Jongmense—Weerstaan die gees van die wêreld
“Ons het nie die gees van die wêreld ontvang nie, maar die gees wat van God kom.”—1 KORINTIËRS 2:12.
1, 2. (a) Watter verskil kan gesien word tussen die jongmense in die wêreld en die jongmense in die gemeentes van Jehovah se Getuies? (b) Watter hartlike lof kan aan die meeste jong Getuies gegee word?
“ONS jonger geslag is moedeloos, voel verworpe en rebelleer.” Dit is wat die Australiese koerant The Sun-Herald berig het. Dit het bygevoeg: “Volgens hofverslae is daar ’n vermeerdering van 22 persent [oor die vorige jaar] in die aantal jeugdiges wat op aanklagte van ernstige aanranding voorgekom het . . . Selfmoord onder kinders het sedert die middelsestigerjare verdrievoudig . . . En die generasiegaping het ’n bodemlose poel geword waarin al hoe meer jongmense wegsink in die vergetelheid van dwelms, alkohol en selfvernietiging.” Maar hierdie situasie is beslis nie net tot een land beperk nie. Regoor die wêreld is ouers, onderwysers en deskundiges op die gebied van geestesgesondheid bekommerd oor die toestand van jongmense.
2 Wat ’n groot verskil is daar tog tussen die meeste hedendaagse jongmense en die voorbeeldige jongmense wat in die gemeentes van Jehovah se Getuies gevind word! Dit is nie te sê dat hulle volmaak is nie. Hulle voer ook ’n stryd teen “die begeertes wat eie is aan die jeug” (2 Timoteus 2:22). Maar as ’n groep het hierdie jongmense ’n moedige standpunt ingeneem vir wat reg is en weier hulle om toe te gee aan die wêreld se druk. Ons wil al julle jongmense wat oorwinnaars is in die stryd teen Satan se “listige dade” heelhartig prys! (Efesiërs 6:11, voetnoot in naslaanuitgawe). Ons word beweeg om soos die apostel Johannes te sê: “Ek skryf aan julle, jong manne [en vroue], omdat julle sterk is en die woord van God in julle bly en julle die bose oorwin het.”—1 Johannes 2:14.
3. Waarna kan die woord “gees” verwys?
3 Maar om aan te hou om julle stryd teen die bose te wen, moet julle “die gees van die wêreld”, soos die Bybel dit noem, kragtig weerstaan (1 Korintiërs 2:12). Volgens ’n gesaghebbende bron op die gebied van Grieks kan “gees” verwys na “die gesindheid of invloed wat die siel van enigiemand oorheers of beheer”. As jy byvoorbeeld opmerk dat iemand humeurig is, sal jy dalk sê dat hy ’n slegte “gees” het. Jou “gees”, gesindheid of geestesneiging beïnvloed die keuses wat jy maak; dit is die dryfkrag agter wat jy doen en sê. Dit is interessant dat individue sowel as groepe ’n “gees” kan openbaar. Die apostel Paulus het aan ’n groep Christene geskryf: “Die onverdiende goedhartigheid van die Here Jesus Christus sy met die gees wat julle openbaar” (Filemon 25). Presies watter soort gees openbaar die wêreld dus? Aangesien ‘die hele wêreld in die mag lê van die bose’, Satan die Duiwel, kan die gees van die wêreld beslis nie heilsaam wees nie, of hoe?—1 Johannes 5:19.
Hoe om die wêreld se gees te identifiseer
4, 5. (a) Watter gees het diegene in die gemeente in Efese beïnvloed voordat hulle Christene geword het? (b) Wie is “die heerser van die gesag van die lug”, en wat is die “lug”?
4 Paulus het geskryf: “God [het] júlle lewend gemaak, hoewel julle dood was in julle oortredings en sondes, waarin julle vroeër volgens die stelsel van dinge van hierdie wêreld gewandel het, volgens die heerser van die gesag van die lug, die gees wat nou in die seuns van die ongehoorsaamheid werk. Ja, onder hulle het ons almal ons vroeër in ooreenstemming met die begeertes van ons vlees gedra, terwyl ons die dinge gedoen het wat die vlees en die gedagtes gewil het, en ons was van nature kinders van die gramskap, net soos die res.”—Efesiërs 2:1-3.
5 Voordat Christene in Efese die Christelike weg geleer het, was hulle onwetend volgelinge van “die heerser van die gesag van die lug”, Satan die Duiwel. Daardie “lug” is nie die een of ander letterlike plek waar Satan en sy demone woon nie. Toe Paulus hierdie woorde geskryf het, het Satan die Duiwel en sy demone nog toegang tot die hemel gehad. (Vergelyk Job 1:6; Openbaring 12:7-12.) Die woord “lug” beteken die gees, of geestesgesindheid, wat Satan se wêreld oorheers. (Vergelyk Openbaring 16:17-21.) Soos die lug om ons, is hierdie gees oral.
6. Wat is “die gesag van die lug”, en hoe word dit oor baie jongmense uitgeoefen?
6 Maar wat is “die gesag van die lug”? Dit verwys blykbaar na die diepgaande invloed wat hierdie “lug” op mense het. Paulus het gesê dat hierdie gees “in die seuns van die ongehoorsaamheid werk”. Die gees van die wêreld bring dus ’n gees van ongehoorsaamheid en opstandigheid voort, en portuurdwang is een manier waarop hierdie gesag uitgeoefen word. “Wanneer jy by die skool is”, sê ’n jong Getuiemeisie, “moedig almal jou altyd aan om ’n bietjie opstandig te wees. Die kinders het meer respek vir jou as jy iets doen wat daaraan grens.”
Hoe die wêreld se gees geopenbaar word
7-9. (a) Noem ’n paar maniere waarop die wêreld se gees onder vandag se jongmense geopenbaar word. (b) Het jy enige van hierdie dinge in julle omgewing opgemerk?
7 Wat is maniere waarop die gees van die wêreld onder vandag se jongmense geopenbaar word? Hulle openbaar dit deur oneerlikheid en opstandigheid. ’n Artikel in ’n tydskrif het getoon dat meer as 70 persent van junior en senior studente gesê het dat hulle op hoërskool gekul het. Ligsinnige, sarkastiese praatjies en vuil taal is ook algemeen. Job en die apostel Paulus het weliswaar by geleentheid geregverdigde verontwaardiging uitgedruk deur taal te gebruik wat party as sarkasme kan beskou (Job 12:2; 2 Korintiërs 12:13). Maar die bytende sarkasme wat oor die lippe van talle jongmense kom, is dikwels niks anders as skeltaal nie.
8 Buitensporigheid wat ontspanning betref, is ook ’n manier waarop die wêreld se gees geopenbaar word. Nagklubs vir jongmense, ravesa en ander vorme van onbeheerste swelgery is gewild onder jongmense. Uiterstes in kleredrag en persoonsversorging is ook algemeen. Van hip-hop-klere wat veels te groot is tot skokkende giere, soos om gaatjies deur die vel te steek—dit is hoe baie hedendaagse jongmense hulle met die wêreld se opstandige gees vereenselwig. (Vergelyk Romeine 6:16.) Beheptheid met materiële besittings is nog ’n manier waarop hierdie gees geopenbaar word. Volgens ’n onderwysblad “word kinders om elke hoek en draai gebombardeer deur verkopers met ontsaglik baie verkooptegnieke en ’n wye reeks produkte”. Teen die tyd dat jongmense in die Verenigde State die skool verlaat, het hulle 360 000 TV-advertensies gesien. Jou portuurs oefen dalk ook druk op jou uit om te koop. ’n Veertienjarige meisie sê: “Almal vra altyd: ‘Watter maak is jou trui, baadjie of jeans?’”
9 Skadelike musiek is al sedert Bybeltye ’n instrument wat Satan gebruik om onrein gedrag te bevorder. (Vergelyk Exodus 32:17-19; Psalm 69:13; Jesaja 23:16.) Dit is dus geen wonder dat musiek met seksueel prikkelende—indien nie eksplisiete—woorde, vloektaal en wilde, polsende maatslae so gewild is nie. Nog ’n manier waarop hierdie wêreld se onrein gees geopenbaar word, is deur geslagsonsedelikheid (1 Korintiërs 6:9-11). The New York Times berig: “Geslagsomgang het vir baie tieners amper soos ’n oorgangsritus geword . . . Meer as twee derdes van senior hoërskoolleerlinge het al geslagsomgang gehad.” ’n Artikel in The Wall Street Journal het getuienis aangehaal dat kinders tussen die ouderdomme van 8 en 12 “meer seksueel aktief word”. ’n Skoolraadgewer wat onlangs afgetree het, sê: “Ons begin nou ’n paar graadsesleerlinge sien wat swanger is.”b
Verwerp die wêreld se gees
10. Hoe het sommige jongmense uit Christengesinne hulle deur die wêreld se gees laat beïnvloed?
10 Dit is tragies dat sommige jong Christene hulle deur die wêreld se gees laat beïnvloed. “Ek het my goed gedra voor my ouers en mede-Christene”, erken een Japannese meisie. “Maar ek het ook ’n ander lewe gelei.” ’n Jeugdige van Kenia sê: “Ek het ’n tyd lank ’n dubbele lewe gelei, wat partytjies, rockmusiek en verkeerde vriende ingesluit het. Ek het geweet dit is verkeerd, maar ek het dit probeer ignoreer en gehoop dat dit mettertyd vanself sou weggaan. Maar dit het nie. Dinge het net erger geword.” ’n Ander jong persoon van Duitsland sê: “Dit het alles begin by verkeerde vriende. Toe het ek begin rook. Ek wou my ouers seermaak, maar ek het net myself seergemaak.”
11. Wat het Kaleb in staat gestel om nie met die stroom saam te gaan toe tien verkenners met ’n slegte verslag teruggekeer het nie?
11 Maar dit is wel moontlik om die wêreld se gees te weerstaan, ja te verwerp. Beskou die eertydse voorbeeld van Kaleb. Toe die tien lafhartige verkenners met ’n slegte verslag omtrent die Beloofde Land teruggekeer het, het hy en Josua nie toegelaat dat hulle geïntimideer word om met die stroom saam te gaan nie. Hulle het moedig gesê: “Die land wat ons deurgetrek het om dit te verken, is ’n buitengewoon goeie land. As die HERE ’n welbehae in ons het, sal Hy ons in hierdie land inbring en dit aan ons gee, ’n land wat oorloop van melk en heuning” (Numeri 14:7, 8). Wat het Kaleb in staat gestel om al daardie druk te weerstaan? Jehovah het van Kaleb gesê: “’n Ander gees [is] in hom.”—Numeri 14:24.
Toon “’n ander gees”
12. Waarom is dit belangrik dat ’n mens “’n ander gees” openbaar wat jou spraak betref?
12 Dit verg vandag moed en krag om “’n ander gees” of geestesgesindheid te openbaar—een wat verskil van die wêreld s’n. Een manier waarop jy dit kan doen, is deur sarkastiese, oneerbiedige spraak te vermy. Die Afrikaanse woord “sarkasme” kom interessant genoeg van ’n Griekse werkwoord wat letterlik beteken “om vlees te verskeur soos honde”. (Vergelyk Galasiërs 5:15.) Net soos ’n hond se tande vleis van ’n been af kan skeur, kan sarkastiese “humor” ander van hulle waardigheid beroof. Maar Kolossense 3:8 vermaan julle om “al hierdie dinge van julle [te verwyder]: gramskap, toorn, slegtheid, smadende taal en onwelvoeglike praatjies uit julle mond”. En Spreuke 10:19 sê: “By veelheid van woorde ontbreek die oortreding nie; maar hy wat sy lippe inhou, handel verstandig.” As iemand jou beledig, moet jy die selfbeheersing hê om ‘die ander wang te draai’, moontlik deur kalm en rustig met die belediger te gesels wanneer julle alleen is.—Matteus 5:39; Spreuke 15:1.
13. Hoe kan jongmense ’n gebalanseerde beskouing van materiële dinge toon?
13 Nog ’n manier waarop ’n mens “’n ander gees” openbaar, is deur ’n gebalanseerde beskouing van materiële dinge te handhaaf. Dit is net natuurlik om mooi dinge te wil hê. Jesus Christus het self blykbaar ten minste een kledingstuk van goeie gehalte gehad (Johannes 19:23, 24). Maar wanneer dit ’n obsessie by jou word om dinge te besit en jy gedurigdeur jou ouers smeek om dinge te koop wat hulle werklik nie kan bekostig nie of wanneer jy bloot ander jongmense wil navolg, dan oefen die wêreld se gees dalk groter gesag oor jou uit as wat jy besef. Die Bybel sê: “Alles wat in die wêreld is—die begeerte van die vlees en die begeerte van die oë en die spoggerige vertoon van ’n mens se lewensmiddele—het nie hulle oorsprong by die Vader nie, maar het hulle oorsprong by die wêreld.” Ja, moenie voor die gesag van die wêreld se materialistiese gees swig nie! Leer om tevrede te wees met wat jy het.—1 Johannes 2:16; 1 Timoteus 6:8-10.
14. (a) Hoe het God se volk in Jesaja se dag ’n ongebalanseerde beskouing van ontspanning getoon? (b) Watter gevare het party jong Christene by nagklubs en wilde partytjies gesien?
14 Dit is ook belangrik om ontspanning op sy plek te hou. Die profeet Jesaja het gesê: “Wee hulle wat vroeg in die môre klaarmaak om sterk drank na te jaag, wat in die nag láát opbly terwyl die wyn hulle verhit. En daar is siter en harp, tamboeryn en fluit en wyn by hulle maaltyd; maar op die dade van die HERE gee hulle geen ag nie, en die werk van sy hande sien hulle nie” (Jesaja 5:11, 12). Ongelukkig het party jong Christene by soortgelyke wilde partytjies betrokke geraak. Toe ’n groep jong Christene gevra is om te beskryf wat by nagklubs vir jongmense plaasvind, het een jong suster gesê: “Daar is altyd ’n bakleiery. Ek was al in die middel daarvan.” ’n Jong broer het bygevoeg: “Daar word gedrink, gerook, en dies meer.” ’n Ander jong broer het erken: “Mense raak dronk. Hulle gedra hulle soos idiote! En daar is dwelms. Baie slegte dinge gebeur. As jy daarheen gaan en dink dat dit nie ’n uitwerking op jou sal hê nie, het jy dit mis.” Dit is dus met goeie rede dat die Bybel swelgerye, of “wilde partytjies”, een van die “werke van die vlees” noem.—Galasiërs 5:19-21; Byington; Romeine 13:13.
15. Watter gebalanseerde beskouing van ontspanning gee die Bybel?
15 As jy skadelike ontspanning vermy, beteken dit nie dat jy tot ’n vreugdelose lewe gedoem is nie. Ons aanbid ’n “gelukkige God” wat wil hê dat jy jou jeug moet geniet! (1 Timoteus 1:11; Prediker 11:9). Maar die Bybel waarsku: “Wie van vrolikheid [“vermaak”, Lamsa] hou, is ’n man van gebrek” (Spreuke 21:17). Ja, as jy ontspanning die belangrikste ding in jou lewe maak, sal jy geestelik gebrek ly. Volg dus Bybelbeginsels in jou keuse van ontspanning. Daar is baie maniere waarop jy pret kan hê wat jou sal opbou en nie afbreek nie.c—Prediker 11:10.
16. Hoe kan jong Christene toon dat hulle anders is?
16 As jy beskeie in jou kleredrag en persoonsversorging is en die wêreld se giere verwerp, sal dit ook bewys dat jy anders is (Romeine 12:2; 1 Timoteus 2:9). En dieselfde geld as jy selektief in jou keuse van musiek is (Filippense 4:8, 9). “Ek het musiek wat ek weet ek moet uitgooi”, erken ’n jong Christen, “maar dis sulke lekker musiek!” ’n Jong man erken eweneens: “Musiek is vir my ’n strik omdat ek lief daarvoor is. As ek uitvind dat iets daarmee verkeerd is of as my ouers my daarop attent maak, moet ek my werklik dwing om na my kop te luister en nie na my hart nie omdat ek in my hart lief is vir daardie musiek.” Jongmense, moenie “onkundig omtrent [Satan se] planne” wees nie! (2 Korintiërs 2:11). Hy gebruik musiek om jong Christene van Jehovah af te probeer wegkeer! Artikels het al in die Wagtoringpublikasies verskyn wat rap, heavy metal en alternatiewe rockmusiek bespreek.d Maar die Wagtoringpublikasies kan beslis nie elke nuwe vorm van musiek of musiekstyl wat op die mark verskyn, bespreek nie. Jy moet dus jou “denkvermoë” en “onderskeidingsvermoë” gebruik wanneer jy musiek kies.—Spreuke 2:11, NW.
17. (a) Wat is por·neiʹa, en watter gedrag sluit dit in? (b) Wat is God se wil wat geslagsake betref?
17 Laastens moet jy sedelik rein bly. Die Bybel spoor ons aan: “Vlug vir die hoerery” (1 Korintiërs 6:18). Die oorspronklike Griekse woord vir hoerery, por·neiʹa, verwys na alle ongeoorloofde seksuele bedrywighede buite die huweliksband wat die gebruik van die geslagsorgane behels. Dit sluit orale seks en die doelbewuste streling van geslagsorgane in. ’n Aantal jong Christene het hulle al aan sulke gedrag skuldig gemaak en gedink dat hulle nie werklik hoerery gepleeg het nie. Maar God se Woord sê duidelik: “Dit is wat God wil: julle heiliging, dat julle julle onthou van hoerery; dat elkeen van julle moet weet hoe om in heiliging en eer sy eie vat in besit te kry.”—1 Tessalonisense 4:3, 4.
18. (a) Hoe kan ’n jongmens voorkom dat hy deur die wêreld se gees besmet word? (b) Wat sal in die volgende artikel bespreek word?
18 Ja, met Jehovah se hulp kan jy voorkom dat jy deur die wêreld se gees besmet word! (1 Petrus 5:10). Satan gee nietemin dikwels ’n valse skyn aan sy dodelike strikke, en dit verg soms groot onderskeidingsvermoë om die gevaar te sien. Ons volgende artikel is bedoel om jongmense te help om hulle waarnemingsvermoëns te ontwikkel.
[Voetnote]
a Danspartytjies wat gewoonlik heelnag duur. Sien “Jongmense vra . . . Is raves onskadelike pret?” in die Ontwaak! van 22 Desember 1997 vir meer inligting.
b Kinders van omtrent 11 jaar.
c Sien die boek Vrae wat jongmense vra—Antwoorde wat werk, bladsye 296-303, vir wenke.
d Sien Die Wagtoring van 15 April 1993.
Hersieningsvrae
◻ Wat is “die gees van die wêreld”, en hoe oefen dit “gesag” uit oor mense?
◻ Wat is van die maniere waarop die wêreld se gees onder vandag se jongmense geopenbaar word?
◻ Hoe kan jong Christene “’n ander gees” openbaar wat hulle spraak en ontspanning betref?
◻ Hoe kan jong Christene “’n ander gees” openbaar wat sedes en musiek betref?
[Prent op bladsy 9]
Talle jongmense toon deur hulle gedrag dat hulle onder die “gesag” van die wêreld se gees is
[Prent op bladsy 10]
Wees selektief in jou keuse van musiek
[Prent op bladsy 11]
Dit verg moed om die wêreld se gees te weerstaan