Koninkryksverkondigers berig

God se seën duidelik in Venezuela

DIE werk van Jehovah se Getuies in Venezuela is waarlik geseën (Psalm 3:9). Gedurende 1985 het die getal verkondigers met 16 persent toegeneem vergeleke met die vorige jaar, en in Februarie 1986 was daar ’n hoogtepunt van 31 247 verkondigers van die goeie nuus. Die getal gewone pioniers het skerp gestyg tot 2 291 in Februarie, die 38ste opeenvolgende hoogtepunt! Altesaam 50 659 Bybelstudies word met belangstellendes gehou. Sommige van hierdie persone het in buitengewone omstandighede met die waarheid in aanraking gekom.

◻ ’n Jong, getroude man het ’n reputasie as vrouejagter gehad. Dinge het nie goed verloop vir hom nie. Hy was seker dat sy vrou ’n heks besoek en ’n vloek op hom laat plaas het weens sy buite-egtelike verhoudings. Hy het gevolglik ’n heks gesoek om die vloek te neutraliseer en is na ’n sekere vrou verwys. Sy het egter die Bybel saam met Jehovah se Getuies bestudeer en het haar towery laat staan. Sy het vir hom gesê dat sy hom nie kan help nie, maar sy sou hom ’n adres gee waarheen hy kon gaan om hulp te kry. Dit was die adres van die Koninkryksaal. Hy het daar opgedaag​—met lang hare, stoppelbaard en slordige klere. Hy het die vergadering so geniet dat hy daardie naweek teruggegaan het, saam met sy drie kindertjies. Hierdie keer was sy hare gesny, en hy was goed geklee en glad geskeer. Vandag is hy ’n verkondiger van die goeie nuus. Was sy vrou bly dat hy opgehou het om agter ander vroue aan te loop? Nee, sy het eerder baie vyandig geraak! Maar die veranderinge wat hy in sy lewe aangebring het, het ’n groot indruk gemaak op baie van sy vriende en die weg geopen sodat hulle ook die waarheidsboodskap kon hoor.

◻ In ’n dorp naby die Colombiaanse grens het die dorpspriester ’n veldtog teen die Getuies op tou gesit. Hy het die naam “Jehovah se Getuies” in groot, rooi letters op sy kerk se aanplakbord aangebring, met slegte propaganda teen hulle daaronder. ’n Lid van die kerk het die prominent vertoonde naam gesien en, sonder om die informasie daaronder te lees, die gevolgtrekking gemaak dat die kerk Jehovah se Getuies goedkeur. Sy het ’n vergadering van die Getuies bygewoon en gehou van wat sy gesien en gehoor het. “Trouens”, sê die berig, “die priester se veldtog het heelwat belangstelling gewek pleks van die teenoorgestelde.” Baie is nou bereid om te studeer en nader selfs die Getuies op straat om te vra wanneer hulle hulle weer gaan besoek.

◻ Dit was die kort begrafnistoespraak by die graf van ’n pasgedoopte suster wat ’n ander gesin in Venezuela met die waarheid in aanraking gebring het. ’n Majoor en sy gesin, familie van die oorledene, het aandagtig geluister na die Skriftuurlike toespraak en het die spreker daarna na hulle huis genooi om die gemelde Bybeltekste nader te ondersoek. Die gevolg? Laat die majoor antwoord:

“Ek en my vrou het albei nuuskierig geraak en besluit om die Bybel te ondersoek. Aanvanklik wou ek bewys dat ek reg gehad het om die Katolieke godsdiens aan te hang. Maar elke keer dat ek ’n punt teëgespreek het, het die broer wat die studie gehou het met die logiese, Bybelse beskouing vorendag gekom. Ek het nederig tot die besef gekom dat Jehovah se Getuies die waarheid het. Vandag is ek en my vrou getuies van Jehovah, en my kinders bestudeer die Bybel. Ek dank die enigste ware God, Jehovah, wat ek met vreugde as soldaat dien, nie met vleeslike oorlogswapens nie, maar met die wapens wat God se gees gee, volgens 2 Korinthiërs 10:4, 5.”

Ja, Jehovah het sy knegte in Venezuela ryklik geseën. Met ’n buitengewone Gedenkmaalopkoms van vier maal die getal verkondigers is daar groot potensiaal vir verdere vermeerderings in die jare wat voorlê.

[Tabel op bladsy 21]

Hoogtepunte in Venezuela gebaseer op rapport vir Februarie 1986:

31 247 verkondigers

2 291 pioniers

50 659 Bybelstudies

“Laat u seën wees oor u volk!”​—Psalm 3:9