Koninkryksverkondigers berig

‘Gelukkig is die mens wat wysheid gevind het’

HIERDIE spreuk is waar bewys in Korea, waar daar nou meer as 71 000 gelukkige Getuies van Jehovah is (Spreuke 3:13). En dink net, 42 persent van hierdie bedienaars is in die voltydse diens! Die volgende ondervindinge sal toon dat dié wat ware wysheid nastreef gelukkig is.

’n Vrou in Poesan was 16 jaar lank in een van die Christendom se kerke. Daar het sy soveel onskriftuurlike gebruike gesien dat sy begin dink het daar kan nie ’n God wees nie. Tog kon sy nie God se bestaan ontken nie, en daarom het sy opreg tot God gebid dat sy die ware kerk sou vind, as daar so iets was. Toe het sy skielik aan Jehovah se Getuies gedink, en sy het onthou dat haar kerk hulle haat en kerkgangers teen hulle waarsku omdat die Getuies nie aan ’n Drie-eenheid, die helse vuur of ander leerstellings van die Christendom glo nie. Was hulle miskien die ware kerk? Met die hulp van ’n buurvrou het sy die Koninkryksaal opgespoor. Die volgende dag het sy ’n vergadering bygewoon.

Sy was verbaas oor die ordelikheid van die vergadering. Daar was geen fanatiese geskreeu of emosionele sang soos in haar kerk nie. Sy is aan ’n Getuie voorgestel wat bereid was om die Bybel met haar te studeer, en die eerste studie het ’n paar uur geduur omdat sy soveel vrae gehad het. Tydens die tweede studie het sy gesê dat sy uit haar kerk gaan bedank en ’n Getuie gaan word. Sy het vir die suster gesê dat sy nie meer met haar hoef te studeer nie, aangesien sy eenvoudig die vergaderinge sal bywoon. Die suster het egter vir haar getoon hoe nuttig ’n persoonlike Bybelstudie benewens vergaderingbywoning is. Sy het die voorstel aanvaar, het haar op haar studies toegelê en is later gedoop.

Nou is sy so bly dat sy die wysheid van die ware God, Jehovah, gevind het en die hoop het om vir ewig in God se nuwe wêreld te lewe.

’n Afgetrede generaal leer die waarheid

Die vrou van ’n weermaggeneraal is in 1962 gedoop. Haar man het haar aanvanklik teëgestaan, maar hy het later opgehou, en verskeie broers het van tyd tot tyd gedurende die daaropvolgende 28 jaar met hom gestudeer en sy belangstelling in die waarheid probeer wek. Hy het van die vergaderinge en byeenkomste bygewoon, maar was een van daardie mense wat nie die waarheid ernstig opgeneem het nie. In 1990 het hy en sy vrou Japan besoek, waar hulle ’n streekbyeenkoms bygewoon het. By hierdie geleentheid het hy aandagtig na die toesprake geluister—iets wat hy nie voorheen gedoen het nie. Hy was geskok toe hy hoor hoe valse godsdiens ronduit in die toesprake aan die kaak gestel word, maar dit het beslis sy oë vir die Christendom se geveinsdheid geopen. Hy was beïndruk deur die ordelikheid en geluk onder God se volk in Japan, iets wat hy ook in Korea gesien het. Toe hy terug in Korea was, het hy met ’n ernstige Bybelstudie begin en is hy uiteindelik gedoop.

Wat sou hy nou ná sy doop doen? Hy het uit sy posisie as bestuurder van ’n bekende toeristehotel bedank en by sy vrou in die voltydse pionierbediening aangesluit. Hy voel dat die gewone pionierdiens die beste manier is om te vergoed vir die 28 jaar wat hy verloor het omdat hy nie daadwerklik wou optree nie.

Hy besef nou dat die spreuk ‘gelukkig is die mens wat wysheid gevind het’ ook op hom van toepassing is!