Hoe ware bedienaars van God geïdentifiseer kan word
DIT het in 1948 gebeur. Twee bedienaars, getuies van Jehovah, het in ’n gehawende ou bus oor ’n stamperige pad van ’n dorp in Noord-Spanje na die Pireneë gereis. Hulle was op pad om ’n afgesonderde bedienaar te gaan besoek. Toe die bus stilhou by die bushalte naaste aan die dorp waar die bedienaar gewoon het, het hulle hom met sy donkie op hulle sien wag. Maar hulle het ook ’n buitengewone groep daar naby opgemerk—vier goed gewapende lede van die Siviele Garde en ’n priester! Terwyl die bedienaars die steil paadjie na die dorp uitgeklim het, het een van die gardemanskappe skielik sy rewolwer uitgepluk en geskreeu: “Manos arriba!” (Hande in die lug!) Die besoekers is gearresteer. Waarom? Die priester het vir die polisiemanne gesê dat die besoekers terroriste is—’n onbeskaamde leuen! Gevolglik is al drie bedienaars in die tronk gestop.
Wat bewys dit? Dat nie almal wat beweer dat hulle priesters of leraars is God se ware bedienaars is nie. Trouens, daar is dikwels ’n reuseverskil tussen ware en valse bedienaars. Wat is die basiese vereistes vir ware bedienaars?
Die vereistes vir ware bedienaars
Die basiese betekenis van die uitdrukking “om te bedien”, is “om hulp of diens te lewer”. Ware Christenbedienaars moet vaste geloof hê dat die Bybel die geïnspireerde Woord van God is (Johannes 17:17). Maar daardie basiese vereiste is nie genoeg nie. Hulle moet ook ’n goeie kennis en begrip van die Bybel hê. Hulle moet daardie kennis egter nie selfsugtig—net vir hul eie voordeel—gebruik nie. Hulle moet ook ywerige verkondigers wees van die Evangelie—die goeie nuus aangaande God se Koninkryk en die hoop op ewige lewe op ’n paradysaarde.—Johannes 17:3; Psalm 37:11, 29.
Terloops, die feit dat Jehovah se Getuies die goeie nuus van die Koninkryk nie net in Spanje nie maar dwarsdeur die wêreld verkondig, is ’n vervulling van Jesus se profesie aangaande die tyd van die einde van hierdie goddelose ou stelsel van dinge. Hy het gesê: “En hierdie evangelie van die koninkryk sal verkondig word in die hele wêreld tot ’n getuienis vir al die nasies; en dan sal die einde kom.”—Mattheüs 24:14, 33, 34.
Nog ’n basiese vereiste vir ware bedienaars is dat hulle, soos Jesus gesê het, “geen deel van die wêreld” moet wees nie; gevolglik moet hulle hul nie met die politiek bemoei nie (Johannes 15:19, NW). Hulle moet ook baie nederig, liefdevol en goedhartig wees, en altyd bereid wees om verdienstelike mense wat in nood verkeer te help.—1 Korinthiërs 13:1, 4; 1 Petrus 5:6.
Dit is ’n baie ernstige saak. Om ware en valse bedienaars te kan onderskei, is ’n saak van lewe of dood. Dit is hoe ernstig dit is! In sy bekende Bergpredikasie het Jesus gewaarsku: “Pas op vir die valse profete wat in skaapsklere na julle kom en van binne roofsugtige wolwe is.”—Mattheüs 7:15.
Ware bedienaars van God het egter nie net pligte en vereistes waaraan hulle moet voldoen nie, maar ook talle voorregte. Trouens, as ’n groep is hulle vandag die mees bevoorregte, die suksesvolste en verreweg die gelukkigste groep op aarde, soos jy in die volgende artikel sal sien.