Hoe die aarde van verderf gered gaan word

GOD het al eenmaal tevore in die mensegeskiedenis die aarde van verderf deur die mens gered. Hy het dit in Noag se dag deur middel van ’n wêreldvloed gedoen. Sover bekend het die mens nie destyds die fisiese omgewing verderf nie. Maar die aarde was in ’n ander opsig in so ’n mate verderf dat God dit nodig geag het om baie streng op te tree.

Die Bybel sê: “Die aarde was verdorwe voor die aangesig van God, en die aarde was vol geweld. Toe sien God die aarde aan, en—dit was verdorwe, want alle vlees het sy wandel op die aarde verderwe” (Genesis 6:4, 11, 12). Ja, in Noag se dag het God die aarde as verdorwe beskou weens die geweld en goddeloosheid van die mensdom.

Toe eertydse Israel die Beloofde Land ingeneem het, het God eweneens gewaarsku: “Julle mag die land nie ontheilig waar julle in is nie; want die bloed ontheilig die land . . . En jy mag die land . . . nie verontreinig nie” (Numeri 35:33, 34). Kanaän was derhalwe verdorwe weens die bloedskuld van sy inwoners. ’n Aaklige voorbeeld hiervan was hulle gebruik om kinders vir hulle gode te offer.

Boonop was die Kanaäniete baie onsedelik, en dit het ook God se beskouing van die land geraak. Hy het Israel gewaarsku: “Verontreinig julle nie deur al hierdie [onsedelike gebruike] nie, want deur al hierdie dinge is die heidene verontreinig wat Ek voor julle uit verdryf. So het die land dan onrein geword; en . . . die land sal sy inwoners uitspuug” (Levitikus 18:24, 25). Onsedelikheid en bloedvergieting het Kanaän in so ’n mate verderf dat God die Kanaänitiese nasies vernietig het.

Die verderwing van die aarde

Wat van vandag? Leef ons nie ook in ’n tyd van onbeheerste geweld, bloedvergieting en onsedelikheid nie? Ongeag wat die mens doen om die skade te herstel wat hy die fisiese aarde aangedoen het, hy kan nooit die sowat eenhonderdmiljoen opwek wat in hierdie eeu in sy oorloë gesterf het nie; hy kan ook nie die miljoene wat deur misdadigers vermoor is of die talle tragiese slagoffers wat van honger omkom, in die lewe terugroep nie. Hy kan beslis nie die ongeveer 40 tot 60 miljoen ongebore babas terugbring wie se lewe elke jaar deur aborsies beëindig word nie. Kan ons daaraan twyfel dat die aarde voor God se aangesig verderf word deur sulke dinge—laat staan nog deur die onsedelikheid wat vandag aan die orde van die dag is?

Gesonde verstand sê vir ons dat God binnekort moet optree om die aarde van die mens se verderflike bedrywighede te red, en Bybelprofesie bevestig dit. Maar wat sal hy doen? Die Bybel sê dat hy ‘die verderwers van die aarde sal verderf’. (Openbaring 11:18; vergelyk Mattheüs 24:3-14.) Net soos ’n verhuurder ’n vernielsugtige huurder uitsit, so sal God diegene “uitsit” wat sy pragtige skepping, die aarde, verderf.

Die Bybel sê: “Die goddelose sal uit die land uitgeroei, en die ontroues sal daaruit weggeruk word” (Spreuke 2:22). Die Bybel noem hierdie komende goddelike optrede Armageddon (Openbaring 16:16). Jesus het dit ook “groot verdrukking . . .soos daar van die begin van die wêreld af tot nou toe nie gewees het en ook nooit sal wees nie”, genoem (Mattheüs 24:21). Dit sal selfs groter as die Vloed wees.

Is dit ’n ekstremistiese of onregverdige oplossing? Nee, as die Skepper van die aarde het God die reg om te besluit wie dit sal bewoon. Hy het ook die reg om die mens aanspreeklik te hou vir sy dade. As God die mens toelaat om ongehinderd voort te gaan, sal die aarde boonop vir almal verderf word, en lewe sal onmoontlik word. Daarenteen sal God, deur die “verderwers van die aarde te verderf”, ons aardse erfenis vir waarderende mense bewaar. Die Bybel beloof: “Die opregtes sal die land bewoon, en die regskapenes daarin oorbly.”—Spreuke 2:21.

Met God se hulp het miljoene die krag gekry om hulself vlekkeloos te betoon omdat hulle wil oorbly om God se skepping te geniet. Hulle volg ook God se hoë sedelike standaarde en vermy selfs indirekte geweld en bloedskuld. Hulle is derhalwe nie verderwers van die aarde in hierdie belangrike sin nie.

’n Aarde wat van verderf gered word

Sulke mense het nou die verblydende vooruitsig om te sien hoe die aarde van sy huidige verdorwe toestand in ’n paradys omgeskep word. Selfs hulle liggame sal gereinig word, gesuiwer van die verderflike gevolge van sonde. Die laaste boek in die Bybel beskryf God se voorsiening om al hierdie dinge moontlik te maak as ’n simboliese “rivier van die water van die lewe”. Aan elke kant van die rivier “was die boom van die lewe wat twaalf maal vrugte dra en elke maand sy vrugte gee, en die blare van die boom is tot genesing van die nasies”.—Openbaring 22:1, 2.

Hierdie geïnspireerde visioen is ’n waarborg dat God die aarde en die mensdom daarop van verderf sal red. Ander profesieë gee ’n voorskou van daardie herstelde aarde. Kyk byvoorbeeld na Jesaja se poëtiese voorskou: “Die woestyn en die dor land sal bly wees, en die wildernis sal juig en bloei soos ’n narsing; dit sal lustig bloei en juig, ja, met gejuig en gejubel” (Jesaja 35:1, 2). Dan sal daar geen besoedelde seë, verwoeste bogrond of toksiese atmosfeer wees nie.

Belangriker nog, die aarde sal nie verderf word deur geweld, bloedvergieting of onsedelikheid nie. Net diegene wat God, sy standaarde en sy skepping respekteer sal daar wees (Openbaring 21:7, 8). Luister nou na die wonderlike gevolge van al hierdie dinge: “God sal al die trane van hulle oë afvee, en daar sal geen dood meer wees nie; ook droefheid en geween en moeite sal daar nie meer wees nie, want die eerste dinge het verbygegaan. . . . Kyk, Ek maak alles nuut.”—Openbaring 21:4, 5.

Wat ’n gelukkige resultaat! Hoe bly is ons tog dat God binnekort ‘die verderwers van die aarde sal verderf’! En hierdie geïnspireerde beloftes beweeg ons inderdaad om die God te dien wat die aarde van verderf sal red en dit ’n paradystuiste vir die regskape mensdom sal maak!

[Lokteks op bladsy 6]

Die Bybel sê dat God ‘die verderwers van die aarde sal verderf’.—Openbaring 11:18