Verwerp wêreldse fantasieë, streef Koninkrykswerklikhede na
“Maar soek eers die koninkryk van God en sy geregtigheid, en al hierdie dinge sal vir julle bygevoeg word.”—MATTHEÜS 6:33.
1. Watter waarskuwing gee God se Woord aangaande die figuurlike hart, en wat is een van die vernaamste maniere waarop ons hart ons mislei?
“BEWAAK jou hart meer as alles wat bewaar moet word, want daaruit is die oorspronge van die lewe” (Spreuke 4:23). Waarom was dit vir wyse koning Salomo nodig om hierdie waarskuwing te rig? Omdat ‘die hart bedrieglik is bo alle dinge, ja, verdorwe is’ (Jeremia 17:9). Een van die vernaamste maniere waarop ons figuurlike hart ons kan mislei, is as ons toelaat dat ons hart ons beweeg om ons aan wêreldse fantasieë oor te gee. Maar wat is fantasieë? Dit is onrealistiese verbeeldingsvlugte, dagdrome, nuttelose gedagtebeelde. Wanneer hierdie dagdrome wêreldse fantasieë word, is hulle nie net ’n verkwisting van tyd nie, maar ook baie skadelik. Ons moet hulle derhalwe heeltemal verwerp. Trouens, as ons wetteloosheid haat soos Jesus dit gehaat het, sal ons daarteen waak dat ons hart hom aan wêreldse fantasieë oorgee.—Hebreërs 1:8, 9.
2. Wat is wêreldse fantasieë, en waarom moet ons dit verwerp?
2 Maar wat is wêreldse fantasieë? Dit is fantasieë wat kenmerkend is van hierdie wêreld wat in Satan se mag lê. Die apostel Johannes het daaroor geskryf: “Alles wat in die wêreld is—die begeerlikheid van die vlees en die begeerlikheid van die oë en die grootsheid van die lewe—is nie uit die Vader nie, maar is uit die wêreld” (1 Johannes 2:16; 5:19). Waarom moet Christene wêreldse fantasieë verwerp? Omdat sulke fantasieë selfsugtige begeertes in die verstand en hart verwek. As ’n mens oor verkeerde dinge dagdroom, kan dit inderdaad ’n repetisie in die persoon se verstand wees van iets wat hy werklik sal doen. Die dissipel Jakobus waarsku ons: “Elkeen word versoek as hy deur sy eie begeerlikheid weggesleep en verlok word. Daarna, as die begeerlikheid ontvang het, baar dit sonde; en as die sonde tot volle ontwikkeling gekom het, bring dit die dood voort.”—Jakobus 1:14, 15.
Waarskuwende voorbeelde
3. Wie se geval voorsien die belangrikste waarskuwende voorbeeld van hoe skadelik selfsugtige fantasieë is?
3 Kom ons beskou voorbeelde wat toon waarom wêreldse fantasieë verwerp moet word. Die geval van Satan die Duiwel voorsien die belangrikste voorbeeld van hoe skadelik dit kan wees as ’n mens jou aan wêreldse fantasieë oorgee. Hy het toegelaat dat verwaandheid in so ’n mate in sy hart posvat dat hy Jehovah se unieke posisie as die Universele Soewerein begeer het en aanbid wou word (Lukas 4:5-8). ’n Onrealistiese fantasie? Dit was beslis! Dit sal sonder twyfel bewys word wanneer Satan duisend jaar lank gebind gaan word en veral wanneer hy in “die poel van vuur”, die tweede dood, gewerp gaan word.—Openbaring 20:1-3, 10.
4. Hoe het Satan Eva mislei?
4 Ons het nog ’n waarskuwende voorbeeld ten opsigte van die eerste vrou, Eva. In Satan se pogings om sy ambisie te verwesenlik, het hy Eva verlei deur by haar die fantasie te laat posvat dat as sy van die verbode vrug eet sy nie sou sterf nie, maar soos God sou word deur goed en kwaad te ken. Was daardie fantasie onrealisties, selfsugtig? Dit was beslis, soos ons kan sien uit die feit dat Jehovah Eva en haar man, Adam, veroordeel het toe hy hof gehou het. Hulle het gevolglik die reg om in die Paradys te lewe vir hulleself en vir al hulle onvolmaakte nakomelinge verloor.—Genesis 3:1-19; Romeine 5:12.
5. Wat het tot die val van sekere engeleseuns van God gelei, en met watter gevolg vir hulle?
5 Ons het ook die waarskuwende voorbeeld van sekere engeleseuns van God (Genesis 6:1-4). Pleks van tevrede te wees met die seëninge wat hulle in die hemelse teenwoordigheid van Jehovah geniet het, het hulle gefantaseer oor vroue op die aarde en hoe aangenaam dit sal wees om met hulle geslagsomgang te hê. Omdat die ongehoorsame engele volgens hulle fantasieë gehandel het, is hulle nou beperk tot die geestelike duisternis van Tartarus waar hulle op hulle vernietiging aan die einde van die Duisendjarige Heerskappy van Jesus Christus wag.—2 Petrus 2:4, vgl. NW; Judas 6; Openbaring 20:10.
Verwerp wêreldse fantasieë
6, 7. Waarom is wêreldse fantasieë oor materiële rykdom skadelik en misleidend?
6 Kom ons beskou nou een van die algemeenste en gevaarlikste fantasieë wat deur Satan bevorder word. Ons word deur alle vorme van die media in die versoeking gebring om ons aan wêreldse fantasieë oor te gee. Dit word dikwels veroorsaak deur ’n begeerte na rykdom. Daar is op sigself niks daarmee verkeerd om ryk te wees nie. Godvrugtige Abraham, Job en koning Dawid was baie ryk, maar hulle het nie materiële rykdom begeer nie. Materialistiese fantasieë beweeg mense om jare lank te swoeg om ryk te word. Sulke fantasieë gee ook daartoe aanleiding dat hulle hulle aan allerhande soorte dobbelary oorgee, soos om op perde te wed en loterykaartjies te koop. Ons moenie enige illusies oor rykdom koester nie. As ons dink dat materiële rykdom vir ons sekuriteit sal gee, moet ons hierdie realistiese spreuk in gedagte hou: “Goed bring geen voordeel op die dag van die grimmigheid nie, maar geregtigheid red van die dood” (Spreuke 11:4). Materiële rykdom sal ’n mens beslis nie help om die “groot verdrukking” te oorleef nie.—Mattheüs 24:21; Openbaring 7:9, 14.
7 Materiële rykdom kan ons maklik mislei. Dit is waarom daar vir ons gesê word: “Die goed van die ryke is sy sterk stad en soos ’n steil muur in sy verbeelding” (Spreuke 18:11). Ja, net “in sy verbeelding”, want ten tye van wegholinflasie, ekonomiese ineenstorting, politieke onrus of terminale siekte bied materiële rykdom min beskerming. Jesus Christus het gewaarsku teen die dwaasheid om ons vertroue in materiële rykdom te stel (Lukas 12:13-21). Ons het ook die apostel Paulus se waarskuwingswoorde: “Die geldgierigheid is ’n wortel van alle euwels; en omdat sommige dit begeer, het hulle afgedwaal van die geloof en hulleself met baie smarte deurboor.”—1 Timotheüs 6:10.
8. Hoe algemeen kom wêreldse fantasieë van ’n seksuele aard voor, en watter gevare hou hulle in?
8 Ander fantasieë hou verband met ongeoorloofde geslagsomgang. Die mate waarin die sondige menslike natuur daarvan hou om hom in geslagsfantasieë te verlustig, kan gesien word aan die gewildheid van die smerighede wat beskikbaar is deur sekere telefoonnommers te skakel en na pornografiese boodskappe te luister. Pornografiese telefoondienste is ’n onderneming met ’n omset van miljarde dollars in die Verenigde State. Sal ons nie skynheilig wees as dit net lyk of ons rein Christene is terwyl ons ons verlustig in gedagtes oor ongeoorloofde geslagsomgang nie? En bestaan die gevaar nie dat sulke fantasieë tot onsedelike geslagsgemeenskap kan lei nie? Dit het al gebeur en het daartoe gelei dat sommige uit die Christengemeente gesit is omdat hulle hoerery of egbreuk gepleeg het. Met die oog op Jesus se woorde in Mattheüs 5:27, 28 kan ons ons afvra of almal wat hulle voortdurend aan sulke fantasieë oorgee dan nie daaraan skuldig is dat hulle egbreuk in hulle hart pleeg nie.
9. Watter goeie raad bevat die Skrif om ons teen wêreldse fantasieë te waarsku?
9 As ons die neiging van ons sondige hart om hom in sulke fantasieë te verlustig, wil teëwerk, moet ons Paulus se waarskuwing in gedagte hou: “Daar is geen skepsel onsigbaar voor [God] nie, maar alles is oop en bloot voor die oë van Hom met wie ons te doen het” (Hebreërs 4:13). Ons moet te alle tye soos Moses wil wees, wat ‘volgehou het soos een wat die Onsienlike sien’ (Hebreërs 11:27). Ja, ons moet onsself voortdurend daaraan herinner dat wêreldse fantasieë Jehovah mishaag en ons net skade kan berokken. Ons moet daarna strewe om al die vrugte van God se gees aan te kweek, veral selfbeheersing, want as ons in die vlees saai, sal ons beslis uit die vlees verderf maai.—Galasiërs 5:22; 6:7, 8.
Die werklikhede van die Koninkryk
10, 11. (a) Watter feite toon dat die Skepper werklik bestaan? (b) Watter bewys is daar dat die Bybel werklik God se Woord is? (c) Watter bewyse bestaan daar oor die werklikheid van die Koning van God se Koninkryk?
10 Die beste manier om wêreldse fantasieë te verwerp, is om Koninkrykswerklikhede na te streef. Die werklikhede van die Koninkryk wat deur God ingestel is, is in skerp teenstelling met wêreldse fantasieë. Is God ’n werklikheid? Sy bestaan kan nie betwyfel word nie. Die sigbare skepping getuig daarvan (Romeine 1:20). Ons word herinner aan wat meer as honderd jaar gelede gesê is in die boek The Divine Plan of the Ages, wat deur die Wagtoringgenootskap uitgegee is. Dit het gesê: “Hy wat met ’n teleskoop na die hemel kan kyk, of selfs net met die blote oog daarna kan kyk, en die grootsheid van die skepping, die simmetrie, skoonheid, orde, harmonie en verskeidenheid daar sien en nogtans twyfel dat die Skepper van hierdie dinge verreweg sy meerdere is wat wysheid sowel as krag betref of wat enigsins kan dink dat sulke orde toevallig, sonder ’n Skepper, ontstaan het, het sy redeneervermoë tot so ’n groot mate verloor of geïgnoreer dat hy beskou kan word as ’n dwaas (iemand wat rede ignoreer of kortkom), soos die Bybel hom tereg noem.”—Psalm 14:1.
11 Ons leer alles oor die Koninkryk in die Heilige Bybel. Is die Bybel werklik die geskrewe Woord van God? Dit is baie beslis, soos gesien kan word aan sy harmonie, sy wetenskaplike akkuraatheid en sy krag om mense se lewe te verander en veral in die vervulling van sy profesieë.a Wat van die Koning van God se Koninkryk, Jesus Christus? Het hy werklik bestaan? Die Evangelieverslae en die goddelik geïnspireerde briewe van die Christelike Griekse Geskrifte getuig ondubbelsinnig en op kragtige wyse van die historisiteit van Jesus Christus. Wat Jesus se historisiteit betref, is daar ook die getuienis van die Joodse Talmoed, wat na hom as ’n persoon verwys. Die getuienis van die Joodse en Romeinse geskiedskrywers van die eerste eeu G.J. doen dit eweneens.
12, 13. Watter feite getuig van die werklikheid van God se Koninkryk?
12 Wat van die werklikheid van die Koninkryk self? Dit word grootliks deur die Christendom geïgnoreer, soos hierdie klagte van ’n vooraanstaande Presbiteriaan toon: “Dit is beslis meer as dertig jaar dat ek laas geluister het na ’n predikant wat probeer het om vir sy mense te verduidelik dat die Koninkryk ’n werklikheid is.” Tog is die heiliging van Jehovah se naam deur middel van die Koninkryk die tema van sy Woord. God het self die eerste Koninkryksbelofte gedoen en gesê: “Ek sal vyandskap stel tussen jou en die vrou, en tussen jou saad en haar saad. Hý sal jou die kop vermorsel, en jý sal hom in die hakskeen byt” (Genesis 3:15). Die Koninkryk is deur die nasie Israel afgebeeld, veral tydens koning Salomo se heerskappy (Psalm 72). Die Koninkryk was ook die tema van Jesus se prediking (Mattheüs 4:17). Hy het dit in baie van sy illustrasies beklemtoon, soos dié in Mattheüs hoofstuk 13. Jesus het vir ons gesê om om die Koninkryk te bid en om dit eers te soek (Mattheüs 6:9, 10, 33). Trouens, daar word byna 150 keer van God se Koninkryk in die Christelike Griekse Geskrifte melding gemaak.
13 Die Koninkryk is ’n werklike regering met mag en gesag, en dit sal alle gepaste verwagtinge vervul. Dit het ’n reeks wette wat in die Bybel aangetref word. Die Koninkryk het reeds baie dinge verwesenlik. Dit het lojale onderdane—meer as 4 000 000 Getuies van Jehovah. Hulle verkondig die goeie nuus van God se Koninkryk in 211 lande ter vervulling van Mattheüs 24:14. Gedurende hulle 1991-diensjaar het hulle 951 870 021 ure daaraan bestee om die Koninkryksboodskap te verkondig. Hierdie bedrywigheid bring tasbare, blywende resultate terwyl menigtes die “suiwer taal” van Bybelwaarheid leer.—Sefanja 3:9, NW.
Streef Koninkrykswerklikhede na
14. Hoe kan ons ons waardering vir die werklikheid van die Koninkryk vergroot?
14 Hoe kan ons dan Koninkrykswerklikhede nastreef? Ons hoop moet stewig op sterk oortuiging gegrond wees. God se beloofde nuwe wêreld moet vir ons ’n werklikheid wees (2 Petrus 3:13). En ons moet geloof hê in die belofte dat God ‘al die trane van ons oë sal afvee, en dat daar geen dood meer sal wees nie; ook droefheid en geween en moeite sal daar nie meer wees nie’ (Openbaring 21:4). Hoe kan ons seker wees dat dit nie ’n fantasie is nie? Dit sal beslis op God se bestemde tyd verwesenlik word, want dit is vir hom onmoontlik om te lieg (Titus 1:1, 2; Hebreërs 6:18). Ons moet oor daardie beloftes peins. Dit is nie ’n onrealistiese fantasie om onsself in God se nuwe wêreld te sien terwyl ons die seëninge daarvan geniet nie, maar dit is ’n blyk van geloof. Soos Paulus dit omskryf het, is geloof “die versekerde verwagting van dinge waarop daar gehoop word, die duidelike demonstrasie van werklikhede wat egter nie gesien word nie” (Hebreërs 11:1, NW). Laat ons ons geloof versterk deur ons gereeld te voed met God se Woord en Christenpublikasies wat ons help om dit te verstaan en toe te pas. En hoe meer tyd ons daaraan bestee om ander van die Koninkryk te vertel, formeel en informeel, hoe sterker maak ons ons geloof en hoe duideliker word ons hoop ten opsigte daarvan.
15. Watter verpligting het ons met betrekking tot die Christelike bediening?
15 Ons moet ook in harmonie met Koninkrykswerklikhede optree deur die gehalte van ons bediening te verbeter. Hoe kan ons dit doen, aangesien daar nog baie is wat gedoen moet word? (Mattheüs 9:37, 38). Die gesegde dat ’n mens nooit te oud is om te leer nie, is waar. Ons kan verbeter, ongeag hoeveel jare ons al aan die getuieniswerk deelneem. As ons bekwamer word in die wyse waarop ons God se Woord gebruik, sal dit ons in staat stel om ander beter te help om die stem van die Koning, Jesus Christus, te hoor. (Vergelyk Johannes 10:16.) As ons in ag neem dat mense se ewige toekoms op die spel is, sal ons ons gebied deegliker wil dek sodat ons hulle herhaaldelik die geleentheid kan gee om te toon waar hulle staan, as “skape” of as “bokke” (Mattheüs 25:31-46). Dit beteken natuurlik dat ons noukeurige verslae moet hou van diegene wat nie tuis is nie en veral van diegene wat in die Koninkryksboodskap belangstel.
Hou aan om die Koninkryk na te streef
16. Wie het ’n goeie voorbeeld gestel wat die nastrewing van Koninkrykswerklikhede betref, en hoe “gryp” hulle die Koninkryk?
16 Ywerige inspanning is nodig om aan te hou om Koninkrykswerklikhede na te streef. Word ons nie aangemoedig deur die voorbeeld van die oorblywende gesalfde Christene nie? Hulle streef Koninkrykswerklikhede al dekades lank na. Hierdie strewe na Koninkrykswerklikhede is in Jesus se woorde beskryf: “Van die dae van Johannes die Doper af tot nou toe word die koninkryk van die hemele bestorm, en bestormers gryp dit met geweld” (Mattheüs 11:12). Die gedagte hier is nie dat vyande die Koninkryk met geweld oorneem nie. Dit slaan eerder op die bedrywigheid van diegene wat in aanmerking kom vir die Koninkryk. Een Bybelkenner het gesê: “Dit beskryf daardie ywerige, onweerstaanbare strewe na en stryd om die komende Messiaanse koninkryk.” Die gesalfdes het geen moeite ontsien om die Koninkryk hulle eie te maak nie. Die “ander skape” moet hulle eweneens kragtig inspan om te kan kwalifiseer as aardse onderdane van God se hemelse Koninkryk.—Johannes 10:16.
17. Wat sal die lot wees van diegene wat wêreldse fantasieë nastreef?
17 Ons lewe waarlik in ’n tyd van spesiale geleenthede. Diegene wat wêreldse fantasieë nastreef, sal eendag van die wrede werklikheid bewus word. Hulle lot word goed weergegee met hierdie woorde: “Soos ’n hongerige droom dat hy eet, maar hy word wakker en—sy siel is leeg; en soos ’n dorstige droom dat hy drink, maar hy word wakker en—hy is moeg en sy siel versmag” (Jesaja 29:8). Die fantasieë van die wêreld sal beslis niemand ooit tevrede en gelukkig maak nie.
18. Watter weg moet ons nastreef met die oog op die werklikheid van die Koninkryk, en met watter vooruitsig?
18 Jehovah se Koninkryk is ’n werklikheid. Dit regeer inderdaad reeds, terwyl ’n naderende, permanente vernietiging hierdie goddelose stelsel van dinge in die gesig staar. Laat ons dus Paulus se raad ter harte neem: “Laat ons dan nie slaap soos die ander nie, maar laat ons waak en nugter wees” (1 Thessalonicense 5:6). Mag ons ons hart en verstand op Koninkrykswerklikhede gevestig hou en sodoende ewige seëninge geniet. En mag ons die Koning van daardie Koninkryk hoor sê: “Kom, julle geseëndes van my Vader, beërf die koninkryk wat vir julle berei is van die grondlegging van die wêreld af.”—Mattheüs 25:34.
[Voetnoot]
a Sien die boek Die Bybel—God se woord of die mens s’n?, wat deur die Watchtower Bible and Tract Society of New York, Inc., uitgegee word.
Hoe sal jy antwoord?
◻ Wat is wêreldse fantasieë, en waarom moet ons hulle verwerp?
◻ Watter voorbeelde toon hoe dwaas dit is om jou aan wêreldse fantasieë oor te gee?
◻ Watter feite bewys dat die Skepper, sy geskrewe Woord, Jesus Christus en die Koninkryk werklik bestaan?
◻ Hoe kan ons ons geloof in Koninkrykswerklikhede versterk?
[Prente op bladsy 15]
Wêreldse fantasieë ontstaan dikwels vanweë ’n begeerte na materiële rykdom
[Prent op bladsy 16]
Die verkondiging van die goeie nuus is een manier waarop Koninkrykswerklikhede nagestreef kan word
[Prent op bladsy 17]
Streef jy Koninkrykswerklikhede na deur God se Woord ywerig te bestudeer?