Onthou jy?

Het jy dit geniet om die onlangse nommers van Die Wagtoring te lees? Wel, kyk of jy die volgende vrae kan beantwoord:

▫ Die bykomende diensvoorregte wat die Netinim en die kinders van die dienaars van Salomo ontvang het nadat hulle uit Babiloniese ballingskap teruggekeer het, kan ’n gepaste afbeelding waarvan wees?

Vandag word die oorblyfsel van geestelike Israel op aarde al hoe minder terwyl die ander skape al hoe meer word. Van hierdie skaapgeaardes het nou, net soos die Netinim en die kinders van die dienaars van Salomo, gewigtige verantwoordelikhede onder die toesig van die oorblyfsel ontvang (Jesaja 61:5).—4/15, bladsye 16-17.

▫ Wat het die profeet Sefanja bedoel toe hy gesê het: “Miskien sal julle verborge bly op die dag van die toorn van die HERE”? (Sefanja 2:2, 3).

Dit is nie ’n geval van eenmaal gered, altyd gered vir iemand wat gedurende die komende “groot verdrukking” beskerming wil geniet nie (Mattheüs 24:13, 21). As ’n mens op daardie dag verborge wil bly, moet jy drie dinge aanhou doen: Jy moet Jehovah soek, geregtigheid soek en ootmoedigheid soek.—5/1, bladsye 15-16.

▫ In watter sin ‘staan’ Migael ‘op’ in “die tyd van die einde”? (Daniël 12:1, 4, vgl. NW).

Sedert hy in 1914 as Koning aangestel is, “staan” Migael reeds ten behoewe van Jehovah se volk. Maar binnekort gaan Migael in ’n baie spesiale sin “opstaan”—as Jehovah se Werktuig om alle goddeloosheid van die aarde af te verwyder en as die Verlosser van God se volk.—5/1, bladsy 17.

▫ Waarvan hang ware geluk af?

Ware geluk hang af van ons kosbare verhouding met Jehovah, sy goedkeuring en sy seën (Spreuke 10:22). Daarom kan ware geluk net gevind word as ’n mens gehoorsaam is aan Jehovah en jou met vreugde aan sy wil onderwerp (Lukas 11:28).—5/15, bladsye 16, 19.

▫ Moes ’n sieke destyds toe Jesus sy genesingswonderwerke gedoen het, geloof hê om genesing te ontvang?

Om na Jesus toe te kon kom om genees te word, moes baie ’n mate van geloof gehad het (Mattheüs 8:13). Maar Jesus het geen geloofsbelydenis van hulle verwag voordat hy sy wonderwerke verrig het nie, soos ons sien in die geval van ’n lam man wat hy genees het en wat nie eers geweet het wie Jesus was nie (Johannes 5:5-13). Jesus het selfs die afgekapte oor genees van die hoëpriester se slaaf wat onder ’n groep vyande van Jesus was (Lukas 22:50, 51). Hierdie wonderwerke is gedoen deur middel van die krag van God se heilige gees, nie vanweë die sieke se geloof nie.—6/1, bladsy 3.

▫ Wat word afgebeeld deur die “sleepnet” waarvan Jesus in sy gelykenis in Mattheüs 13:47-50, (NW), gepraat het?

Die “sleepnet” stel ’n aardse werktuig voor wat bely dat hulle God se gemeente is en wat die “vis” bymekaar maak. Dit het die Christendom sowel as die gemeente van gesalfde Christene ingesluit, en laasgenoemde het onder die leiding van die engele en in ooreenstemming met Mattheüs 13:49 aangehou om die ‘goeie vis’ bymekaar te maak.—6/15, bladsy 20.

▫ Wat is van die beginsels wat regters in Israel in die uitvoering van hulle pligte moes toepas?

Gelyke geregtigheid vir ryk en arm, streng onpartydigheid en geen aanvaarding van omkoopgeskenke nie (Levitikus 19:15; Deuteronomium 16:19).—7/1, bladsy 13.

▫ Wat moet ouere manne deur middel van regterlike verhore probeer bereik?

Een doel is om die feite van die saak vas te stel, en hulle moet dit in liefde doen. As hulle die feite ken, moet die ouere manne doen wat nodig is om die gemeente te beskerm en om Jehovah se hoë standaarde binne die gemeente te handhaaf sodat die vrye vloei van God se gees na die gemeente nie belemmer word nie. Die doel van die verhoor is ook om ’n oortreder wat in gevaar verkeer, te red, indien dit enigsins moontlik is. (Vergelyk Lukas 15:8-10.)—7/1, bladsye 18-19.

▫ Waarom is fantasieë oor ongeoorloofde geslagsomgang so skadelik?

Met die oog op wat Jesus in Mattheüs 5:27, 28 gesê het, pleeg almal wat hulle voortdurend aan sulke fantasieë oor ongeoorloofde geslagsomgang oorgee in hulle hart egbreuk. En daar bestaan die wesenlike gevaar dat sulke fantasieë tot onsedelikheid kan lei.—7/15, bladsy 15.

▫ Op watter maniere kan Jehovah ons help om ons beproewinge in die regte lig te beskou sodat ons hulle kan verduur?

Tekste kan deur medegelowiges of gedurende ’n Bybelstudie onder ons aandag gebring word. Aangeleenthede kan deur die bestiering van God só gerig word dat ons kan sien wat ons moet doen. Engele kan help om ons te lei, of ons kan leiding deur die heilige gees ontvang (Hebreërs 1:14).—7/15, bladsy 21.

▫ Het die Konsilie van Nicea in 325 G.J. die Drie-eenheidsleer ingevoer of bevestig?

Nee, die Konsilie van Nicea het net die Seun aan die Vader gelykgestel deur te sê dat hulle “van een substansie” is. Die gedagte dat die Vader, Seun en heilige gees elkeen die ware God is—’n drie-enige God—is nie deur daardie konsilie of deur die vroeëre Kerkvaders ontwikkel nie.—8/1, bladsy 20.

▫ Was Job die enigste mens gedurende sy lewe wat aan Jehovah getrou was? (Job 1:8).

Nee, die boek Job toon self dat Elihu vir God aanneemlik was. Gedurende Job se lewe was daar ook baie Israeliete wat in Egipte gewoon het, en daar bestaan geen rede om te dink dat hulle almal ontrou en onaanneemlik vir God was nie.—8/1, bladsy 31.