Die suiwer taal verenig ’n groot menigte aanbidders
DIE godgegewe suiwer taal is ’n krag wat Christelike eenheid teweegbring. Bewys daarvan was duidelik vir almal wat die byeenkoms van Jehovah se Getuies van Dinsdag die 24ste tot Vrydag die 27ste Julie 1990 in Wes-Berlyn bygewoon het, want Getuies van 64 verskillende lande was teenwoordig.
Toe die “Godvrugtige Toegewydheid”-Streekbyeenkomste gedurende die somer van 1989 in Pole gehou is, het duisende afgevaardigdes van Rusland en Tsjeggo-Slowakye gekom, maar daar was net ’n paar honderd van Oos-Duitsland teenwoordig. Hoe het die wêreldsituasie tog sedertdien op politieke gebied verander! Hierdie keer het nagenoeg 30 000 afgevaardigdes van Oos-Duitsland saam met Getuies in die Olympia-stadion in Wes-Berlyn bymekaar gekom. Die byeenkoms was kenmerkend van die honderde wat gewoonlik van Donderdag tot Sondag in ander wêrelddele gehou is.
Die voorsitter het Dinsdag in sy verwelkomingsrede vertel watter rol byeenkomste sedert 1919 gespeel het om Jehovah se Getuies te help om vooruitgang te maak om die suiwer taal te praat. Hy het gesê hierdie byeenkoms sal almal wat dit bywoon, help om hulle vermoë te verbeter om die suiwer taal te praat en uit te leef. Hy het die byeenkomsgangers daaraan herinner dat Jehovah se volk deur hulle persoonsversorging en gedrag hulle vooruitgang om die suiwer taal te praat sal toon.
“’n Suiwer taal vir alle volke”
Die programrede van die byeenkoms het gepas die bogenoemde as tema gehad. Dit is gebaseer op Sefanja 3:9 (NW), waar God belowe: “Want dan sal ek volke tot ’n suiwer taal laat oorgaan sodat hulle almal die naam van Jehovah aanroep ten einde hom skouer aan skouer te dien.” Die suiwer taal behels ’n behoorlike begrip en waardering van die waarheid aangaande God en sy voornemens. Net Jehovah kan dit deur middel van sy heilige gees voorsien. Liefde vir die waarheid moet die beweegrede wees waarom die suiwer taal, wat vry van alle sedelike onreinheid is, geleer word.
Om die suiwer taal te praat behels boonop nie net dat ’n sekere woordeskat gebruik word nie. Ons lewenswyse moet eerder met ons woorde strook. Trouens, ons stemtoon, gesigsuitdrukking en gebare is ook belangrik, want hulle weerspieël ons innerlike. Ons moet ’n gereelde studieprogram hê en die gemeentelike vergaderinge gereeld bywoon om met die ontwikkelende suiwer taal by te bly.
Hoe om die suiwer taal te leer
Om die suiwer taal te leer, vereis dat ’n mens “Vorder van grondleerstellings tot rypheid”, soos ’n toespraak Dinsdagmiddag beklemtoon het. Groei is noodsaaklik as ons wil aanhou om geestelik vooruit te gaan. Dit beteken dat ons alle voorsienings vir geestelike vooruitgang ten volle moet benut en Bybelbeginsels daagliks moet toepas.
Om bedrewe te raak in die suiwer taal, moet ons “Deur Jehovah geleer” word. Dit was die titel van ’n simposium Donderdagoggend. Die eerste spreker het getoon hoe dit ‘deur Jesus se voorbeeld toegelig’ is. Dit is duidelik uit Jesus se woorde en handelinge dat hy deur Jehovah geleer is. Ons wil dus sy metode van onderrig navolg. En ons moet ons ook onderwerp soos Jesus hom altyd aan sy Vader se wil onderwerp het.
Die volgende drie sprekers het getoon hoe Jehovah ons deur middel van vergaderinge en byeenkomste leer. Ons vind baat by al vyf gemeentelike vergaderinge en moet nie een van hulle verwaarloos nie. Elke vergadering is uiters belangrik vir ons geestelike vordering. Jehovah leer ons ook deur ons kring-, en streekbyeenkomsprogramme en deur programme vir spesiale byeenkomsdae. Om by hulle almal baat te vind, moet ons aandagtig luister en dan die dinge wat ons leer, toepas.
Hierdie simposium is gevolg deur die toespraak “Maak opofferings vir persoonlike studie”. Om die tyd hiervoor te vind, moet ons ag slaan op die raad in Efesiërs 5:15, 16, naamlik om die tyd uit te koop deur minder belangrike dinge prys te gee.
’n Logiese doelwit wanneer ons die suiwer taal leer, is toewyding en doop. Hierdie waarheid is in die toespraak “Die doop van diegene wat die suiwer taal leer”, beklemtoon. Hierdie taal lei talle tot toewyding en doop. Maar ons moet daarna aanhou om Jesus se voorbeeld te volg deur die goeie nuus ywerig te verkondig, ons met die nuwe persoonlikheid te beklee en afgeskeie van die wêreld te bly.
Vaste geestelike voedsel
Byeenkomsgangers was ook bly om vaste geestelike voedsel te ontvang wat op die vervulling van profetiese dramas gebaseer is. Donderdagmiddag is twee toesprake op temas uit Esegiël se profesieë gebaseer. Die eerste, “Jehovah se hemelse strydwa ruk op”, het ’n kolossale, glorieryke, vreesaanjaende hemelse rytuig beskryf wat so vinnig soos ’n weerligstraal beweeg. Dit beeld Jehovah se hemelse organisasie af, wat deur God gery word deurdat hy dit liefdevol rig en dit gebruik om sy voornemens uit te voer. Esegiël beeld die geesgesalfde oorblyfsel af, veral sedert 1919. En veral sedert 1935 het die “groot menigte” by hulle aangesluit.—Openbaring 7:9.
Die volgende toespraak se titel was: “Hou tred met die sigbare organisasie.” Dit ly geen twyfel dat God se sigbare organisasie by sy hemelse strydwa-agtige organisasie bybly nie. Net soos Esegiël, moet Jehovah se knegte vandag hulle profetiese opdrag gehoorsaam uitvoer, ten spyte van onverskilligheid, bespotting of selfs teenkanting. Om tred te hou, lei tot seëninge nou en tot die ewige lewe in God se vinnig naderende nuwe wêreld.
Vrydagoggend is vaste geestelike voedsel ook voorsien deur middel van drie toesprake wat op Jesaja hoofstuk 28 gebaseer is. Die eerste van hierdie toesprake het op kragtige wyse getoon dat die geestelike dronkaards van eertydse Israel en Juda die geestelike dronkaards van die Christendom afbeeld. En soos Jehovah se ongunstige oordele oor eersgenoemde gekom het, so sal dit ook oor die Christendom kom.
Die volgende toespraak, getiteld “Hulle toevlug—’n leun!” het dié streng waarskuwing bevat: Net soos eertydse Juda se vertroue in Egipte ’n vergeefse skuiling was, net so sal die Christendom se verbintenis met politieke magte van ons dag vergeefs wees. Die derde toespraak oor Jesaja hoofstuk 28, “Hou aan waarsku aangaande Jehovah se ongewone werk”, is aan God se volk gerig. Wat Jehovah aan die Christendom gaan doen, kan tereg ongewoon genoem word, want dit sal as ’n algehele verrassing vir hom kom. Vandag is Jehovah ’n kroon van glorie vir die klein groepie gesalfde Christene en vir die meer as viermiljoen “ander skape” (Johannes 10:16). Die spreker het met hierdie besielende woorde afgesluit: “Mag ons ywer, vasberadenheid en lojaliteit strek tot die ewige lof van ons almagtige God, Jehovah!”
Om die suiwer taal te praat, moet ons broederliefde toon
Woensdagmiddag is die byeenkomsgangers daarop gewys dat die spreek van die suiwer taal ook beteken dat ‘wese en weduwees in hulle verdrukking in ag’ geneem moet word. Die vaderlose seuns kan gehelp word deur persoonlike opleiding te ontvang. Ons kan bedagsaam teenoor weduwees wees deur hulle met liefdevolle woorde aan te moedig, deur hulle by ons Christelike bedrywighede en gesellighede in te sluit en deur materiële hulp na verdienste te verleen indien hulle dit werklik nodig het. Onderhoude het getoon hoe hierdie dinge gedoen word.
Donderdagmiddag het ’n ander sielverkwikkende toespraak getoon “Hoe Christene vir mekaar omgee”. Jehovah se Getuies het ’n uitstekende rekord dat hulle vir mekaar omgee, veral wanneer rampe soos orkane en aardbewings voorkom, wanneer daar vir amptenare geskryf moet word of wanneer daar plaaslike behoeftes is. Maar wanneer probleme as gevolg van menslike onvolmaaktheid ontstaan, moet ons die beginsels toepas wat in Jesus se raad in Mattheüs 5:23, 24 en 18:15-17 voorkom. Veral wanneer dit by sakereëlings tussen broers kom, is wedersydse respek nodig en moet hulle versigtig wees dat nòg die werkgewer, nòg die werknemer selfsugtig misbruik maak van die geestelike verhouding.
Om die suiwer taal te praat, moet ons op ons gedrag let
Daar is herhaaldelik beklemtoon dat ons op ons gedrag moet let. Die eerste spreker Dinsdagmiddag het die tema “Hoor en bewaar die woord van God” bespreek. Hy het getoon dat daar twee hoofredes is waarom ons na byeenkomste kom: om juiste kennis in te neem en om gemotiveer te word om daardie kennis toe te pas.
Die eerste toespraak Woensdagoggend het die indringende vraag “Christus het wetteloosheid gehaat—Haat jy dit?” gestel. Dit is nie genoeg om geregtigheid lief te hê nie. Ons moet ook ongeregtigheid haat om sodoende ’n goeie gewete te hê, ’n goeie verhouding met Jehovah te behou, om nie smaad op sy naam te bring nie en nie die vrugte van wetteloosheid—korrupsie en die dood—te maai nie.
Die volgende toespraak, wat ’n noue verband met daardie tema het, se titel was: “Verwerp wêreldse fantasieë, streef Koninkrykswerklikhede na.” Satan, Eva en die gevalle engele het almal fantasieë nagejaag wat tot hulle ondergang gelei het. Wêreldse fantasieë wat uit materialistiese drome of ongeoorloofde verhoudinge bestaan, kan ontnugtering en selfs growwe sonde tot gevolg hê. Om hierdie fantasieë te weerstaan, moet ons Koninkryksrealiteite navolg deur middel van studie, gebed, vergaderingbywoning en die openbare bediening.
Om regskape te lewe as Christene, moet ons ook ag slaan op die raad wat Woensdagmiddag in die toespraak “Christene—lewe binne julle inkomste” gegee is. Versuim om dit te doen, sal seer sekerlik skadelike fisiese en geestelike gevolge hê. Die weg van wysheid is om ’n mens se selfsugtige begeertes te beteuel deur nie onnodige skuld aan te gaan nie en deur ’n realistiese begroting uit te werk en dan daarby te hou. Ons moet te alle tye goddelike toegewydheid aankweek. Saam met vergenoegdheid is dit ’n groot wins.—1 Timotheüs 6:6-8.
Die belangrikheid daarvan om op ons vriende te let, is beklemtoon in Dinsdag se toespraak “Is jou vriende Jehovah se vriende?” Ons vriende moet Christene wees wat die Christelike persoonlikheid aangekweek het en wat ywerig is in die predikingswerk. Wêreldse kennisse is nie vriende van God nie, en ons kan nie sosiaal met hulle verkeer sonder om onsself te benadeel nie. Ons moet selfs binne die gemeente selektief wees as ons werklik opbouende vriende wil hê.
Die voorafgaande raad is aanskoulik beklemtoon deur die hedendaagse drama. Die titel daarvan was: “Weerstaan die Duiwel se listige aanslae.”
Raad vir gesinne
“Ouers—Kom julle verpligtinge na!” was die Woensdag ’n tydige toespraak. Ouers moet self God se wil ken en dit so goed soos hulle kan, doen. Hulle moet ook God se Woord by hulle kinders inskerp. Bowendien is dit nie genoeg om kinders net na Christelike vergaderinge en in velddiens te neem nie. Hulle moet geleer word om Jehovah lief te hê en die praktiese wysheid daarvan insien om godvrugtige dinge te doen.
’n Simposium “Die gesin in ons dag” was volgende op die program. Die eerste spreker het getoon dat die gesin by God ontstaan het. Vaders moet goed kommunikeer aangaande geestelike dinge. Moeders moet goeie tuisteskeppers wees, en kinders moet respek vir Jehovah toon deur met hulle ouers saam te werk.
Die volgende spreker het getoon dat die gesin “deur teenstanders aangeval” word. Ekonomiese druk eis baie van gesinne. Die werkplek is vol versoekinge om verkeerd te doen, en die media is deurtrek van geweld, ongeoorloofde seks en materialisme. Onderrigting moet vroeg begin, en groot ywer is nodig om wêreldlike invloede te bowe te kom. Die teokratiese instrumente wat deur die Wagtoringgenootskap voorsien word, moet goed gebruik word.
Die volgende toespraak, wat die gesin se “Behoud tot in die nuwe wêreld” bespreek het, het die ernstige verantwoordelikheid wat ouers het, beklemtoon. Die opleiding van kinders moet met die grootste erns gedoen word. Goeie raad is gegee aangaande gesinsbybelstudies en wat om te studeer, alles met die doel om die harte van kinders te bereik. Slegs dan kan ouers en kinders hoop om as ’n gesin tot in die nuwe wêreld behoue te bly.
In die toespraak “Volhard in ’n verdeelde huisgesin” is goeie raad gegee vir ’n gesinsituasie waarin talle Getuies hulleself bevind. Diegene in sulke omstandighede is gemaan om nooit die hoop te laat vaar dat die ongelowige eendag ’n gelowige kan word nie. Bestee tyd saam met die ongelowige maat en maak seker dat jy aan alles voldoen wat van ’n Christenmaat verwag word. Jy kan hulp ontvang van die ouere manne of moontlik van ander in verdeelde huishoudings.
Praat met ander oor die suiwer taal
Daar is heel gepas baie aandag geskenk aan die feit dat ons van geleenthede gebruik moet maak om die suiwer taal vir ander te leer. Dus het die byeenkomsgangers Woensdagoggend geluister na die toespraak: “Gebruik jou kosbare tyd wyslik.” Om dit te doen moet ons prioriteite stel wat in lyn is met Mattheüs 6:33, wat sê: “Soek eers die koninkryk van God en sy geregtigheid.” Dit sluit in dat ons tyd opsysit vir persoonlike Bybelstudie, al die vergaderinge bywoon en gereeld aan die veldbediening deelneem. Dit vereis dat ons tyd uitkoop deur minder belangrike, miskien aangename aktiwiteite, prys te gee. ’n Hele paar onderhoude het getoon hoe sommige dit doen.
Ons moet nooit vergeet dat ons Jehovah se Getuies is nie. Donderdagmiddag het ’n aantal demonstrasies hierdie punt beklemtoon onder die tema “Hou aan om die suiwer taal by elke geleentheid te spreek”. Hierdie demonstrasies het getoon hoe dit gedoen kan word wanneer ons straatwerk doen, informeel getuig en die telefoon gebruik. Onselfsugtige liefde vir Jehovah God en ons naaste sal ons aanspoor om die suiwer taal by elke geleentheid te praat.
Nouverwant aan hierdie tema was die volgende toespraak “Seëninge van diegene wat hulleself nie verskoon nie”. Die wêreldwye onderrigtingsorganisasie van Jehovah se Getuies vorm ’n treffende kontras met die Christendom. Ons moet as individue alle druk, soos amptelike teenstand, algemene onverskilligheid en ekonomiese probleme die hoof bied. Demonstrasies wat op die boek Redenering uit die Skrif gebaseer is, het getoon hoe hierdie druk oorkom kan word.
Die Bybeldrama Doen God se wil met ywer het ook ywerige prediking aangemoedig. Dit het getoon hoe ywerig Jehu vir Jehovah se naam was en hoe belangrik dit vir ons is om dieselfde moed en ywer vir God se werk aan die dag lê.
Nuwe publikasies by die byeenkoms
Daar was twee besonderse publikasies wat gedurende die byeenkoms in Engels en in Duits vrygestel is. Die eerste van hierdie publikasies is vrygestel toe die toespraak “Red jou lewe met bloed—Hoe?” gehou is. Die spreker het eers vertel van die risiko’s wat met bloedoortappings gepaard gaan. Hy het daarop gewys dat daar talle alternatiewe vir bloed is om bloedverlies teë te werk. Maar Jehovah se Getuies onthou hulle nie van bloed omdat dit ongesond is nie, maar omdat die aanvaarding daarvan vir hulle onheilig is. Hulle onthou hulle, nie omdat bloed moontlik besmet kan wees nie, maar omdat dit vir God kosbaar is. Die bloed wat werklik lewensreddend is, is die losprysbloed van Jesus Christus. Die spreker het sy luisteraars ten slotte verheug toe hy die brosjure met 32 bladsye Hoe kan bloed jou lewe red? vir hulle gewys het.
’n Tweede waardevolle publikasie is vrygestel na die toespraak “Soek Jehovah, o mense”. Oor die algemeen soek mense nie na God nie. Die bestaan van talle verskillende godsdienste toon hoe mense in hulle soeke na God gedwaal het omdat hulle God se Woord geïgnoreer het. Soos ons Gedenkmaalrapporte elke jaar toon, moet miljoene gehelp word om hulle standpunt vir Jehovah in te neem. Jesaja 55:6, 7 toon dat Jehovah waarlik ’n liefdevolle en barmhartige God is, en dat hy bereid is om ‘menigvuldiglik te vergewe’. As sy Getuies het ons die suiwer taal ontvang sodat ons ander kan help om Jehovah saam met ons skouer aan skouer te dien.
Vandag staan Jehovah se volk voor ’n uitdaging weens grootskaalse bevolkingsverhuisings. As gevolg daarvan behoort mense in ons gebied waarskynlik aan verskillende godsdienste. Om Hindoes, Boeddhiste, Sjintoïste en mense van talle ander godsdienste te help, het die Genootskap die uitstekende boek met 384 bladsye Die mensdom se soeke na God voorsien. Dit sit met gesag die basiese leerstellinge van die hoofgodsdienste buite die Christendom uiteen. Maar dit ondersoek ook die geskiedenis van valse godsdiens binne die Christendom. Hierdie boek kan ons help om Bybelstudies te begin met mense wat aan verskillende godsdienste behoort.
Openbare toespraak en slotkommentaar
“Word verenig deur die suiwer taal” was die titel van Vrydag se openbare toespraak. Die spreker het getoon dat die suiwer taal ’n verenigende krag is, hoewel drieduisend verskillende tale nou eenheid in die wiele ry. Dit het Jehovah se Getuies teen Babiloniese dwalinge beskerm, dit het hulle respek vir die heiligheid van lewe en bloed geleer en het hulle gehelp om volgens Bybelbeginsels te lewe wat hulle geestelik en fisies tot voordeel strek. Almal moet die begeerte hê om die suiwer taal te leer en te praat, want net diegene wat dit doen, sal Armageddon oorleef. Ons kan nie nou nalaat om op die raad in Sefanja 2:1-3 ag te slaan nie.
Na goeie skriftuurlike raad oor hoe nodig dit is om ‘waaksaam te wees met die oog op gebede’ het die slotkommentaar gevolg wat gebaseer was op die tema “Wandel in ooreenstemming met die suiwer taal”. Die getal mense wat nou in ooreenstemming met die suiwer taal wandel, is waarlik besig om te vermeerder. En diegene wat die byeenkomste bygewoon het, het ontsag vir die suiwer taal getoon deur hulle netheid, ordelikheid en organisatoriese harmonie. Die nuwe publikasies sal al Jehovah se Getuies help om die suiwer taal op effektiewer wyse te spreek.
Die laaste byeenkomsspreker het almal herinner hoe nodig dit is om te volhard. Hy het getoon dat almal as gevolg van die byeenkoms versterk behoort te wees in hulle vasbeslotenheid om vorentoe te beweeg. Hy het toe met hierdie woorde afgesluit: “Mag ons steeds in ooreenstemming met die godgegewe suiwer taal wandel sodat ons ons liefdevolle hemelse Vader, Jehovah God, nou en immermeer, kan verheerlik!”
[Venster op bladsy 26]
Die opkomshoogtepunt by die byeenkoms in Wes-Berlyn was 44 532, en 1 018 is gedoop. Dit het die doopkandidate 19 minute geneem om uit die Olympia-stadion te loop en gedurende daardie tyd was daar aanhoudende applous. ’n Spesiale gedeelte is vir die Engelssprekende afgevaardigdes gebou. Sowat 6 000 van hulle het die volledige program in hulle eie taal gehoor. By hierdie byeenkoms was daar ook 4 500 uit Pole; gedurende twee middagure het twee lede van die Bestuursliggaam kort toesprake ter wille van hulle gehou.
[Prente op bladsy 24, 25]
1. Olympia-stadion, Wes-Berlyn
2. Gedrukte byeenkomsprogram
3. Tweehonderd busse het afgevaardigdes uit Oos-Duitsland gebring
4. Poolse byeenkomsgangers was verheug om nuwe publikasies te ontvang
5. Blomversierings het die toneel opgehelder
6. A. D. Schroeder, een van die lede van die Bestuursliggaam, op die program in Wes-Berlyn