Koninkryksverkondigers berig

Goeie nuus uit Noorweë

DIE meer as 9 500 Koninkryksverkondigers van die goeie nuus in Noorweë geniet talle goeie ondervindinge. Opregtes van hart herken die Bybelboodskap wat Jehovah se Getuies verkondig as die waarheid en as ’n antwoord op hulle gebede, soos die volgende ondervindinge toon.

◻ ’n Jong paartjie het tot God gebid om hulle te help om ’n doel in die lewe te vind. ’n Week later het Jehovah se Getuies hulle besoek, en die vrou het hulle ingenooi. Die man is teen die Getuies gewaarsku en hy het dus uit die huis uitgegaan om sy motor te was. Die vrou is in Libanon gebore en het ’n taalprobleem gehad, en die Getuies het dus Jehovah se naam vir haar in haar Arabiese Bybel gewys. Twee weke later het die Getuies teruggekeer, en die man het weer buitentoe gegaan om sy motor te was. Die Getuies het die vrou gevra of haar man miskien die volgende keer wanneer hulle kom teenwoordig kon wees sodat hy kon tolk, en sy het belowe om hom te vra.

Tydens die derde besoek was die motor so skoon dat die man gemeen het hy kon dit nie as ’n verskoning gebruik om uit te loop nie, en hy het dus gebly en ’n paar vrae gevra om uit te vind wat die verskil tussen die Getuies en die Staatskerk is. Die besoek het drie uur geduur, en ’n brosjure is by die egpaar gelaat. Toe die Getuies vertrek, het die vrou bed toe gegaan maar die man het die brosjure begin lees en al die tekste nageslaan. In die middel van die nag het hy sy vrou wakker gemaak en gesê: “Jy móét dit lees.” Sy het opgestaan, en hulle het tot vyfuur die oggend saam gelees. Hulle het besef dat hulle die waarheid gevind het en was buite hulleself van vreugde en het tot Jehovah gebid en sy naam gebruik. ’n Gereelde Bybelstudie is met hulle begin, en hulle het vergaderinge begin bywoon. Die man het sy werk in die leër opgesê, en hulle het uit die kerk bedank en opgehou rook. Hulle is nou gedoop en dien Jehovah gelukkig saam met hulle broers en susters van alle wêrelddele.

◻ Twee susters het tydens hulle huis-tot-huisbediening in Noorweë ’n vrou ontmoet wat belangstelling getoon het. Sy het hulle genooi om terug te kom en het gevra of sy ander vroue kon nooi. Met die volgende besoek was daar vier ander vroue. Een van hulle was baie bedrywig in die kerk. Sy het gesê dat sy van jongs af Jesus se bevel om dissipels te maak wou gehoorsaam. Dit het daartoe gelei dat sy saam met haar man na Afrika gegaan het op ’n projek vir hulp aan die buiteland. Al die vroue het baie vrae gehad, en daar is gereël dat die susters hulle elke tweede week sou besoek. Ander bure is genooi, en sommige het aanhou kom terwyl ander nie meer gekom het nie, maar die aktiewe kerklidmaat het besef dat sy die waarheid leer. Toe die predikant van haar kerk eendag sê dat hy oorlog sou ondersteun en dat hy aan die Drie-eenheidsleer glo, het sy haar aan die kerk onttrek. Sy het die vergaderinge van Jehovah se Getuies begin bywoon en het spoedig aan die predikingswerk begin deelneem. Kort daarna is sy gedoop. Uiteindelik kan sy nou, na 30 jaar, die vreugde smaak om Jesus se bevel om dissipels te maak waarlik te gehoorsaam.—Mattheüs 28:19.

Jehovah seën die broers in Noorweë in hulle heilige diens, asook diegene wat na die goeie nuus luister!