Die berugte hoer—haar vernietiging
“Halleluja, die heil en die heerlikheid en die eer en die krag aan die Here onse God! Want sy oordele is waaragtig en regverdig want Hy het die groot hoer geoordeel wat die aarde met haar hoerery verderf het, en Hy het die bloed van sy diensknegte op haar gewreek.”—OPENBARING 19:1, 2.
1. Hoe het die groot hoer met “die konings van die aarde” gehoereer, en waartoe het dit gelei?
ALLES wat ons bespreek het, is baie ernstig. Ons moet egter daarop let dat Openbaring 17:2 ook van die groot hoer se hoerery met “die konings van die aarde” praat. Hoewel sy geval het, is sy steeds deur en deur ’n vriend van die wêreld, en sy probeer wêreldheersers manipuleer om haar doelstellings te bereik (Jakobus 4:4). Hierdie geestelike hoerery, wat bestaan uit die ongeoorloofde verhouding tussen Babilon die Grote en politieke heersers, het gelei tot die ontydige dood van tienmiljoene onskuldige mense! Dit was erg genoeg dat die groot hoer betrokke was by albei kante van die stryd gedurende die Eerste Wêreldoorlog. Maar haar sondes in verband met die Tweede Wêreldoorlog reik gewis “tot aan die hemel”! (Openbaring 18:5). Waarom sê ons so?
2. (a) Hoe het Franz von Papen Adolf Hitler gehelp om die heerser van Duitsland te word, en hoe het ’n voormalige Duitse kanselier daardie pouslike ridder beskryf? (b) Watter twee klousules in die Konkordaat tussen die Nazi-staat en die Vatikaan is geheim gehou? (Kyk die voetnoot.)
2 Wel, kom ons beskou een voorbeeld. Hoe het die tiran Adolf Hitler die kanselier—en diktator—van Duitsland geword? Dit was deur die politieke gekonkel van ’n pouslike ridder wat deur die vorige Duitse kanselier, Kurt von Schleicher, beskryf is as “die soort verraaier in vergelyking met wie Judas Iskariot ’n heilige is”. Dit was Franz von Papen, wat die Katolieke Aksie en nywerheidsleiers aangespoor het om die kommunisme teen te staan en Duitsland onder Hitler te verenig. As deel van die verraad is Von Papen vise-kanselier gemaak. Hitler het ’n afvaardiging onder leiding van Von Papen na Rome gestuur om ’n konkordaat tussen die Nazi-staat en die Vatikaan te beding. Pous Pius XI het aan die Duitse gesante gesê hoe bly hy is dat “die Duitse Regering nou ’n man aan die stuur het wat onwrikbaar gekant is teen die Kommunisme”, en op 20 Julie 1933 het kardinaal Pacelli (wat eerlank pous Pius XII sou word) die konkordaat tydens ’n oordadige seremonie in die Vatikaan onderteken.a
3. (a) Wat het ’n geskiedskrywer oor die Konkordaat tussen die Nazi-staat en die Vatikaan geskryf? (b) Hoe is Franz von Papen gedurende die vieringe by die Vatikaan vereer? (c) Watter rol het Franz von Papen in die Nazi-oorname van Oostenryk gespeel?
3 Een geskiedskrywer skryf: “Die Konkordaat [met die Vatikaan] was ’n groot oorwinning vir Hitler. Dit was die eerste morele steun wat hy uit die buitewêreld ontvang het, en dit uit die mees verhewe bron.” Tydens die vieringe by die Vatikaan is Von Papen deur Pacelli vereer met ’n hoë pouslike dekorasie, die Grootkruis van die Orde van Pius.b Winston Churchill vertel in sy boek The Gathering Storm, wat in 1948 uitgegee is, hoe Von Papen “sy reputasie as ’n goeie Katoliek” verder gebruik het om kerklike steun vir die Nazi-oorname van Oostenryk te verkry. In 1938 het kardinaal Innitzer beveel dat alle Oostenrykse kerke ter ere van Hitler se verjaardag die swastikavlag hys, hulle klokke lui en gebede vir die Nazi-diktator doen.
4, 5. (a) Waarom rus daar verskriklike bloedskuld op die Vatikaan? (b) Hoe het die Duitse Katolieke biskoppe Hitler openlik gesteun?
4 Daar rus dus ’n verskriklike bloedskuld op die Vatikaan! As ’n leidende deel van Babilon die Grote het dit grootliks meegewerk om Hitler aan die bewind te plaas en hom “morele” ondersteuning te gee. Die Vatikaan het verder gegaan deur Hitler se wandade stilswyend goed te keur. Gedurende die lang dekade van Nazi-terreur het die biskop van Rome geswyg terwyl honderdduisende Katolieke soldate vir die glorie van die Nazi-regime geveg en gesterf het en terwyl miljoene ander ongelukkiges in Hitler se gaskamers vermoor is.
5 Die Duitse Katolieke biskoppe het Hitler selfs openlik gesteun. Op dieselfde dag wat Japan, destyds Duitsland se bondgenoot in die oorlog, die verrassingsaanval op Pearl Harbor gedoen het, het The New York Times hierdie berig gepubliseer: “Die Konferensie van Duitse Katolieke Biskoppe wat in Fulda vergader het, het aanbeveel dat ’n spesiale ‘oorlogsgebed’ ingevoer word wat aan die begin en einde van alle kerkdienste gelees moet word. Die gebed smeek die Voorsienigheid om Duitse leërs met oorwinning te seën en alle soldate se lewe en gesondheid te beskerm. Die biskoppe het Katolieke geestelikes verder gelas om Duitse soldate ‘op land, op see en in die lug’ ten minste een keer per maand in ’n spesiale Sondagpreek in ag te neem en te onthou.”
6. Watter groot lyding en gruweldade kon die wêreld moontlik gespaar gewees het as daar geen geestelike hoerery tussen die Vatikaan en die Nazi’s was nie?
6 As daar geen liefdesverhouding tussen die Vatikaan en die Nazi’s was nie, sou die wêreld dalk die pynlike verlies gespaar gewees het van tienmiljoene soldate en burgerlikes wat in die oorlog gedood is, van sesmiljoen Jode wat vermoor is omdat hulle nie-Aries was nie en—die kosbaarste in Jehovah se oë—van duisende van sy Getuies, lede van die gesalfdes sowel as van die “ander skape”, wat groot gruweldade moes verduur, met talle Getuies wat in die Nazikonsentrasiekampe gesterf het.—Johannes 10:10, 16.
Die hoer van naby beskou
7. Watter beskrywing gee die apostel Johannes wanneer hy die groot hoer van naby sien?
7 Hoe gepas is die visioen wat hom vervolgens in die Openbaringprofesie ontvou! In hoofstuk 17, verse 3 tot 5, sê Johannes van die engel: “En hy het my in die gees weggevoer na ’n woestyn, en ek het ’n vrou sien sit op ’n skarlakenrooi dier, vol godslasterlike name, met sewe koppe en tien horings. En die vrou was bekleed met purper en skarlaken en versierd met goud en kosbare stene en pêrels, en sy het in haar hand ’n goue beker gehad, vol van gruwels en die onreinheid van haar hoerery; en op haar voorhoof was ’n naam geskrywe: Verborgenheid, die groot Babilon [“Babilon die Grote”, NW], die moeder van die hoere en van die gruwels van die aarde.”
8. (a) Wat het die groot hoer in haar goue beker waardeur sy haarself identifiseer? (b) Hoe is Babilon die Grote in figuurlike sin “bekleed met purper en skarlaken” en versierd met “goud en kosbare stene en pêrels”?
8 Hier sien Johannes Babilon die Grote van naby. Sy hoort waarlik in daardie woestyn, tussen die wilde diere wat daarin woon. Hierdie groot hoer word duidelik geïdentifiseer deur wat sy in haar beker het, hoewel dit van buite bedrieglik kosbaar lyk. Sy drink ’n drank wat gruwelik is in God se oë. Haar vriendskap met die wêreld, haar valse leerstellings, haar morele permissiwiteit, haar flankeerdery met die politieke moondhede—nie een van hierdie dinge word deur Jehovah, “die Regter van die ganse aarde”, geduld nie (Genesis 18:22-26; Openbaring 18:21, 24). O, hoe pragtig tooi sy haar tog nie! Sy is befaamd vir haar statige katedrale met hulle imposante argitektuur en kleurvensters, haar juweelversierde pagodes en kloosters, haar eeue-oue tempels en heiligdomme. Ooreenkomstig die stilistiese modes van die groot hoer is haar priesters en monnike uitgedos in duur skarlaken-, purper- en saffraankleurige gewade.—Openbaring 17:1.
9. Watter lang geskiedenis van bloedskuld het Babilon die Grote, en hoe sluit Johannes sy beskrywing van haar gepas af?
9 Maar wat haar die laakbaarste maak, is haar bloeddorstigheid. Jehovah wag al lank om hieroor met haar of te reken! Sy het bloeddorstige diktators in hedendaagse tye gesteun, en haar afgryslike geskiedenis van bloedvergieting strek terug deur die eeue, deur die godsdiensoorloë, die Inkwisisies, die Kruistogte, ja, tot by die marteldood van sommige van die apostels en die moord van God se eie Seun, die Here Jesus Christus, en selfs verder (Handelinge 3:15; Hebreërs 11:36, 37). Voeg hierby die vermoording van Jehovah se Getuies in onlangse jare deur vuurpelotons, die galg, die byl, die guillotine en die swaard, asook die onmenslike behandeling in tronke en konsentrasiekampe. Geen wonder nie dat Johannes sy beskrywing afsluit met die woorde: “En ek het die vrou gesien, dronk van die bloed van die heiliges en van die bloed van die getuies van Jesus”!-Openbaring 17:6.
‘DIE VERBORGENHEID VAN DIE VROU EN DIE DIER’
10. (a) Hoe het die groot hoer Jehovah se Getuies tot vandag toe vervolg? (b) Watter soort leiers is die geestelikes van Babilon die Grote?
10 Johannes het hom “uitermate verwonder” oor wat hy gesien het. Vandag verwonder ons ons ook! Gedurende die dertiger- en veertigerjare het die groot hoer van Katolieke Aksie en politieke gekonkel gebruik gemaak om Jehovah se getroue Getuies te vervolg en in die ban te doen. Waar Babilon die Grote genoeg invloed kan uitoefen, gaan sy tot vandag toe voort om die werk van Jehovah se getuies, wat die glorieryke hoop van God se Koninkryk verkondig, in die wiele te ry, te beperk en verkeerd voor te stel. Deur honderdmiljoene in die groot hoer se godsdiensorganisasie gevange te hou, tree haar geestelikes as ‘blinde leiers van blindes’ op wat hierdie blinde volgelinge na die sloot van vernietiging lei. Nooit as te nimmer kan hierdie berugte hoer soos die apostel Paulus sê nie: “Daarom betuig ek aan julle . . . dat ek rein is van die bloed van almal.”—Mattheüs 15:7-9, 14; 23:13; Handelinge 20:26.
11, 12. Wat is die verborgenheid van die “skarlakenrooi dier” waarop die berugte hoer ry, en watter lig op hierdie verborgenheid het Jehovah se Getuies in 1942 ontvang?
11 Die engel het Johannes se verwondering gesien en hom gevra: “Waarom het jy jou verwonder? Ek sal jou die verborgenheid van die vrou vertel en van die dier met die sewe koppe en die tien horings, wat haar dra” (Openbaring 17:7). Wat is hierdie “dier”? Maar as 600 jaar tevore het die profeet Daniël diere in visioene gesien, en daar is aan hom verduidelik dat hierdie diere “konings”, of politieke heerskappye hier op aarde, voorstel (Daniël 7:2-8, 17; 8:2-8, 19-22). Johannes sien in hierdie visioen ’n kombinasie van sulke heerskappye—“’n skarlakenrooi dier”. Dit is die mensgemaakte Volkebond wat in 1920 op die wêreldtoneel verskyn het maar wat met die uitbreek van die Tweede Wêreldoorlog in 1939 in ’n afgrond van onbedrywigheid geval het. Maar wat is “die verborgenheid van die vrou . . . en van die dier”?
12 Deur goddelike bestiering het Jehovah se Getuies in 1942 lig op daardie verborgenheid ontvang. Die Tweede Wêreldoorlog het toe op sy ergste gewoed, en baie het gedink dat dit op Armageddon sou uitloop. Maar Jehovah het anders oor die saak gedink! Daar was nog baie werk wat sy Getuies moes doen! By hulle Nuwe Wêreld- Teokratiese Byeenkoms van 18-20 September 1942, waartydens die sleutelstad Cleveland, Ohio, met 51 ander plekke in die Verenigde State verbind was, het Nathan H. Knorr, die president van die Wagtoringgenootskap, die openbare toespraak “Vrede—Kan dit voortduur?” gehou. Daarin het hy kommentaar gelewer oor Openbaring 17:8, wat van die “skarlakenrooi dier” sê: “Die dier wat jy gesien het, was en is nie en sal uit die afgrond opkom en na die verderf vaar.” Hy het getoon hoe die Volkebond van 1920 tot 1939 “was”. Toe is die “is nie”-stadium bereik weens die Volkebond se ondergang. Maar na die Tweede Wêreldoorlog sou hierdie sindikaat van nasies uit die afgrond opkom. Is daardie Bybelse voorspelling vervul? Dit is inderdaad! In 1945 het die internasionale “dier” as die Verenigde Volke uit sy afgrond van onbedrywigheid te voorskyn gekom.
13. Hoe het Babilon die Grote haar hoeragtige weë met die VV-“dier” voortgesit?
13 Hoewel Babilon die Grote deur haar val verswak is, het sy haar hoeragtige wee met die VV-“dier” voortgesit. In Junie 1965 het ampsdraers van die sewe vernaamste vertakkings van godsdiens in die wêreld, sogenaamd Christelik en nie-Christelik, wat glo die helfte van die wêreld se bevolking verteenwoordig het, byvoorbeeld in San Francisco vergader om die VV se 20ste verjaardag te vier.c In dieselfde jaar het pous Paulus VI die VV as “die laaste hoop op harmonie en vrede” beskryf, en later het pous Johannes Paulus II die hoop uitgespreek dat “die Verenigde Volke altyd die vernaamste forum vir vrede en geregtigheid sal bly”. Gedurende 1986 was die wêreldryk van valse godsdiens die grootste ondersteuner van die VV se Internasionale Vredesjaar. Maar het daar ware vrede en veiligheid gekom in antwoord op hulle godsdiensgebede? Allermins! Lidlande van die VV toon al hoe meer dat hulle geen ware liefde vir die groot hoer koester nie.
Die hoer word vernietig
14. Watter spesiale taak het die VV-“dier” om te verrig, en hoe word dit deur God se engel beskryf?
14 Later van tyd moet die “skarlakenrooi dier” self na die verderf vaar. Maar voor dit gebeur, en selfs voor sy laaste, dierlike aanval op God se volk, het daardie VV-dier ’n spesiale taak om te verrig. Jehovah ‘gee dit in die hart van die dier en sy gemilitariseerde horings om sy bedoeling uit te voer’. Met watter gevolg? God se engel antwoord: “En die tien horings wat jy op die dier gesien het, hulle sal die hoer haat en haar verlate maak en naak, en haar vlees eet en haar met vuur verbrand.” “Sy [het] haarself verheerlik . . . en weelderig geleef”, maar nou word die bordjies verhang. Haar imposante godsdiensgeboue en ontsaglike eiendomsbesit sal haar nie red nie. Soos die engel verklaar: “Daarom sal haar plae op een dag kom: dood en droefheid en honger; en met vuur sal sy verbrand word, want sterk is die Here God wat haar oordeel.”—Openbaring 17:16, 17; 18:7, 8.
15. Hoe sal die hoer se politieke minnaars, asook handelsmagnate, op haar ondergang reageer?
15 Haar politieke minnaars sal haar ondergang betreur en sê: “Wee, wee jou, o groot stad Babilon, o sterk stad, want in een uur het jou oordeel gekom!” Handelsmagnate wat oneerlike wins met haar gemaak het, sal eweneens “ween en rou bedrywe en sê: Wee, wee . . . omdat in een uur soveel rykdom verwoes is!”-Openbaring 18:9-16.
16. Wat sal die reaksie van God se volk op die vernietiging van die groot hoer wees, en hoe bevestig Openbaring dit?
16 Maar wat sal die reaksie van God se volk wees? Hulle word almal ingesluit in die woorde van die engel: “Verbly jou oor haar, o hemel, en o heilige apostels en profete, omdat God julle oordeel aan haar voltrek het!” Met ’n vaart is Babilon die Grote neergegooi, sodat sy nooit weer Jehovah se heilige naam kan smaad nie. Die vernietiging van die groot hoer sal rede verskaf tot feesviering en oorwinningsliedere tot eer van Jehovah. As die eerste van ’n reeks lofkore sal die blye refrein weerklink: “Halleluja, die heil en die heerlikheid en die eer en die krag aan die Here onse God! Want sy oordele is waaragtig en regverdig; want Hy het die groot hoer geoordeel wat die aarde met haar hoerery verderf het, en Hy het die bloed van sy diensknegte op haar gewreek.”—Openbaring 18:20-19:3.
17. Hoe sal God se oordeelsdade volbring word nadat daar van die groot hoer ontslae geraak is?
17 God se oordeelsdade sal snel volbring word wanneer die “Koning van die konings en die Here van die here”, Christus Jesus, “die parskuip van die wyn van die grimmigheid en van die toorn van God, die Almagtige” by Armageddon trap. Daar sal hy ontslae raak van goddelose heersers en alle ander oorblywende lede van Satan se organisasie op aarde. Aasvretende voëls sal hulle karkasse verslind (Openbaring 16:14, 16; 19:11-21). Hoe bly moet ons tog nie wees dat God se bestemde tyd naby is om ons pragtige aarde van alles te reinig wat onheilig, vieslik en verderflik is nie!
18. Wat is die groot klimaks van die boek Openbaring?
18 Is dit die klimaks van die boek Openbaring? Nee, nog nie! Want wanneer die opstanding van die 144 000 na die hemel voltooi is, vind die huwelik van die Lam plaas. Sy “bruid”, wat vir haar man versier is, word in “’n nuwe hemel” ingestel, en van daar daal sy figuurlik neer as haar Bruidegom se helper in die volbrenging van Jehovah se voorneme om ‘alles nuut te maak’. Die bruid se geestelike skoonheid is die van die heilige stad, Nuwe Jerusalem, wat deur Jehovah God die Almagtige met sy heerlikheid verlig word en wat die Lam as sy lamp het (Openbaring 21:1-5, 9-11, 23). Hier bereik Openbaring dus sy groot klimaks, met Jehovah se naam geheilig, en met die Lam, Christus Jesus, tesame met sy bruid, Nuwe Jerusalem, wat die gehoorsame mensdom met die ewige lewe op die aardse Paradys seën.
19. (a) Wat is noodsaaklik vir redding buiten om uit Babilon die Grote uit te gaan? (b) Watter dringende uitnodiging is nog oop, en hoe moet ons reageer?
19 Het jy die geveinsdheid van valse godsdiens onderskei en uit Babilon die Grote uitgegaan? En het jy die verdere stap gedoen om, deur Christus Jesus, na Jehovah God te kom in heelhartige toewyding wat tot doop lei? Ook dit is noodsaaklik vir redding! Terwyl die bestemde tyd vir Jehovah se voltrekking van finale oordeel nader kom, weerklink die uitnodiging met gebiedende dringendheid: “Die Gees en die bruid sê: Kom!” Mag almal wat aan daardie oproep gehoor gee hulle lewe aan Jehovah toewy en op hulle beurt ywerig aan ander sê: “Kom!” Ja, “laat hom wat dors het, kom; en laat hom wat wil, die water van die lewe neem, verniet” (Openbaring 22:17). Die uitnodiging is nog oop. Jy sal inderdaad gelukkig wees as jy standpunt inneem as een van Jehovah se toegewyde, gedoopte knegte en as jy daardie posisie voor die troon van God en die Lam handhaaf. Die bestemde tyd is nader as wat jy dink! Ja, die groot klimaks van Openbaring is ophande!
Ter afsluiting van hierdie week se Wagtoringstudie moet die studiehouer die volgende Resolusie laat lees en dit aan die hand van die gedrukte vrae hersien. Dit is die Resolusie wat wêreldwyd by die “Goddelike Geregtigheid”-Streekbyeenkomste van Jehovah se Getuies in 1988 na afloop van die toespraak “Die berugte ‘hoer’-haar val en vernietiging” aanvaar is.
[Voetnote]
a Om verklaarbare redes is twee klousules van die Konkordaat destyds geheim gehou, aangesien hulle gehandel het oor ’n gemeenskaplike front teen die Sowjetunie en die pligte van Katolieke priesters wat diensplig in Hitler se leër moes doen. Sodanige diensplig was ’n skending van die Verdrag van Versailles (1919) wat Duitsland steeds verplig was om na te kom; die bekendmaking van hierdie klousule kon ander ondertekenaars van die Verdrag van Versailles verontrus het.
b Franz von Papen was een van die Nazi’s wat in die laat veertigerjare in Neurenberg, Duitsland, as oorlogsmisdadiger tereggestaan het. Hy is vrygespreek, maar is later ’n kwaai vonnis deur ’n Duitse denazifikasiehof opgelê. Nog later, in 1959, is hy ’n Geheime Kamerheer van die pous gemaak.
c Pous Paulus VI het die volgende kommentaar oor hierdie samekoms gelewer: “Hoe waarlik reg en gepas is dit tog dat ’n godsdienstige byeenkoms vir vrede deel uitgemaak het van die seremonies ter herdenking van die ondertekening van die Handves van die Verenigde Volke twintig jaar gelede.”
[Venster op bladsy 11]
DIE POUS SE SWYE
In sy boek Franz von Papen—His Life and Times, wat in 1939 uitgegee is, gee H. W. Blood-Ryan ’n breedvoerige beskrywing van die intriges waardeur hierdie pouslike ridder Hitler aan die bewind laat kom het en die Vatikaan se konkordaat met die Nazi’s beding het. Aangaande die verskriklike pogroms, wat onder meer teen die Jode, Jehovah se Getuies en ander gerig was, se die skrywer: “Waarom het Pacelli [pous Pius XII] stilgebly? Weens Von Papen se plan vir ’n Heilige Romeinse Ryk van Wes-Duitsers het hy ’n sterker Katolieke Kerk in die toekoms verwag, met die Vatikaan wat weer eens die leisels van wêreldlike mag in sy hand hou . . . Daardie selfde Pacelli oefen nou die mag van geestelike diktatorskap oor miljoene siele uit, en tog is feitlik niks oor Hitleriaanse aggressie en vervolging gesê nie. . . . Ek skryf hierdie woorde nadat drie dae van slagting reeds verbygegaan het en die Vatikaan nog nie ’n enkele gebed vir die siele van die stryders, waarvan ten minste die helfte Katolieke is, gedoen het nie. Hoe verskriklik gaan die vergelding tog wees wanneer hierdie manne, ontdaan van al hulle aardse invloed, voor hulle God staan, wat rekenskap gaan eis. Wat kan hulle verskoning wees? Niks nie!”
[Venster op bladsy 15]
BETROKKENHEID VAN DIE VATIKAAN
The New York Times van 6 Maart 1988 het berig dat die Vatikaan die grootste begrotingstekort van alle tye, R148,3-miljoen, vir 1988 te wagte was. Die koerant het gesê: “Een kapitaaluitgawe behels vermoedelik ’n belofte wat in 1984 gemaak is om byna [R600-miljoen] aan die krediteurs van Banco Ambrosiano te betaal. Die Vatikaan was nou verbonde aan die Milanese bank voor dit in 1982 ineengestort het.” Trouens, die Vatikaan was so diep in daardie skandaal betrokke dat hy onversetlik geweier het om drie hooggeplaaste Vatikaan-amptenare, onder andere ’n Amerikaanse aartsbiskop, aan die owerheid uit te lewer sodat hulle in Italiaanse howe verhoor kon word!
[Prente op bladsy 12]
Die Vatikaan deel ’n verskriklike bloedskuld met Von Papen en Hitler
[Erkennings]
UPI/Bettmann-nuusfoto’s
UPI/Bettmann-nuusfoto’s
[Prente op bladsy 15]
Pleks van God se Koninkryk voor te staan, het die pouse die VV as ‘die laaste hoop op vrede’ bestempel
[Erkenning]
Inlasse: VV-foto’s