’n Wêreld sonder diewe

DIT het so vinnig gebeur. Voor Antônioa se huis in Sao Paulo, Brasilië, het ’n goed geklede man ’n pistool teen Antônio se kop gedruk, die sleutels en sy motor se dokumente geëis en vinnig weggejaag.

In Rio de Janeiro is Paulo voor sy tienjarige dogtertjie deur vier goed gewapende mans oorrompel. Toe het die rowers na sy huis gery, ingegaan, en alles gesteel wat hulle wou en Paulo se twee motors daarmee vol gepak. Hulle het Paulo se vrou met die dood gedreig en haar en ’n werknemer as gyselaars na Paulo se juwelierswinkel in die middestad geneem waar hulle dit van alles gestroop het wat waardevol was. Maar die diewe het later onverwags gebel en gesê waar hulle die motors gelaat het.

Hoe ontstellend is dit tog om van swaar verdiende geld en besittings beroof te word! Hoewel nie Antônio of Paulo die wet in eie hande geneem het nie, doen ander dit wel. Hulle laat die dief dalk duur betaal of dalk verloor hulle hulle eie lewe. Toe ’n jeugdige byvoorbeeld haar horlosie gegryp het, het ’n verontwaardigde Brasiliaanse vrou ’n rewolwer uit haar sak gepluk en die dief doodgeskiet. Die gevolg? O Estado de S. Paulo berig: “Ooggetuies van die voorval het met lof van die onbekende vrou se optrede gepraat, en niemand wou die polisie help om haar te identifiseer nie.” Hoewel hulle reikhalsend na ’n wêreld sonder diewe uitsien, neem Christene nie weerwraak soos daardie vrou gedoen het nie. Aangesien die wraak God toekom, slaan hulle ag op die woorde in Spreuke 24:19, 20: “Vererg jou nie oor die kwaaddoeners nie, wees nie afgunstig op die goddelose nie. Want die kwaaddoener het geen toekoms nie.”

Maar wat kan jy doen as jy aangeval word? ’n Voorval in Rio de Janeiro toon hoe belangrik dit is om kalm te bly. ’n Christen, Heloísa, was per bus op pad na waar sy ’n Bybelstudie moes gaan hou. Twee mans het die passasiers begin beroof. Toe hulle die bushalte bereik het waar sy moes afklim, het Heloísa vir hulle gesê dat sy een van Jehovah se Getuies is en dat sy ’n Bybelstudie gaan hou. Sy het hulle haar Bybel en studiehulp gewys. Sonder om haar te beroof, het die diewe haar toestemming gegee om af te klim. ’n Ander passasier is egter nie toegelaat om af te klim nie. Die bestuurder het later gesê dat hy nog nooit so iets gesien het nie.

Regina het ook kalm gebly toe sy deur twee gewapende mans beveel is om in haar motor te klim. Regina het haar persoonlike eksemplaar van die Ontwaak! vir hulle gewys en ’n getuienis gegee. Aangesien die rowers senuweeagtig was, het sy hulle gevra om die paneelkassie oop te maak waar sy lekkergoed gehou het. Maar toe hulle die Kingdom Melodies-kassette sien, het hulle na die musiek begin luister. Die atmosfeer was nou vriendeliker en die rowers het besluit om Regina ongedeerd op die hoofweg te laat en het haar verseker dat sy ’n goedhartige persoon sou vind om haar te help. Nadat sy tien minute lank geloop het, het sy by ’n huis uitgekom, maar die huisbewoner kon dit nie glo toe sy hom van haar ondervinding vertel het nie en het gesê: “Jy lyk nie asof jy aangeval is nie; jy is so kalm.”

Hoewel ’n slagoffer fisies ongedeerd mag wees, kan so ’n senutergende ondervinding ernstige gevolge hê. ‘Die slagoffer kan onseker begin voel, haatlik begin optree teenoor gesinslede of diegene wat hom probeer help, ander begin wantrou, behep raak met die organisering van besonderhede en van mening wees dat die wêreld onregverdig is’, berig O Estado de S. Paulo. In teenstelling hiermee is daar ’n groter kans dat ’n slagoffer wat op Jehovah God vertrou geen fisiese en emosionele letsels ná so ’n ondervinding sal oorhou nie. Maar sal jy nie saamstem dat dit ’n seën sal wees as daar nie meer misdaad of enigiets is wat vrees veroorsaak nie?

“Laat die een wat steel, nie meer steel nie”

Hoewel baie hulle hebsugtige lewenswyse verkies, het God se Woord diewe gehelp om hulle begeertes en persoonlikhede te verander (Efesiërs 4:23). Omdat hulle ’n werklike, Bybelse doel in die lewe het, neem hulle hierdie woorde ter harte: “Liewer ’n bietjie met geregtigheid, as ’n menigte van inkomste met onreg” (Spreuke 16:8). Cláudio vertel: “Feitlik al my familielede is Getuies, maar ek het nooit geluister na wat hulle oor Jehovah en sy voornemens gesê het nie. Terwyl ek met ’n terugreis byna [2 000 kilometer] in ’n gesteelde bakkie gery het, moes ek deur verskeie polisieversperrings gaan. Tydens die rit het ek besef dat ek my lewe sou moes verander. Ek het dit al vantevore probeer, maar kon dit nooit regkry nie. Hierdie keer het ek aan my familielede begin dink wat Jehovah se Getuies is en aan hoe anders hulle is, hoe vreugdevol en gelukkig hulle is en hoeveel vrede hulle geniet.” Cláudio het gevolglik God se Woord begin bestudeer, dwelmmiddels en sy voormalige vriende opgegee en ’n Christenbedienaar geword.

Ander slaan ook nou ag op die woorde: “Vertrou nie op verdrukking en bou geen ydele hoop op rowery nie” (Psalm 62:11). Nadat José, ’n dwelmslaaf en -handelaar, tronkstraf uitgedien het vir poging tot moord tydens ’n rooftog het hy baat gevind by ’n Bybelstudie wat sy swaer met hom gehou het. Hy het dwelmmiddels opgegee en is nou ’n ywerige Getuie.

Maar ’n nuwe persoonlikheid is nie iets wat oombliklik of wonderdadig verskyn nie. Oscar, wat diep betrokke was by dwelmmiddels en diefstal, sê: “Ek het so vurig tot Jehovah gebid dat dit soms gelyk het of die vloer in ’n dam water verander het van al my trane.” Ja, benewens ’n ywerige studie van God se Woord is volgehoue, hartgrondige gebed noodsaaklik. Let op die wysheid van hierdie biddende beskouing: “Gee my nie armoede of rykdom nie, laat my geniet die brood wat vir my bestem is; dat ek nie, as ek oorversadig geword het, U verloën nie, en sê: Wie is die HERE? En dat ek nie, as ek arm geword het, steel en my aan die naam van my God vergryp nie.”—Spreuke 30:8, 9.

Selfsug moet met opregte liefde vervang word: “Laat die een wat steel, nie meer steel nie; maar laat hom liewer arbei deur met sy hande te werk wat goed is, sodat hy iets kan hê om mee te deel aan die een wat gebrek het” (Efesiërs 4:28). Soos in die geval van sommige eerste-eeuse Christene wat voorheen “diewe of gierigaards” was, vergewe Jehovah uit barmhartigheid en deur die losprys van Jesus Christus diegene wat berou het (1 Korinthiërs 6:9-11). Hoe bemoedigend is dit tog dat ons ongeag ons verlede ons lewenswyse kan verander en God se guns kan geniet!—Johannes 3:16.

Veiligheid in God se nuwe wêreld

Stel jou ’n aarde sonder diewe voor. ’n Mens sal nie ’n duur wetstoepassingstelsel van regters, prokureurs, polisiemanne en tronke hoef te hê nie! Dit sal ’n voorspoedige wêreld wees waar elkeen die lewe en besittings van ander sal respekteer! Klink dit ongelooflik? Sal God werklik in menseaangeleenthede ingryp en ’n einde aan wetteloosheid maak? Ons nooi jou om die bewyse te ondersoek dat die Bybel die Woord van God is en dat die profesieë daarin betroubaar is. Jy sal ’n vaste grondslag vind wat jou die vertroue sal gee dat ’n verandering op hande is. Niemand kan keer dat God die verligting bring wat aan almal belowe word wat geregtigheid liefhet nie: “Wees nie toornig op die kwaaddoeners nie, beny hulle nie wat onreg doen nie; want soos gras sal hulle gou verwelk, en soos groen grasspruitjies sal hulle verdroog” (Psalm 37:1, 2). Daardie woorde wat lank gelede geskryf is, gaan binnekort ten volle vervul word.

God se Koninkryk gaan ’n einde maak aan die ellende en ongeregtigheid wat soveel wanhoop en onsekerheid veroorsaak. Niemand sal behoeftig wees en onder druk verkeer om te steel nie. Ons word in dié profesie verseker: “Mag daar volheid van koring wees in die land, op die top van die berge; mag die vrug daarvan ruis soos die [eertydse] Libanon; en mag hulle bloei uit die stad soos die plante van die aarde!” (Psalm 72:16). Ja, in die herstelde Paradys sal niks die vrede van mense versteur wat die ware God ken en aanbid nie.—Jesaja 32:18.

Wat ’n beloning sal dit tog nie wees vir diegene wat die weë van hierdie hebsugtige wêreld weerstaan het nie! Spreuke 11:19 sê: “Ware geregtigheid lei tot die lewe, maar hy wat die kwaad najaag, jaag na sy dood.” Ja, nadat die goddeloses uitgeroei is, sal niemand rede hê om vir sy lewe te vrees of oor sy eiendom bekommerd te wees nie. Psalm 37:11 belowe ons: “Die ootmoediges daarenteen sal die aarde besit en hulle verlustig oor groot vrede.”

[Voetnoot]

[Venster op bladsy 5]

Hoe om jou teen diefstal te beveilig

TUIS—Hou die deure toe en gesluit, aangesien diewe kan inkom, of jy nou by die huis is of nie. Kenners raai aan dat ’n mens ’n alarmstelsel of waghond moet hê. Laat ’n betroubare buurman weet wanneer jy met vakansie gaan. Bly kalm—rowers tree vinnig en onverwags op en kan onmiddellik hulle plan verander as hulle senuweeagtig raak. Identifiseer jouself as jy een van Jehovah se Getuies is en probeer ’n getuienis gee. Jy kan dalk hulle vriendelikheid of simpatie wek. Moet jou nie verset tensy jy fisies aangerand word nie.

IN DIE OPENBAAR—Wees op jou hoede vir agtervolging. Loop in die middel van die sypaadjie. Vermy donker en verlate strate. Hou jou beursie of waardevolle artikels op ’n veilige plek. Loop doelgerig, asof jy êrens heengaan. Moenie duur klere of opsigtige juweliersware dra nie. Doen saam met iemand anders inkopies as dit nodig is. Neem net die geld saam wat jy nodig het, en hou dit in verskillende sakke of op verskillende plekke.

IN DIE MOTOR—As “motorskaking” ’n algemene probleem in jou omgewing geword het, moet jy nie in jou geparkeerde motor bly sit nie. Volg verskillende roetes werk toe en terug. Ry langs ’n veiliger pad, al is dit ietwat langer. Kyk eers rond vir enigiets wat verdag lyk voordat jy parkeer. Moenie die bagasiebak op ’n verlate plek oopmaak nie. Moenie waardevolle items in die motor laat waar dit sigbaar is nie. ’n Sigbare ketting en slot of ’n ander antidiefstaltoestel kan geleentheidsdiewe ontmoedig.

[Venster op bladsy 6]

“Moenie vir julle skatte bymekaarmaak op die aarde, waar mot en roes verniel en waar diewe inbreek en steel nie; maar maak vir julle skatte bymekaar in die hemel, waar geen mot of roes verniel nie en waar diewe nie inbreek en steel nie.”—Mattheüs 6:19, 20