Koninkryksbedienaars aanvaar die uitdaging
“Wie is Paulus dan, en wie Apollos anders as dienaars deur wie julle gelowig geword het?”—1 KORINTHIËRS 3:5.
1. (a) Wat word vandag op godsdiensgebied in twyfel getrek, en waarom? (b) Watter ryk word bedreig, en wat sal daarmee gebeur?
DIE gesag van geestelikes word vandag in twyfel getrek. Dit is al hoe meer die geval namate die politieke element van hierdie wêreld teen godsdiens draai, met inbegrip van die “Christelike” godsdiens, en dit as ’n bedrogspul met winsoogmerk beskou. Selfs gegradueerdes van godsdienskweekskole word genegeer as behoorlik gemagtigde predikers en word verban in lande wat ongodsdienstig word. Ja, die wêreldryk van valse godsdiens word aangeval en word bedreig deur ’n aardwye aanslag wat sy vernietiging sal beteken. Die goddelike Bron van ware aanbidding het dit voorspel en het sy eie tyd vir die vervulling van hierdie profesie vasgestel. Lewende wesens in die ganse heelal sal baat vind by hierdie ontsaglike gebeurtenis!
2. Wat sal ten opsigte van godsdiens voortbestaan en wat sal nie?
2 Ongodsdienstigheid sal egter nie lank voortbestaan om die aarde te oorheers nie, maar die verheerlikte Skepper van die heelal sal voortbestaan! Ja, en die ware godsdiens van hierdie onsterflike en allerhoogste God sal bly! Trouens, hoewel die aarde se miljarde die feite ontken, is daar nou bedrywige beoefenaars van God se reine aanbidding op aarde. En die volgende eeue-oue verklaring geld vandag: “Sy onsigbare dinge kan van die skepping van die wêreld af in sy werke verstaan en duidelik gesien word, naamlik sy ewige krag en goddelikheid, sodat hulle geen verontskuldiging het nie.”—Romeine 1:20.
3, 4. (a) Hoe kan daar bewys word dat Jehovah bedienaars op aarde het? (b) Hoe weet ons dat die geestelikes van Babilon die Grote binnekort sonder werk sal wees?
3 Toe daardie woorde gedurende die eerste eeu van ons Gewone Jaartelling geskryf is, het Jehovah God sy bedienaars op die aarde gehad. Die apostel Paulus kon derhalwe skryf: “Wie is Paulus dan, en wie Apollos anders as dienaars deur wie julle gelowig geword het? En dit soos die Here aan elkeen gegee het. Ek het geplant, Apollos het natgemaak, maar God het laat groei.”—1 Korinthiërs 3:5-9.
4 Jehovah moet ook vandag bedienaars op aarde hê. Maar hy gebruik nie die geestelikes van Babilon die Grote, die wêreldryk van valse godsdiens, nie. Trouens, hulle sal binnekort sonder werk wees. Dit sal wees wanneer Babilon die Grote self vernietig word. Openbaring 16:19 voorspel hieromtrent: “Die groot stad is in drie dele verdeel, en die stede van die nasies het geval. En die groot Babilon is in gedagtenis gebring voor God, om haar te gee die beker met die wyn van die grimmigheid van sy toorn.”
5. Wat het in 539 v.G.J. in eertydse Babilon gebeur, en wat van bedienaars en ander aanhangers van die godsdienste van Babilon die Grote?
5 Wat dan van mense wat lojale aanhangers bly van die godsdiensstelsels wat deur die geestelikes van Babilon die Grote bedien word? Wel, kyk wat het gebeur op daardie nag van 539 v.G.J. toe koning Belsasar en sy genooide vorste ondanks die omsingelende Meders en Perse Babilon se gode by ’n uitsonderlike fees geloof het. Die fuiwers is eerstens in kennis gestel toe hulle wonderdadige handskrif teen die banketsaal se muur gesien en die uitlegging deur Jehovah se profeet Daniël gehoor het. Met Babilon se val daardie selfde nag het die invallende oorwinnaars toe die koning en skynbaar die ander feesvierders wat valse gode geloof het om die lewe gebring (Daniël hoofstuk 5). Soortgelyke onheil wag op geestelikes en diegene wat lojaal bly aan Babilon die Grote se godsdiensstelsels.
God se bedienaars is dringend nodig
6. (a) Wat moet God in hierdie kritieke tyd vir die mensdom hê? (b) Wanneer het die Tye van die Nasies geëindig, en wat het Jesus hieromtrent gesê?
6 Niemand kan redelikerwys die feit betwis dat ons nou in die kritiekste tyd van die mensegeskiedenis sedert die wêreldvloed van Noag se dag lewe nie (2 Timotheüs 3:1-5). Dit is derhalwe noodsaaklik dat daar nou opregte bedienaars van die God van Noag moet wees. Aangesien Jehovah die mense van Noag se dag en die fuiwers by Belsasar se fees gewaarsku het, moes Hy tog sekerlik sedert 1914, toe die Eerste Wêreldoorlog uitgebreek het, ’n dringende boodskap vir die mensdom gehad het. God se knegte vestig immers sowat vier dekades lank al op ’n veelomvattende openbare skaal die aandag daarop dat daardie jaar die einde van die Tye van die Nasies kenmerk. Jesus het daaromtrent gesê: “Jerusalem sal vertrap word deur die nasies totdat die tye van die nasies vervul is.”—Lukas 21:24.
7. (a) Tot wanneer is aardse Jerusalem deur nie-Joodse nasies vertrap? (b) Waarvan het Jesus gepraat toe hy gesê het dat Jerusalem ‘deur die nasies vertrap sou word?
7 Aardse Jerusalem is sedert 1914 sowat 53 jaar lank, of tot die Sesdaagse Oorlog van 1967, steeds deur nie-Joodse nasies vertrap. Maar Jesus het skynbaar nie van die Joodse Jerusalem van vandag gepraat nie, maar van wat daardie stad tot 607 v.G.J. verteenwoordig het. En wat het dit verteenwoordig? Die Koninkryk van Jehovah God deur middel van sy gesalfde Koning van die koningshuis van Dawid!—Lukas 1:32; 1 Kronieke 29:11.
8. Aan wie sou Jehovah die koninkryk van Dawid gee, en waarom sou mense nie die voorspelde troonsbestyging kon sien nie?
8 Jesus Christus was die een aan wie Jehovah God die koninkryk van sy voorvader Dawid sou gee. Voor Pilatus as regter het Jesus gesê dat Sy Koninkryk nie van hierdie wêreld was nie, wat beteken het dat dit hemels sou wees (Johannes 18:36). Jesus se toekomstige inhuldiging in die Koninkryk aan die einde van die Tye van die Nasies sou dus logies in die onsigbare hemele plaasvind. Sy troonsbestyging sou derhalwe onsigbaar wees vir menseoë, en dit is waarom nie ons of die nie-Joodse nasies in 1914 letterlik gesien het dat hy in sy regmatige, Godgegewe Koninkryk ingehuldig is nie. Daardie nasies het beslis nie geglo dat hierdie gebeurtenis plaasgevind het nie, ten spyte van die feit dat dit sedert die sewentigerjare van die vorige eeu deur Jehovah se volk bekend gemaak is.
9. (a) Wat het die nasies gedoen omdat hulle die Koninkryksboodskap veronagsaam het? (b) Wat het nodig geword met die oog op wat die nasies in 1914 gedoen het?
9 Die nasies het die Koninkryksboodskap veronagsaam en in die noordelike herfs van 1914 in oorlog verwikkel geraak. Soos in Psalm 2:1-12 voorspel is, het hulle hulle as Jesus se vyande getoon deur te weier om die pasingehuldigde Koning te “kus” as bewys van hulle onderworpenheid en getrouheid. Dit was gevolglik nodig om Psalm 110:1, 2 ten uitvoer te bring: “Die HERE het tot my Here gespreek: Sit aan my regterhand, totdat Ek u vyande maak ’n voetbank vir u voete. U magtige septer sal die Here uitstrek uit Sion en sê: Heers te midde van u vyande.”
10. (a) Onder watter omstandighede het Jesus in 1914 begin heers? (b) Deur wie word Jehovah in die 20ste eeu verteenwoordig?
10 Joodse teenstanders het hulle vyandigheid teenoor Jesus se apostels geopenbaar toe Jesus aan God se regterhand gaan sit het om te wag totdat dit tyd was om te midde van sy vyande te begin heers (Handelinge 4:24-26). Dit was ook onder vyande dat die verheerlikte Jesus Christus aan die einde van die Tye van die Nasies in 1914 begin heers het. Dit is derhalwe onder vyande dat Jehovah in hierdie 20ste eeu, soos in die verlede, draers van sy boodskap, sy opregte bedienaars van die Koninkryk, het. Hulle is sy getuies.—Jesaja 43:10-12.
Verdediging van ons bekwaamheid as bedienaars
11. Wie trek die gesag van Jehovah se Getuies as Godgeordende Koninkryksbedienaars in twyfel?
11 Dit was aldeur nodig vir opregte, Godgeordende Koninkryksbedienaars om hulle magtiging vir die bediening te verdedig. Dit is beslis die geval met Jehovah se Getuies in hierdie 20ste eeu. Hulle bekwaamheid as behoorlik geordende bedienaars van God word in twyfel getrek. Deur wie? Veral deur gegradueerdes van die Christendom se teologiese kweekskole wat ’n ordeningsertifikaat ontvang en besoldigde geestelikes word. Hulle beskou hulleself as behoorlik opgelei en bekwaam genoeg om die uitsluitlike professionele bedienaars van die God van die Bybel te wees.
12. Watter vooraanstaande eerste-eeuse Christen se gesag is uitgedaag, en hoe moes enigiemand beskou word wat ’n ander soort evangelie bring?
12 ’n Soortgelyke situasie het in die eerste eeu G.J. bestaan. In die Romeinse provinsie Galasië het selfs die geïnspireerde skrywer van nagenoeg die helfte van die boeke van die Christelike Griekse Skrifte voor ’n verwikkeling te staan gekom wat sy bekwaamheid as ’n apostel van Jesus Christus bevraagteken het, want die juistheid van wat hy as die Christelike godsdiens geleer het, is in twyfel getrek. Hy was dus verplig om vir die Galasiërs te sê: “Ek verwonder my dat julle so gou afvallig word van hom wat julle deur die genade van Christus geroep het, na ’n ander evangelie toe, terwyl daar geen ander is nie; behalwe dat daar sommige mense is wat julle in die war bring en die evangelie van Christus wil verdraai. Maar al sou ons of ’n engel uit die hemel julle ’n evangelie verkondig in stryd met die wat ons julle verkondig het, laat hom ’n vervloeking wees! Soos ons vantevore gesê het, sê ek nou ook weer: As iemand julle ’n evangelie verkondig in stryd met die wat julle ontvang het, laat hom ’n vervloeking wees!”—Galasiërs 1:6-9.
13. Waarom moes die Galasiërs nie Paulus se gesag bevraagteken het nie?
13 Daardie skrywer, die apostel Paulus, het Christelike leringe aanvanklik weliswaar nie deur persoonlike kontak met Jesus Christus of Sy 12 apostels geleer nie. Paulus het wel later tyd saam met die apostel Petrus, of Cefas, deurgebring (Johannes 1:43; Galasiërs 1:18, 19). Maar ter verdediging van sy bekwaamheid as ’n bedienaar van die goeie nuus van God deur Christus kon Paulus vir die onbestendige Christene in Galasië sê: “Toe hulle merk die genade wat aan my gegee is, het Jakobus en Cefas en Johannes, wat as pilare geag is, aan my en Barnabas die regterhand van gemeenskap gegee, sodat ons na die heidene en hulle na die besnedenes kon gaan” (Galasiërs 2:9). Daardie Galasiërs moes hulleself dus afvra: As Jesus se apostels Petrus, Jakobus en Johannes Paulus as ’n draer van die ware goeie nuus erken het, watter grondslag het ons om sy boodskap te bevraagteken en dit te verlaat?
14. Waarom is dit nie vreemd dat Jehovah se Getuies se posisie as bedienaars in twyfel getrek word nie?
14 Maar wat van Jehovah se volk vandag? Wel, as ’n persoon soos Paulus sy bekwaamheid as ’n bedienaar van God en Christus moes verdedig, moet ons nie verbaas wees as ons, as toegewyde, gedoopte getuies van Jehovah, uitgedaag word en ons posisie as Koninkryksbedienaars moet verdedig nie. Soos in Paulus se geval bewys sodanige ongegronde uitdagings natuurlik niks nie.
Selfs Jesus is uitgedaag
15. Wie, wat hoër as die apostels was, se onderrigtingsgesag is ook bevraagteken, en aan wie het hy sy gesag toegeskryf?
15 Die Here Jesus Christus is self uitgedaag en gekonfronteer met die teensinnigheid van sy eie volk om hom as ’n gemagtigde bedienaar van God te aanvaar. Ons lees byvoorbeeld: “Toe dit al in die middel van die [Hutte]fees was, het Jesus opgegaan na die tempel en geleer. En die Jode het hulle verwonder en gesê: Hoe kom Hy aan die geleerdheid terwyl Hy geen onderwys ontvang het nie?” Jesus het daardie uitdaging moedig aanvaar en gesê: “My leer is nie myne nie, maar van Hom wat My gestuur het. As iemand gewillig is om sy wil te doen, sal hy aangaande die leer weet of dit uit God is, en of Ek uit Myself spreek. Hy wat uit homself spreek, soek sy eie eer; maar Hy wat die eer soek van die Een wat Hom gestuur het, Hy is waaragtig en daar is geen ongeregtigheid in Hom nie.”—Johannes 7:14-18.
16. Waarom het die godsdiensleiers van Judaïsme gemeen dat hulle rede het om Jesus se onderrigvermoë in twyfel te trek?
16 Die godsdiensleiers van Judaïsme het Jesus Christus maar net as ’n Galileër beskou. Hulle het natuurlik nie gedink dat hy nie kon lees nie omdat hy nie onderwys ontvang het nie, veral in ’n soort teologiese kweekskool. Jesus het immers reeds getoon dat hy die teks van die Hebreeuse Skrifte kon lees (Lukas 4:16-21). Wat vir sulke Jode van Judea en Jerusalem onaanvaarbaar was, was dat hierdie voor malige timmerman nie ’n teoloog was en onder die skrifgeleerdes, Fariseërs en Sadduseërs van hulle volk kon tel nie. Waarom sou hy hom dan in die openbaar aanmatig om te weet wat die Hebreeuse Skrifte beteken het en wat hulle toepassing is, en om met sulke gesag te praat? Dit is wat daardie Jode geestelik te doof gemaak het om die klank van die goddelike waarheid te hoor. Hulle was te trots om iets te aanvaar van ’n man wat nie aan ’n teologiese kweekskool gegradueer het nie.
‘Deur Jehovah geleer’
17. Watter Onderrigter het die Joodse godsdiensleiers in die geval van Jesus Christus misken, en watter soort leerling was Jesus?
17 Daardie wêreldwyse Jode het die Een misken wat werklik vir Jesus Christus geleer het. Jesus het sy vaardigheid as ’n onderrigter van “die allergrootste onderrigter”, Jehovah God, gekry! (Job 36:22, Today’s English Version). Toe hy van God in hierdie hoedanigheid gepraat het, het Jesus gesê: “Wanneer julle die Seun van die mens verhoog het, dan sal julle weet dat dit Ek is; en uit Myself doen Ek niks nie; maar net wat my Vader My geleer het, dit spreek Ek” (Johannes 8:28). Jesus was dus die beste leerling in die universele skool van die hoogste Onderrigter wat daar is. Dit het die Een wat hom geleer het tot eer gestrek. Geen wonder dat die Nasereners van hulle voormalige dorpenaar gesê het nie: “Waar kry Hy hierdie wysheid en kragte vandaan?”—Mattheüs 13:54.
18. (a) Watter soort onderrigter moet ons wil hê? (b) Wat het Jesus gesê van die grootste Onderrigter en diegene wat deur Hom geleer word?
18 Om die Bybel te verstaan, wil ons en moet ons die beste onderrigter moontlik hê. En daardie onderrigter is die Inspireerder van daardie onoortreflike Boek. Jesus het vir diegene wat gedurende sy aardse lewe lede van daardie Onderrigter se sigbare, aardse organisasie was, gesê: “Niemand kan na My toe kom as die Vader wat My gestuur het, hom nie trek nie; en Ek sal hom opwek in die laaste dag. Dit is geskrywe in die profete: En hulle sal almal deur God geleer wees. Elkeen dan wat dit van die Vader gehoor en geleer het, kom na My toe” (Johannes 6:44, 45). Jesus het daar aangehaal uit Jesaja 54:13 wat lui: “En al jou kinders sal deur die HERE geleer wees, en die vrede van jou kinders sal groot wees.”
19. Wie se “kinders” sou deur Jehovah geleer word?
19 Maar ons vra: Wie se “kinders sal deur die HERE geleer wees”? Daardie profetiese belofte is aan ’n figuurlike “vrou” gemaak, ’n toekomstige moeder van sekere “kinders”. Hierdie “vrou” is die een wat in Jesaja 54:1 (NAV) aangespreek word: “Jubel, onvrugbare vrou, jy wat geen kinders in die wêreld gebring het nie, jubel en juig, jy wat geen geboortepyne geken het nie, want jy, verstote vrou, gaan nou meer kinders hê as een wat getroud is, sê die Here.”
20. Wat moet toegewyde Christene in die lig van 2 Korinthiërs 13:5 aanhou doen, en hoe hou dit verband met hulle bekwaamheid as Koninkryksbedienaars?
20 Aangesien Jehovah die Een is wat hierdie “vrou” aanspreek en die Onderrig ter van haar “kinders” gaan wees, moet hy haar figuurlike Man wees, en sy moet sy hemelse gemalinorganisasie wees. Haar “kinders” is leerlinge van “die allergrootste onderrigter”. Dit is natuurlik noodsaaklik dat daardie “kinders”, Jesus se gesalfde volgelinge, en hulle metgeselle, die “groot menigte”, voortdurend die onderrig wat Jehovah voorsien, toepas (Openbaring 7:9). Dit is ongetwyfeld een manier om ag te slaan op Paulus se vermaning: “Ondersoek julself of julle in die geloof is; stel julself op die proef” (2 Korinthiërs 13:5). As toegewyde, gedoopte Christene voortgaan om dit te doen en ywerige leerlinge van die grootste Onderrigter bly, sal hulle die nodige bekwaamheid hê as Koninkryksbedienaars wat deur Jehovah gemagtig is. Ons sal vervolgens kyk hoe God se bedienaars hulle bekwaamheid bewys.
Wat sou jy sê?
◻ Hoe kan jy bewys dat Jehovah bedienaars op aarde het?
◻ Wat het die Jerusalem wat ‘deur die nasies vertrap is’, verteenwoordig?
◻ Wat moes Jesus doen omdat die nasies die Koninkryk veronagsaam het?
◻ Waarom is dit nie vreemd dat Jehovah se Getuies se posisie as bedienaars bevraagteken word nie?
◻ Wat het die Joodse godsdiensleiers wat Jesus se onderrigvermoë bevraagteken het oor die hoof gesien?
[Prent op bladsy 17]
Soos Jehovah Daniël gebruik het om fuiwers by Belsasar se fees te waarsku, het Hy vandag bedienaars om ’n dringende boodskap oor te dra
[Prent op bladsy 19]
Godsdiensleiers was te trots om selfs Jesus Christus as ’n bedienaar van God te aanvaar