HONDERDSTE JAARVERGADERING

Hierdie geskiedkundige vergadering van die lede van die Wagtoring- Bybel- en Traktaatgenootskap van Pennsilvanië sal heel waarskynlik een van die teokratiese hoogtepunte van 1984 wees. Dit sal gehou word in die stad waar die Genootskap gestig is, naamlik Pittsburgh, Pennsilvanië, op Saterdag, 6 Oktober, van 10h00 tot 12h00, en sal gevolg word deur ’n verdere program van 14h00 tot 17h00. Jehovah se Getuies rondom die aarde toon groot belangstelling in hierdie vergadering. Dit is dus vir ons ’n genoeë om aan te kondig dat die Genootskap daarin geslaag het om groter geriewe vir hierdie belangrike gebeurtenis te huur. Die Jaarvergadering sal nou in die Three Rivers Stadium, Stadium Circle 420, Pittsburgh, gehou word. Aangesien die stadion sitplek het vir 60 000, word uitnodigings na talle gemeentes binne ’n gerieflike radius van Pittsburgh gestuur. Die program sal telefonies na byeenkomssale in die Verenigde State en Kanada herlei word, soos reeds beplan. Toegang by al hierdie plekke, met inbegrip van Pittsburgh, word uitsluitlik vir kaartjiehouers voorbehou. ’n Ryk, geestelike fees word in die vooruitsig gestel.