Koninkryksverkondigers berig

Jesus se skape luister na sy stem

NAMATE die predikingswerk na alle dele van die aarde uitbrei, lei Jehovah sy diensknegte deur middel van sy engele na skaapgeaardes. Hulle hoor Jesus se stem en leer om hom te dien met die ewige lewe in die vooruitsig. Jesus het in Johannes 10:27, 28 gesê: “My skape luister na my stem, en Ek ken hulle, en hulle volg My. En Ek gee hulle die ewige lewe.” Let op hoe opregtes van hart in Madagaskar na Jesus se stem geluister het.

Een van Jehovah se Getuies het die boeke Jy kan vir ewig in die paradys op aarde lewe en Jou jeug—Hoe om dit ten beste te benut vir die dokter gegee wat sy siek vader kom besoek het.

Die dokter was Protestants en erg gekant teen die Getuies, maar hy het die boek gelees en die tekste in sy eie Bybel nageslaan. Sy vrou, ’n Katoliek en ook ’n dokter, het die Jeug-boek verskeie kere gelees, want sy het gesê dit lyk of dit spesiaal vir haar geskryf is. Die Genootskap se Bybelse verduideliking van die betekenis van 1914 het albei beïndruk. Die man het in aanraking gekom met die Getuie wat hom die boeke gegee het. Die Getuie het hom Lewe—Hoe het dit hier gekom? Deur evolusie of deur die skepping? gegee en reëlings getref om hom en sy vrou te besoek en hulle vrae te beantwoord. Met sy besoek het hy ’n gereelde Bybelstudie met die egpaar en hulle drie kinders begin. Hulle begrip van die Bybel het vinnig toegeneem.

Ná die eerste studie het die hele gesin die vergaderinge in die Koninkryksaal begin bywoon en kort daarna by die Teokratiese Bedieningskool aangesluit. Die kinders se gedrag het aansienlik verbeter. Deur hulle Bybelstudie het hulle geleer dat die viering van verjaarsdae en ander godsdienstige vakansiedae nie Christelik is nie; derhalwe het hulle opgehou om dit te vier. Die man het geweier om sy bloed vir ’n familielid te skenk, hoewel die onderwerp nog nie in die Bybelstudie bespreek is nie. Spoedig het sy karateklere uit sy kas verdwyn; hy het dit na die kleremaker toe gestuur sodat klere vir sy kinders daarvan gemaak kon word. Hy het al sy tydskrifte en boeke oor horoskope verbrand. Slegs drie maande nadat hulle begin studeer het, het beide die man en sy vrou uit hulle onderskeie kerke bedank en hulle begeerte uitgespreek om aan die predikingswerk deel te neem. Nou is hulle gedoop.

◻ ’n Vrou in Thailand het na die waarheid gesoek. Hoewel sy ’n Boeddhis was, was sy nooit toegewyd aan haar godsdiens nie omdat sy te veel skynheiligheid en hebsug gesien het. Boonop was daar verskeie gebruike wat sy aanstootlik gevind het. Sy was moeg vir alles.

’n Buurvrou het toe aanbeveel dat sy die Christene probeer en het haar na ’n Pinksterkerk geneem. Tydens die diens het die vrou egter baie lus gevoel om die kerk te verlaat en huis toe te gaan weens al die lawaai, want almal het met harde stemme gebid. Dit was die laaste keer dat sy daardie kerk besoek het.

Later het sy ’n Rooms-Katolieke kerk probeer. Maar nadat sy etlike kere gegaan het, het sy agtergekom dat daar ook skynheiligheid en hebsug is, en sy het ook die luukse lewenstyl van die priester gesien. Dit het haar gewalg en sy het opgehou om soontoe te gaan. Die priester was nuuskierig oor waarom sy ophou gaan het. Toe hy die rede uitvind, het hy spottend gesê: “As jy by ’n werklik streng groep mense wil aansluit, moet jy na Jehovah se Getuies toe gaan.” Sy het gevra: “Waar is hulle?” Die priester het geantwoord: “Hulle is naby die waterwerke.” Die volgende dag het sy tevergeefs na hulle gesoek. Sy was teleurgesteld, maar het aan Jehovah se Getuies bly dink.

Eendag het sy toevallig gehoor hoe een van haar bure spottend vir ’n ander sê: “Binnekort sal jy een van Jehovah se Getuies word!” Toe die vrou dit hoor, het sy haastig na die buurman toe gegaan en gevra: “Is daar Getuies van Jehovah hier rond?” “Ja”, was die antwoord. “Van hulle gaan na die buurt toe kom om van huis tot huis te preek. Jy sal hulle uitken aan hulle skoon en netjiese kleredrag.” Daarop het sy uitgehardloop om na hulle te gaan soek. Aanvanklik het sy hulle nie gevind nie, maar toe sy terugstap na haar huis toe, het sy twee netjies geklede vroue met iemand sien gesels. Sy het hulle genader en gevra of hulle Getuies van Jehovah is. Toe hulle sê hulle is, het sy gepleit: “Kom asseblief na my huis toe. Ek wil met julle praat.”

’n Bybelstudie is begin, en ten spyte van teenkanting en spot van gesinslede het hierdie vrou begin om vergaderinge by te woon en vir haar familielede te getuig.

Jesus ken waarlik sy skape en versamel hulle in sy organisasie sodat hulle behoue kan bly en in sy nuwe wêreld van geregtigheid kan ingaan.