die ou stelsel kan kom om hulle aan die kant van Jehovah se Koninkryk te skaar. Ons is dankbaar dat Jehovah sy werk die afgelope jaar so ryklik geseën het. Mag ons gedurende 1984 weer eens saam met die Koninkrykswagte oral ons stem verhef tot lof van Jehovah.—Jesaja 62:6.
’n Paar hersieningsvrae:
◻ Watter goeie nuus het geestelikes versuim om te verkondig, en waarom?
◻ Wat toon die tabel op bladsye 10 en 11 in verband met die bedrywigheid van Sion se wagte?
◻ Watter voordele hou pionierdiens vir die individu en vir die gemeente in?
◻ Hoe kan alle verkondigers in die gemeente tot ’n goeie pioniergees bydra?
[Tabel op bladsye 10 en 11]
Koninkryksuitbreiding 1983-diensjaar
“Oor die hele aarde het hulle stem uitgegaan.” Romeine 10:18; Handelinge 1:8.
Hierdie tabel toon die vermeerdering in maandelikse gemiddeldes oor die hele wêreld
Noord-Amerika
Verkondigers: 690 979; vermeerdering: 6%
Pioniers: 58 381; vermeerdering: 16%
Europa
Verkondigers: 610 918; vermeerdering: 6%
Pioniers: 38 978; vermeerdering: 17%
Latyns-Amerika (Ook Karibiese Eilande)
Verkondigers: 472 816; vermeerdering: 11%
Pioniers: 35 450; vermeerdering: 23%
Asië
Verkondigers: 122 726; vermeerdering: 12%
Pioniers: 34 586; vermeerdering: 24%
Eilande van die Stille Oseaan
Verkondigers: 117 816; vermeerdering: 8%
Pioniers: 11 386; vermeerdering: 24%
Afrika
Verkondigers: 266 375; vermeerdering: 6%
Pioniers: 21 690; vermeerdering: 17%
Lande waar werk beperk is
Verkondigers: 229 092; vermeerdering: 4%
Pioniers: 5 627; vermeerdering: 20%
[Venster op bladsy 13]
Vir baie het toetrede tot die gewone pionierdiens ook ’n ryker lewe beteken. ’n Gewone pionier in Nigerië het dit so gestel:
“As ’n voltydse pionier het ek so baie seëninge ontvang, en ek moet hier ’n paar opnoem: (1) Ek kan nou vlot lees danksy my voortdurende prediking. (2) Al het ek nooit skool toe gegaan nie, kan ek met gemak tuisbybelstudies hou. (3) As ’n ouere man kan ek die “Wagtoring”-studie en die Teokratiese Bedieningskool waarneem. (4) Gedurende Koninkryksbedieningskoolklasse kon ek alles verstaan wat in Engels behandel is. (5) As iemand my prediking wil saboteer deur intellektueel te praat, kan ek hom deur my antwoord laat verstaan dat ek opgewasse is vir die taak. Dit alles het my tot die slotsom laat kom dat die pionierdiens ’n gawe van Jehovah aan my is.”