Armageddon—Van ’n God van liefde?
„ARMAGEDDON”—wat beteken hierdie Bybelse naam? ’n Reeks leersame artikels oor hierdie tema, telkens ingelei deur ’n sinvolle voorblad, verskyn in die vier nommers van Die Wagtoring vir Januarie en Februarie 1985. Ons hoop dat hierdie Skriftuurlike besprekings jou gerusstel met kennis van wat ARMAGEDDON werklik is.
WAARAAN dink jy wanneer jy die woord „Armageddon” sien? Vir baie beteken dit ’n gewelddadige konfrontasie tussen die wêreld se supermoondhede. By die meeste wek dit ’n beeld van die finale ramp—’n kernslagting wat ons aarde omskep in ’n verwoeste, radioaktiewe sintel met min, indien enige, oorlewendes. Maar ondanks sulke gewilde menings is dit hoegenaamd nie wat Armageddon is nie.
Die woord „Armageddon” kom uit die Bybel. En dit kom slegs een keer daarin voor—in die 16de hoofstuk van die boek Openbaring. Nadat die profesie vertel het hoedat al „die konings van die aarde en die hele wêreld” versamel is „vir die oorlog van daardie groot dag van die almagtige God”, sê dit: „Hulle het hul versamel op die plek wat in Hebreeus genoem word Armageddon.”—Verse 13 tot 16.
„Die oorlog van daardie groot dag van die almagtige God”! Armageddon is dus duidelik God se oorlog. Die konings of nasies van die wêreld neem weliswaar daaraan deel. Hulle kom egter nie om teen mekaar oorlog te voer nie, maar om te veg teen God en die hemelse leërs onder leiding van sy aangestelde Koning Jesus Christus—wat voorgestel word as ’n ruiter op ’n wit perd. En wat is die uitslag? Die Bybelverhaal lui: „Ek het . . . die konings van die aarde en hulle leërs versameld gesien, om oorlog te voer teen Hom wat op die perd sit, en teen sy leër. . . . [Hulle] is gedood met die swaard wat uit die mond gaan van Hom wat op die perd sit; en al die voëls is versadig van hulle vlees.”—Openbaring 19:19-21.
’n Bloedige oorlog
Armageddon sal so verwoestend wees dat daar na die bloedbad verwys word as die maai van „die oes van die aarde” met ’n skerp sekel. „En die engel het sy sekel na die aarde laat gaan en die wingerdstok van die aarde afgeoes en dit gegooi in die groot parskuip van die grimmigheid van God. En die parskuip is buitekant die stad getrap, en bloed het uit die parskuip gekom tot aan die tooms van die perde, tweehonderd myl ver.”—Openbaring 14:15-20.
Ja, die bloed sal diep vloei onder die hand van God se teregstellingsmagte. Die 69 miljoen sterftes van twee wêreldoorloë sal gering wees vergeleke met die getal wat in God se oorlog te Armageddon om die lewe gebring word. Die profeet Jeremia het aangaande hulle geskryf: „Die wat deur die HERE verslaan is, sal die dag lê van die een einde van die aarde tot die ander einde van die aarde; hulle sal nie beklaag of versamel of begrawe word nie; hulle sal mis op die aarde wees.”—Jeremia 25:30-33.
Die vurige pyle, vuurreën en ander katastrofale kragte wat met God se oordeel gepaard sal gaan, sal die harte van die mensdom aardwyd met vrees vervul. In verwarring sal elkeen sy naaste aanval wanneer God se teregstellingsmagte sonder inagneming van ouderdom of geslag toeslaan. Want God beveel hulle om geen genade te betoon nie: „Slaan; laat julle oog nie verskoon nie, en moet nie spaar nie; slaan dood grysaards, jongmanne en jongedogters en kinders en vroue tot vernietiging toe.”—Esegiël 9:5, 6; Sagaria 14: 12, 13.
Maar hoe is dit moontlik? Hoe kan ’n God van liefde so ’n bevel uitvaardig? Of is hy net ’n kil, onbesorgde en wraaksugtige God wat min vir sy menseskepping omgee? Sou ’n God van liefde werklik ’n oorlog soos Armageddon bring?