Binnekort—’n Paradysaarde!

“Ons Vader in die hemele, laat u naam geheilig word. Laat u koninkryk kom. Laat u wil geskied, soos in die hemel, so ook op die aarde.”—Matteus 6:9, 10.

HIERDIE welbekende gebed, wat baie as die Onse Vader ken, gee die mensdom hoop. Hoe so?

Soos die Onse Vader toon, sal God se Koninkryk die wil van God op aarde laat geskied so seker as wat dit nou in die hemel geskied. En dit is God se wil dat die Paradys herstel word (Openbaring 21:1-5). Presies wat is God se Koninkryk, en hoe sal dit die Paradys op die aarde herstel?

’n Werklike regering

God se Koninkryk is ’n werklike regering. Enige regering het regeerders, wette en onderdane nodig om te funksioneer. Voldoen God se Koninkryk aan hierdie vereistes? Kyk na die Bybel se antwoorde op die volgende drie vrae:

Wie is die regeerders in God se Koninkryk? (Jesaja 33:22). Jehovah God het sy Seun, Jesus Christus, as die Koning van die Koninkryk aangestel (Matteus 28:18). Onder Jehovah se leiding het Jesus ’n beperkte getal persone uit “elke stam en taal en volk en nasie” gekies wat saam met hom as “konings oor die aarde” sal regeer.—Openbaring 5:9, 10.

Watter wette het God se Koninkryk ingestel wat die onderdane daarvan moet gehoorsaam? Party van die wette of gebooie vereis positiewe optrede. Jesus het die belangrikste van hierdie wette geïdentifiseer en gesê: “‘Jy moet Jehovah jou God liefhê met jou hele hart en met jou hele siel en met jou hele verstand.’ Dit is die grootste en eerste gebod. Die tweede, soortgelyk hieraan, is dit: ‘Jy moet jou naaste liefhê soos jouself.’”—Matteus 22:37-39.

Ander wette vereis dat onderdane van God se Koninkryk sekere gedrag vermy. Die Bybel bevat byvoorbeeld hierdie duidelike stelling: “Moenie julleself bedrieg nie! Niemand wat ’n onsedelike lewe lei of afgode aanbid of ontrou in die huwelik is of pervers is of wat hom soos ’n homoseksueel gedra, sal deel hê aan God se koninkryk nie. Ook sal geen dief of gierige persoon of dronkaard of enigeen wat ander vervloek en bedrieg nie.”—1 Korintiërs 6:9, 10, Contemporary English Version.

Wie is die onderdane van God se Koninkryk? Jesus het die onderdane van God se Koninkryk met skape vergelyk. Hy het gesê: “Hulle sal na my stem luister, en hulle sal een kudde onder een herder word” (Johannes 10:16). Iemand wat ’n onderdaan van God se Koninkryk wil wees, moet nie net sê dat hy die Goeie Herder, Jesus, volg nie, maar ook doen wat hy beveel. Jesus het gesê: “Nie elkeen wat vir my sê: ‘Here, Here’, sal in die koninkryk van die hemele ingaan nie, maar hy wat die wil doen van my Vader wat in die hemele is.”—Matteus 7:21.

Onderdane van God se Koninkryk gebruik en eer dus God se naam, Jehovah, net soos Jesus gedoen het (Johannes 17:26). Hulle gehoorsaam Jesus se opdrag om ander van “hierdie goeie nuus van die koninkryk” te leer (Matteus 24:14; 28:19, 20). En hulle betoon ware liefde aan mekaar.—Johannes 13:35.

‘Die verderwers van die aarde word verderf’

Huidige wêreldtoestande dui aan dat God se Koninkryk binnekort gaan optree om omvattende veranderinge op die aarde teweeg te bring. Hoe weet ons dit? Tweeduisend jaar gelede het Jesus ’n teken met verskillende fasette beskryf wat sou aandui dat “die koninkryk van God naby is” (Lukas 21:31). Soos in die vorige artikel getoon is, kan die kenmerke van hierdie teken vandag regoor die wêreld duidelik gesien word.

Wat gebeur daarna? Jesus antwoord: “Dan sal daar groot verdrukking wees soos daar sedert die begin van die wêreld tot nou toe nie plaasgevind het nie, nee, en ook nie weer sal plaasvind nie” (Matteus 24:21). Dit is nie ’n ramp wat deur mense veroorsaak word nie. Dit is eerder God wat optree “om die verderwers van die aarde te verderf” (Openbaring 11:18). Goddelose mense, wie se selfsugtige gedrag die planeet tot op die randjie van verderwing gebring het, “sal van die aarde af uitgeroei word”. Maar onberispelikes, dié wat God op aanneemlike wyse dien, “sal daarop oorbly”.—Spreuke 2:21, 22.

Jehovah God is heeltemal geregverdig om sulke drastiese stappe te doen. Waarom? Dink aan hierdie illustrasie: Stel jou voor jy besit ’n klein woonstelblok. Party van die huurders is goed gemanierd en bedagsaam; hulle betaal hulle huur en kyk goed na hulle woonstelle. Maar ander huurders versteur die rus en is selfsugtig; hulle weier om die huur te betaal en beskadig die gebou. Ten spyte van herhaalde waarskuwings hou hulle vol met hulle slegte gedrag. Wat sou jy doen? As die eienaar sou jy beslis daardie slegte huurders uitsit.

So ook het Jehovah God, as die Skepper van die aarde en alles wat daarop is, die reg om te besluit wie hy sal toelaat om die planeet te bewoon (Openbaring 4:11). Jehovah se verklaarde voorneme is om goddelose mense wat sy wil ignoreer en inbreuk maak op ander se regte, van hierdie aarde af te verwyder.—Psalm 37:9-11.

Die Paradys word herstel

God se Koninkryk in die hande van Jesus Christus sal binnekort oor die aarde regeer. Jesus het hierdie nuwe begin “die hernuwing van alle dinge” genoem (Matteus 19:28, New International Version). Hoe sal toestande dan wees? Let op die volgende Bybelbeloftes:

Psalm 46:9. “Hy laat oorloë ophou tot aan die einde van die aarde.”

Jesaja 35:1. “Die wildernis en die waterlose streek sal jubel, en die woestynvlakte sal bly wees en bloei soos die saffraan.”

Jesaja 65:21-23. “Die werk van hulle eie hande sal my uitverkorenes ten volle benut. Hulle sal nie verniet swoeg nie, en ook sal hulle nie vir ontsteltenis geboorte gee nie.”

Johannes 5:28, 29. “Die uur kom waarin almal wat in die gedenkgrafte is, [Jesus se] stem sal hoor en sal uitkom.”

Openbaring 21:4. “[God] sal elke traan van hulle oë afvee, en die dood sal daar nie meer wees nie, en ook verdriet en angsgeroep en pyn sal daar nie meer wees nie.”

Redes om te glo

Glo jy die Bybel se beloftes? Die Bybel het voorspel dat baie mense dit nie sou glo nie. Dit sê: “In die laaste dae [sal daar] spotters . . . kom . . . wat ooreenkomstig hulle eie begeertes handel en sê: ‘Waar is sy beloofde teenwoordigheid dan? Van die dag af dat ons voorvaders ontslaap het, bly alles dan net soos van die begin van die skepping af’” (2 Petrus 3:3, 4). Maar sulke spotters het dit heeltemal mis. Kyk na net vier redes waarom jy kan glo wat die Bybel sê:

(1) God het in die verlede in die aarde se aangeleenthede ingegryp. Die Vloed van Noag se dag is ’n uitstekende voorbeeld hiervan.—2 Petrus 3:5-7.

(2) God se Woord het huidige wêreldtoestande akkuraat voorspel.

(3) Alles is nie “net soos [dit] van die begin van die skepping af” was nie. Ons planeet ondervind maatskaplike, sedelike en omgewingsverval op ’n ongeëwenaarde skaal in die geskiedenis.

(4) Die “goeie nuus van die koninkryk” word vandag regoor die aarde verkondig, ’n teken dat ‘die einde binnekort sal kom’.—Matteus 24:14.

Jehovah se Getuies nooi jou om God se Woord, die Bybel, saam met hulle te studeer sodat jy meer kan leer oor die hoop op die ewige lewe onder die heerskappy van God se Koninkryk (Johannes 17:3). Ja, ’n wonderlike toekoms wag op die mensdom. Die heel beste tye is op hande! Sal jy deel van hierdie toekoms wees?

[Lokteks op bladsy 7]

Mense wat sê dat dinge feitlik dieselfde sal bly as wat dit nog altyd was, het dit heeltemal mis

[Prent op bladsy 8]

Sal jy deel van hierdie toekoms wees?