Koninkryksverkondigers berig
Engeleleiding in ons bediening
ONDERVINDINGE toon dikwels dat die Christelike bediening deur die engele gelei word (Openbaring 14:6, 7). Het ’n engel nie vir Filippus gelei na die opregte Ethiopiese hofdienaar wat die Bybel wou verstaan nie? (Handelinge 8:26, 27). En is ’n engel nie na die sagmoedige nie-Jood Cornelius gestuur om hom te help toe hy dringend om God se hulp gebid het nie? (Handelinge 10:3-33). Die volgende ondervinding vanuit Denver, Colorado, V.S.A., help ons om te besef dat engele ons vandag in ons bediening lei wanneer ons na regskape persone soek.
◻ ’n Dame het vir twee van Jehovah se Getuies in hulle huis-tot-huisbediening gesê dat sy besig was. Die een Getuie het haar gevra of sy al ooit gewonder het of ’n mens met die dooies kan praat. Sy het die Getuies ingenooi en hulle het tekste gelees oor die oorsaak van die dood, die toestand van die dode en die opstandingshoop (Prediker 9:5, 10; Johannes 5: 28, 29). Die vrou het belangstelling getoon en ’n Bybelstudie is gereël. Na drie maande se studie het sy gevra of die Getuies vervolgens om 4:30 nm. vir die studie kon kom. Hulle het ingestem.
Die volgende week het die vrou en haar man vir die Getuies gewag, aangesien die man wou weet wat sy vrou leer. Hy het talle vrae gestel, waarvan een was: „Wie is die antichris en die mens van sonde?” Die Getuies het hierdie vraag bevredigend uit die Bybel beantwoord en toe het hy ses eksemplare van die boek Die waarheid wat lei tot die ewige lewe, wat deur Jehovah se Getuies uitgegee word, gevra.
Die volgende week was die man en sy vrou, met hulle ses kinders, teenwoordig by die studie. Die kinders was goedgemanierd en gehoorsaam. Hulle het almal weldra die vergaderinge van Jehovah se Getuies by die Koninkryksaal bygewoon.
Die man het die Getuies gevra om sy getroude dogter en haar man sowel as sy tante en haar dogter te besoek. Hulle het dit gedoen en Bybelstudies is met albei gesinne gereël.
Nadat hulle die Bybel ’n jaar lank bestudeer het, wou hierdie man, sy vrou en twee tienderjarige dogters gedoop word om hulle toewyding aan Jehovah te simboliseer. Daar is toe uitgevind dat hierdie man voorheen ’n Metodiste-predikant was. Maar hy en sy gesin het die kerk verlaat nadat hulle die Bybel twee maande lank saam met die Getuies bestudeer het. Dit het ook uitgekom dat toe die eerste besoek by die vrou gedoen is sy van plan was om selfmoord te pleeg en tot God gebid het om daarna na haar gesin om te sien.
As gevolg van daardie aanvanklike besoek het tien persone die waarheid aanvaar. Die man is nou ’n ouere man, een van sy dogters is ’n pionier en sy skoonseun is ’n bedieningskneg.
Dit is duidelik dat die engele se leiding op die bediening van daardie twee Getuies was. Nou dien hierdie tien persone wat gehelp is om kennis van die waarheid te verkry Jehovah almal vreugdevol, vry van die bande van valse godsdiens.