Op soek na betroubare voorspellings
“HY WAT sake drie dae vooruit kan sien, sal duisende jare lank ryk wees.” So sê ’n Chinese spreuk.
Mense wil weet wat die toekoms inhou, en talle sal met graagte baie betaal vir betroubare inligting daaroor. Hulle soek na betroubare voorspellings. Soos gesien kan word uit weervoorspellings en ekonomiese aanwysers stel ons belang in toekomstige gebeurtenisse. As ons betroubare kennis van die toekoms het, sal ons ook ons lewe kan beplan en reël.
’n Begeerte om te weet wat die toekoms inhou, spoor baie aan om fortuinvertellers, ghoeroes, astroloë en toordokters te raadpleeg. Boekwinkels en tydskrifrakke is vol antieke en moderne geskrifte van diegene wat beweer dat hulle die toekoms voorspel. Maar hierdie vorme van voorspelling gaan met skeptisisme gepaard. Die Romeinse staatsman Cato het na bewering gesê: ‘Ek is verbaas dat ’n waarsêer nie elke keer lag wanneer hy ’n ander waarsêer sien nie.’
Daar is natuurlik baie soorte voorspellings. In 1972 het ’n internasionale groep akademici en sakemanne wat as die Klub van Rome bekend gestaan het ’n studie gepubliseer waarin voorspel is dat die wêreld se nie-hernieubare hulpbronne binnekort uitgeput sal wees. Dit sou teen 1981 sonder goud wees, teen 1985 sonder kwik, teen 1990 sonder sink, teen 1992 sonder petroleum, ensovoorts. Ons sien nou dat hierdie voorspellings nie bewaarheid is nie.
Baie voorspellings is op godsdienstige oortuiging gegrond. Ter toeligting: Die Saksiese biskop Wulfstan het geglo dat die Deense inval van Engeland vroeg in die 11de eeu ’n teken was dat die wêreld se einde naby is. In 1525 was Thomas Münzer die leier van ’n opstand deur Duitse plattelanders omdat hy in ’n visioen gesien het dat die engele sekels slyp vir wat hy gedink het ’n groot oes sou wees. Dit is duidelik dat hierdie voorspellings verkeerd was.
Jy weet moontlik dat die Bybel voorspellings bevat. Bybelskrywers het boonop beweer dat hulle deur God geïnspireer is. Die Christenapostel Petrus het gesê: “Geen profesie van die Skrif [is] ’n saak van eie uitlegging nie; want geen profesie is ooit deur die wil van ’n mens voortgebring nie, maar, deur die Heilige Gees gedrywe, het die heilige mense van God gespreek.”—2 Petrus 1:20, 21.
Die Bybel het onder andere verskeie ontwikkelinge voorspel wat die geslag sou kenmerk wat die teenwoordigheid van Jesus Christus in hemelse Koninkryksmag sou ervaar. Ongeëwenaarde oorlogvoering, hongersnood, aardbewings en die ineenstorting van die mens se sedelike standaarde sou die kenmerk wees van wat die Bybel as “die laaste dae” beskryf (2 Timotheüs 3:1-5; Mattheüs 24:3-14, 34). Volgens die Bybel sal die wegruiming van die teenswoordige stelsel van dinge die weg baan vir die mensdom se geluk in ’n nuwe wêreld van eindelose seëninge.—2 Petrus 3:13; Openbaring 21:1-4.
Hoe beskou jy sulke Bybelvoorspellings? Is hulle soos baie ander voorspellings bloot gissings? Ons kan die betroubaarheid van Bybelprofesieë wat nog nie vervul is nie, toets deur vas te stel of die Bybel se voorspellings aangaande gebeurtenisse in die verlede betroubaar was. Ons sal in die volgende artikel ’n paar van hulle ondersoek.
[Foto-erkenning op bladsy 3]
Courtesy National Weather Service