Die groot kunstenaar—Jehovah!

“KUNSTENAARS skilder tallose sonsopgange en sonsondergange, en hulle werke word vir honderde, selfs duisende rande verkoop. Maar Jehovah God, die Groot Kunstenaar en Skepper van sonsondergange en sonsopgange, gee ons elke dag een—gratis. Die oorspronklikes is baie beter as die skilderye. Behoort dit nie ’n rede te wees waarom ons hom as die Skepper waardeer nie?” ’n Reisende opsiener van Jehovah se Getuies in Hawaii het hierdie redenasie gedurende een van sy toesprake aan ’n gemeente gebruik.

’n Ateïstiese vrou wat die Koninkryksaal vir die eerste keer besoek het, was in die gehoor. Sy het ag geslaan op die bedienaar se redenasie, maar het steeds sterk twyfelgedagtes gehad oor die bestaan van God. Maar toe sy ongeveer twee jaar later van haar werk huis toe ry, het sy in spitsuurverkeer beland. Dit het daartoe gelei dat sy ’n besonder mooi sonsondergang opgemerk het. Sy het weer aan daardie reisende opsiener se toespraak gedink.

Sy vertel: “Pleks van onsteld te wees omdat ek in die verkeer vasgevang was, het ek die pragtige sonsondergang opgemerk, en dit het my herinner aan wat die spreker gesê het oor waardering vir Jehovah God as ’n Kunstenaar en ’n Skepper. Dit het my laat dink: ‘Miskien is dit waar wat hy gesê het; dalk is daar regtig ’n Skepper.’ Ek het daaroor gedink terwyl ek huis toe gery het, en daardie aand het ek my vriend gebel wat my oorspronklik na die Koninkryksaal genooi het. Ek het die Bybel begin bestudeer, en nou aanbid ek Jehovah as my God en Skepper.”

Soos die psalmis het hierdie vrou Jehovah nie net as die Groot Kunstenaar van die skepping waardeer nie, maar het sy hom ook begin loof. Die psalmis het geskryf: “Loof die HERE uit die hemele . . . Loof Hom, son en maan, loof Hom, alle ligtende sterre! . . . Laat hulle die Naam van die HERE loof; want Hy het bevel gegee—en hulle is geskape.”—Psalm 148:1-5.