‘Pessiektes op verskillende plekke’
PESSIEKTES waarvan die gelyke nog nooit gesien is nie, is ’n kenmerk wat voorspel is as deel van “die teken van [Jesus Christus se] koms en van die voleinding van die wêreld” (Mattheüs 24:3). Die Evangelieskrywer Lukas voeg ’n besonderheid by wat nie in die verslae van Mattheüs en Markus genoem word nie (Mattheüs, hoofstukke 24 en 25; Markus, hoofstuk 13). Epidemies en verwoestende siektes sou gedurende die laaste dae “op verskillende plekke” uitbreek (Lukas 1:3; 21:11). Waar sou sulke siektes vandaan kom?
“Wetenskaplikes weet van etlike virusse wat in die trope skuil en wat—met ’n bietjie hulp van die natuur—veel groter lewensverlies kan veroorsaak as wat die vigs-epidemie waarskynlik tot gevolg sal hê”, sê die tydskrif Science News. “Al word daar geen virusse meer in die wêreld ontdek nie, sê navorsers, is daar reeds genoeg ‘virusvuurkrag’ om groot dele van die aarde se bevolking uit te wis.”
Wat virusse in ons tyd so gevaarlik maak, is die aarde se toenemende bevolking en die groter behoeftes van ’n oorlaaide wêreld. “Die geskiedenis toon dat lewensgevaarlike virusepidemies dikwels gevolg het wanneer mense in onverkende terrein inbeweeg het of wanneer stedelike lewenstoestande op maniere verswak het wat nuwe gashere vir virusse aantrek”, sê Science News. Wanneer mense hulle in gebiede vestig waar virusse volop is maar wat voorheen ontoeganklik was, volg daar dikwels nuwe virusepidemies. Dit gebeur ook wanneer insekte algemener voorkom namate wêreldwye klimaatpatrone verander. “Daarbenewens”, sê die tydskrif, “het moderne mediese prosedures soos oortappings en oorplantings virusse nuwe maniere gegee om tussen menslike gashere oorgedra te word. ’n Verskeidenheid maatskaplike en gedragsveranderinge, wat wissel van wêreldreise wat deur ryk en beroemde mense onderneem word tot die gemeenskaplike gebruik van naalde deur dwelmslawe, het ook ’n bydrae hiertoe gelewer.”
“Die onlangse geskiedenis bied duidelike voorbeelde van kleiner virusepidemies wat veel groter epidemies in die toekoms kan voorafgaan”, voeg die artikel by. Voorbeelde is: die voorheen onbekende Marburgvirus, ’n dodelike tropiese virus wat tientalle wetenskaplikes in Wes-Duitsland gedurende die laat sestigerjare geteister het; die virus wat Sinkdalkoors veroorsaak en wat in 1977 miljoene mense in Egipte besmet en duisende gedood het; die tropiese Ebolavirus wat in 1976 meer as duisend mense in Zaïre en die Soedan besmet en sowat 500 gedood het, waarvan baie dokters en verpleegsters was wat die slagoffers behandel het.
Ons word selde vooraf gewaarsku teen vernietigende virusepidemies. “’n Besonder kwaadaardige mutasie van mensegriep het byvoorbeeld in 1918 reg rondom die aarde versprei en die dood van nagenoeg 20 miljoen mense veroorsaak”, sê Science News. “In onlangser jare het die verskyning onder mense van ’n virus wat waarskynlik vroeër net onder ape in Afrika voorgekom het die wêreld weer onverhoeds betrap. Volgens skattings van die Wêreldgesondheidsorganisasie is 5 miljoen tot 10 miljoen mense in 149 lande nou met die vigs-virus besmet. Maar ondanks al die aandag wat hierdie jongste pessiekte getrek het, vrees baie viroloë dat skrikwekkender dinge op ons wag.”
Hoe ontstellend pessiektes ook al is, is hulle, saam met kenmerke soos oorloë, hongersnode en groot aardbewings, ’n deel van die saamgestelde teken van Jesus se teenwoordigheid in Koninkryksheerlikheid (Markus 13:8; Lukas 21:10, 11). Hierdie dinge gee ons ook ’n rede tot vreugde, want Lukas voeg hierdie woorde van Jesus by: “As hierdie dinge begin gebeur, kyk dan na bo en hef julle hoofde op, omdat julle verlossing naby is.”—Lukas 21:28.