Eer die Seun, Jehovah se Hoofbewerker
“Wie die Seun nie eer nie, eer nie die Vader wat Hom gestuur het nie.”—JOHANNES 5:23
1. Hoe doen die Christendom se geloof in die Drie-eenheid Jesus oneer aan?
DAAR is vandag baie in die Christendom wat beweer dat hulle Jesus Christus eer, maar wat presies die teenoorgestelde doen. Hoe so? Wel, baie beweer dat Jesus die almagtige God is en dat God, die Skepper van alles, aarde toe gekom het en as ’n mens gelewe en gesterf het. Hierdie bewering word vervat in die leerstelling oor die Drie-eenheid, ’n fundamentele lering van die Christendom. Maar gestel die Drie-eenheid is vals, en Jesus is inderdaad minder as en ondergeskik aan God. Sou hierdie wanvoorstelling van sy verhouding met God Jesus nie ongelukkig maak nie? Hy sou so ’n wanvoorstelling beslis as ’n oneer vir homself en sy hele leer beskou.
2. Hoe toon die Skrif duidelik dat Jesus God se mindere is en dat hy ondergeskik aan hom is?
2 Die feit van die saak is dat Jesus nooit voorgegee het dat hy God is nie, maar hy het herhaaldelik van homself gepraat as “die Seun van God”. Selfs sy vyande het dit erken (Johannes 10:36; 19:7). Dit was altyd vir Jesus belangrik om die Vader te verheerlik en om homself aan Hom te onderwerp, soos hy erken het: “Die Seun kan niks uit Homself doen tensy Hy die Vader dit sien doen nie. Want alles wat Hý doen, dit doen die Seun ook net so. Ek kan uit Myself niks doen nie . . . omdat Ek nie my wil soek nie, maar die wil van die Vader wat My gestuur het.” Later het hy gesê: “Ek ken hom, omdat Ek van Hom kom en Hy My gestuur het.” Hy het ook gesê: “Van God het ek uitgegaan en is ek hier” (Johannes 5:19, 30; 7:28, 29; 8:42, NW). Jesus het nooit eers geïnsinueer dat hy God is of gelyk aan hom is nie. Dit doen Jesus dus oneer aan as so iets geleer word.
Ander maniere waarop party Jesus oneer aandoen
3. (a) Party lede van die Christendom doen Jesus oneer aan deur wat in verband met hom te ontken? (b) Watter getuienis het Jesus oor sy voormenslike bestaan gelewer?
3 Daar is ook, vreemd genoeg, party in die Christendom wat Jesus oneer aandoen deur te sê dat hy nie ’n voormenslike bestaan gehad het nie. Maar ons kan Jesus slegs behoorlik begin eer as ons besef dat hy letterlik uit die hemel na die aarde neergedaal het. Jesus self het herhaaldelik gesê dat hy ’n voormenslike bestaan gehad het. “Niemand het opgevaar in die hemel nie”, het hy gesê, “behalwe Hy wat uit die hemel neergedaal het, naamlik die Seun van die mens.” Hy het later gesê: “Ek is die lewende brood wat uit die hemel neergedaal het. . . . Hoe dan as julle die Seun van die mens daarheen sien opvaar waar Hy tevore was?” En weer eens: “Julle is benede, Ek is van bo . . . Voorwaar, voorwaar Ek sê vir julle, voordat Abraham was, is Ek” (Johannes 3:13; 6:51, 62; 8:23, 58). Jesus het ook in sy gebed tot sy hemelse Vader op die nag toe hy verraai is van sy voormenslike bestaan gepraat.—Johannes 17:5.
4. (a) Op watter ander manier onteer baie mense Jesus? (b) Watter getuienis behoort genoeg te wees om te bevestig dat Jesus werklik gelewe het, en waarom?
4 Party in die Christendom ontken selfs dat Jesus ’n werklike persoon was, dat hy ooit as ’n mens bestaan het. As hy nie werklik bestaan het nie, sou dit geen sin hê om te bespreek waarom en hoe ons hom moet eer nie. Maar die oorvloedige getuienis van ooggetuies wat in die Skrif bewaar is, behoort genoeg bewys te wees om alle twyfel uit die weg te ruim dat Jesus werklik op aarde gelewe het (Johannes 21:25). Dit is veral waar omdat vroeë Christene dikwels hulle lewe en vryheid gewaag het om ander van Jesus te leer (Handelinge 12:1-4; Openbaring 1:9). Maar kan die bestaan van Jesus bewys word, buiten deur wat sy volgelinge oor hom geskryf het?
5, 6. Wat toon die geskiedkundige bewys, buiten die Skrif, oor die werklike bestaan van Jesus Christus?
5 The New Encyclopædia Britannica (1987) sê: “Onafhanklike verslae bewys dat selfs die teenstanders van die Christelike godsdiens in antieke tye nooit die historisiteit van Jesus betwyfel het nie.” Wat is party van hierdie onafhanklike verslae? Volgens die Joodse geleerde Joseph Klausner is daar die getuienis van die vroeë Talmoediese geskrifte (Jesus of Nazareth, bladsy 20). Daar is ook die getuienis van die eerste-eeuse Joodse geskiedskrywer Josephus. Hy beskryf byvoorbeeld die steniging van Jakobus en identifiseer hom as “die broer van Jesus wat die Christus genoem is”.—Jewish Antiquities, XX, [ix, 1].
6 Daarbenewens is daar die getuienis van vroeë Romeinse geskiedskrywers, veral dié van die gerespekteerde Tacitus. Hy het vroeg in die tweede eeu geskryf van “’n klas wat gehaat is weens hulle gruwelike dade, wat deur die volk Christene genoem is. Christus, aan wie die naam [Christen] ontleen is, is tydens die regering van Tiberius die doodstraf opgelê deur een van ons prokurators” (The Annals, XV, XLIV). Die Franse filosofiese moralis van die 18de eeu, Jean-Jacques Rousseau, het die bewys dat Jesus ’n geskiedkundige persoon was as oorweldigend beskou en het getuig: “Die geskiedenis van Sokrates, wat deur niemand in twyfel getrek word nie, is nie so goed gestaaf soos dié van Jesus Christus nie.”
Waarom ons die Seun moet eer
7. (a) Watter skriftuurlike getuienis verplig ons om Jesus Christus te eer? (b) Hoe het Jehovah sy Seun verder geëer?
7 Nou kom ons by die kwessie van eer aan Jesus Christus. Uit sy woorde in Johannes 5:22, 23 kan ons sien dat sy volgelinge verplig is om hom te eer: “Want die Vader oordeel ook niemand nie, maar het die hele oordeel aan die Seun gegee, sodat almal die Seun kan eer net soos hulle die Vader eer. Wie die Seun nie eer nie, eer nie die Vader wat Hom gestuur het nie.” Sedert Christus se opstanding het Jehovah sy Seun selfs meer geëer en ‘hom met heerlikheid en eer gekroon omdat hy die lyde van die dood deurgemaak het’ (Hebreërs 2:9; 1 Petrus 3:22). Wie Jesus is en wat hy gedoen het, is die basiese redes wat ons het om hom te eer.
8. Weens watter unieke feite omtrent Jesus Christus verdien hy om geëer te word?
8 Jesus Christus verdien eer omdat hy, as die Logos, of die Woord, Jehovah se allerbeste segsman is. Dit blyk uit die Skrif dat die benaming “die Woord” op Jesus van toepassing is voor hy aarde toe gekom het sowel as nadat hy in die hemel opgevaar het (Johannes 1:1; Openbaring 19:13). In Openbaring 3:14 praat hy van homself as “die begin van die skepping van God”. Hy is nie alleen “die Eersgeborene van die hele skepping” nie, maar is as die “eniggebore Seun” die enigste een wat direk deur Jehovah God geskep is (Kolossense 1:15; Johannes 3:16). Daarbenewens het “alle dinge . . . deur Hom ontstaan, en sonder Hom het nie een ding ontstaan wat ontstaan het nie” (Johannes 1:3). Wanneer ons derhalwe in Genesis 1:26 lees dat God gesê het: “Laat Ons mense maak na ons beeld, na ons gelykenis”, sluit daardie “Ons” die Logos, of Woord, in. Die feit dat Jesus in sy voormenslike bestaan die wonderlike voorreg gehad het om saam met Jehovah God aan die skepping deel te neem, maak dat hy beslis groot eer waardig is.
9. Waarom kom ons tot die gevolgtrekking dat Jesus die aartsengel Migael is, en hoe het Migael Jehovah geëer met betrekking tot die liggaam van Moses?
9 Jesus Christus verdien verdere eer omdat hy Jehovah se vernaamste engel, of aartsengel, is. Op grond waarvan maak ons hierdie gevolgtrekking? Wel, die voorvoegsel “aarts”, wat “vernaamste” of “eerste” beteken, beteken dat daar net een aartsengel is. God se Woord praat van hom met verwysing tot die verrese Heer Jesus Christus. Ons lees: “Die Here self sal van die hemel neerdaal met ’n geroep, met die stem van ’n aartsengel en met geklank van die basuin van God; en die wat in Christus gesterf het, sal eerste opstaan” (1 Thessalonicense 4:16). Hierdie aartsengel het ’n naam, soos ons in Judas 9 lees: “Toe Migael, die aartsengel, met die duiwel in woordestryd was oor die liggaam van Moses, het hy geen oordeel van lastering durf uitspreek nie, maar het gesê: Die Here bestraf jou!” Jesus het sodoende sy hemelse Vader geëer deur Jehovah nie vooruit te loop en ’n oordeel oor die Duiwel uit te spreek nie.
10. (a) Hoe neem Migael die leiding om ten behoewe van God se Koninkryk te veg? (b) Watter rol het Migael met betrekking tot die nasie Israel gespeel?
10 Die aartsengel Migael veg ten behoewe van God se Koninkryk en neem die leiding om die hemele van Satan en sy demonhordes te reinig (Openbaring 12:7-10). En die profeet Daniël sê dat ‘hy ten behoewe van God se volk opstaan’ (Daniël 12:1, NW). Dit lyk dus asof Migael “die Engel van God [is] wat voor die leër van Israel uit getrek het” en dat God hom gebruik het om sy volk tot in die Beloofde Land te lei. “Neem jou in ag vir Hom en luister na sy stem”, het God beveel. “Wees nie wederstrewig teen Hom nie; . . . want my Naam is in Hom” (Exodus 14:19; 23:20, 21). Jehovah se aartsengel moes ongetwyfeld ’n groot belangstelling in God se tipiese naamvolk gehad het. Hy het uiters gepas ’n ander engel, wat gestuur is om die profeet Daniël te vertroos, te hulp gesnel toe ’n magtige demon hom voorgekeer het (Daniël 10:13). Daarom kan dit ook redelik wees om aan te neem dat die engel wat Sanherib se 185 000 soldate in een nag vernietig het niemand anders as Migael die aartsengel was nie.—Jesaja 37:36.
11. Watter lewensweg wat Jesus op aarde gevolg het, maak dat hy ons eer verdien?
11 Jesus Christus verdien nie net om geëer te word weens wie hy is nie, maar hy verdien ook ons eer as gevolg van wat hy gedoen het. Hy is byvoorbeeld die enigste mens wat ’n volmaakte lewe gelei het. Adam en Eva is volmaak geskep, maar hulle volmaaktheid was kort van duur. Maar Jesus Christus het ‘lojaal, skuldeloos, afgeskeie van die sondaars’ gebly ondanks alles wat die Duiwel as versoekings en vervolging oor hom gebring het. Ondanks al hierdie dinge het hy ‘geen sonde gedoen nie, en daar is in sy mond geen bedrog gevind nie’. Hy kon sy godsdiensteenstanders tereg vra: “Wie van julle oortuig my van sonde?” Nie een van hulle kon nie! (Hebreërs 7:26, NW; 1 Petrus 2:22; Johannes 8:46). En omdat Jesus sy onkreukbaarheid sonder sonde gehandhaaf het, het hy sy hemelse Vader as die regmatige universele Soewerein geheilig en het hy bewys dat die Duiwel ’n lae en gemene leuenaar is.—Spreuke 27:11.
12. (a) Watter soort mens was Jesus, en wat het hy ter wille van ander gedoen en gely? (b) Waarom sou jy sê dat Jesus ons eer verdien as gevolg van wat hy gedoen en wat hy gely het?
12 Jesus Christus verdien ons eer, nie net omdat hy ’n volmaakte, sondelose lewe gelei het nie, maar ook omdat hy ’n goeie man, ’n onselfsugtige, selfopofferende man, was. (Vergelyk Romeine 5:7.) Hy het in die geestelike en fisiese behoeftes van die mense voorsien sonder om moeg te word. Watter ywer het hy tog vir sy Vader se huis aan die dag gelê, en watter geduld het hy teenoor sy dissipels betoon! Watter lyding was hy bereid om te verduur om sy Vader se wil te doen! Die Bybel sê van sy ondervinding in die tuin van Getsemane: “Toe Hy in ’n sware stryd kom, het Hy met groter inspanning gebid, en sy sweet het geword soos bloeddruppels wat op die grond val.” Ja, hy het “gebede en smekinge met sterk geroep en trane . . . geoffer” (Lukas 22:44; Hebreërs 5:7). Hoe akkuraat het die profeet Jesaja tog sy beproewing in Jesaja 53:3-7 voorspel!
13. Watter goeie voorbeeld het Jesus vir ons gestel wat eer aan sy hemelse Vader betref?
13 Jesus verdien ook ons eer vir die goeie voorbeeld wat hy in die verering van sy hemelse Vader vir ons gestel het. Hy kon tereg sê: “Ek eer my Vader” (Johannes 8:49). Hy het te alle tye Jehovah God deur sy woorde en dade geëer. Daarom sê die Bybelverslag dat, toe Jesus ’n man genees het, die mense nie Jesus nie, maar “God verheerlik” het (Markus 2:12). Daarom kon Jesus aan die einde van sy aardse bediening tereg in gebed tot sy hemelse Vader sê: “Ek het U verheerlik op die aarde. Die werk wat U My gegee het om te doen, het Ek volbring.”—Johannes 17:4.
Wat hy vir ons gedoen het
14. Wat het Jesus se dood vir ons bereik wat maak dat hy ons eer verdien?
14 En in watter mate verdien Jesus Christus tog ons eer vir alles wat hy vir ons gedoen het! Hy het vir ons sondes gesterf sodat ons met Jehovah God versoen kan word. Jesus het van homself gesê: “Die Seun van die mens [het] nie gekom . . . om gedien te word nie, maar om te dien en sy lewe te gee as ’n losprys vir baie” (Mattheüs 20:28). Derhalwe het sy dood alles moontlik gemaak wat die Koninkryk vir ons as mense gaan bewerkstellig: onsterflike lewe in die hemele vir die 144 000 wat sy bruid uitmaak en die ewige lewe op ’n paradysaarde vir miljoene ander wat hulle geloof en gehoorsaamheid onder beproewing bewys.—Psalm 37:29; Openbaring 14:1-3; 21:3, 4.
15. Wat is een voorbeeld van hoe Jesus sy Vader se persoonlikheid aan ons geopenbaar het?
15 Jesus Christus verdien ook eer omdat hy, as die Groot Onderwyser, sy Vader se wil en persoonlikheid volmaak aan ons geopenbaar het. In sy Bergpredikasie het hy byvoorbeeld na sy Vader se ruimhartigheid verwys omdat hy sonskyn en reën vir goeie sowel as slegte mense voorsien en gesê: “Wees julle dan volmaak soos julle Vader in die hemele volmaak is.”—Mattheüs 5:44-48.
16. Hoe het die apostel Paulus Jesus se eerwaardige weg opgesom?
16 Die apostel Paulus het Jesus se eerwaardige handelwyse opgesom toe hy geskryf het: “Alhoewel hy in God se gedaante bestaan het, [het hy] geen gewelddadige inbesitneming oorweeg, naamlik om aan God gelyk te wees nie. Nee, maar hy het homself ontledig en die gedaante van ’n slaaf aangeneem en het aan die mense gelyk geword. Meer nog, toe hy hom in die hoedanigheid van ’n mens bevind, het hy homself verneder en gehoorsaam geword tot die dood, ja, die dood aan ’n folterpaal.”—Filippense 2:5-8, NW.
Hoe ons die Seun kan eer
17, 18. Op watter maniere kan ons Jesus Christus eer?
17 Aangesien Jesus Christus sonder twyfel waardig is dat ons hom eer, kom die vraag nou by ons op: Hoe kan ons die Seun eer? Ons doen dit deur geloof in sy losprysofferande te beoefen, en ons lewer blyk van daardie geloof deur die nodige stappe van berou, bekering, toewyding en doop te doen. Deur in Jesus se naam tot Jehovah in gebed te nader, eer ons Jesus. Ons eer hom ook wanneer ons ag slaan op sy woorde: “As iemand agter My aan wil kom, moet hy homself verloën en sy kruis opneem en My volg” (Mattheüs 16:24). Ons eer Jesus Christus wanneer ons ag slaan op sy instruksies om God se Koninkryk en sy geregtigheid eerste te soek, en ons eer hom wanneer ons gehoor gee aan sy gebod om die werk te doen om dissipels te maak. Ons eer Jesus ook wanneer ons die broederliefde aan die dag lê wat hy gesê het al sy volgelinge sou kenmerk.—Mattheüs 6:33; 28:19; Johannes 13:34, 35.
18 Daarbenewens eer ons die Seun as ons sy naam dra deur onsself Christene te noem, en dan deur ons goeie gedrag daardie naam gestand te doen (Handelinge 11:26; 1 Petrus 2:11, 12). Die apostel Petrus het gesê dat ons Jesus se voetstappe noukeurig moet navolg (1 Petrus 2:21). As ons hom sodoende in al ons weë navolg, eer ons hom ook. En wanneer ons elke jaar die herdenking van Christus se dood vier, bewys ons hom spesiale eer.—1 Korinthiërs 11:23-26.
19, 20. (a) Watter belonings belowe Jesus vir sy volgelinge as hulle hom nou en in die toekoms eer? (b) Watter vertroue kan ons hê met betrekking tot die Seun?
19 Watter beloning belowe Jesus vir sy dissipels as hulle ’n weg volg wat hom eer? Hy het gesê: “Voorwaar Ek sê vir julle, daar is niemand wat huis of broers of susters of vader of moeder of vrou of kinders of grond ter wille van My en van die evangelie verlaat het nie, of hy ontvang nou in hierdie tyd honderd maal soveel: huise en broers en susters en moeders en kinders en grond, saam met vervolginge, en in die eeu wat kom, die ewige lewe.”—Markus 10:29, 30.
20 Daaruit volg dat Jesus sal toesien dat ons beloon word as ons ter wille van hom opofferinge maak. Jesus verseker ons: “Elkeen dan wat My sal bely voor die mense, hom sal Ek ook bely voor my Vader wat in die hemele is” (Mattheüs 10:32). Ons kan seker wees dat, net soos die hemelse Vader dié eer wat hom eer, Jehovah se eniggebore Seun sy Vader in hierdie aspek sal navolg, soos die Seun op ander gebiede doen.
Hoe sou jy antwoord?
◻ Hoe doen baie lede van die Christendom die Seun oneer aan?
◻ Watter getuienis het Jesus van sy voormenslike bestaan gegee?
◻ Wat is party redes wat ons het om Jesus te eer?
◻ Wat is party maniere waarop ons Jesus kan eer?
◻ Watter voordele hou dit in as ons Jesus Christus eer?