Koninkryksverkondigers berig
Jehovah is sterker as Sy vyande
DIE Duiwel en sy demone probeer lank reeds om die verkondiging van die goeie nuus deur middel van valse godsdiens en spiritisme te dwarsboom. Die Bybel meld Satan se bose oogmerk in 2 Korinthiërs 4:4 waar dit praat van “die ongelowiges in wie die god van hierdie wêreld die sinne verblind het, sodat die verligting van die evangelie van die heerlikheid van Christus, wat die beeld van God is, op hulle nie sou skyn nie”.
Maar Jehovah God is sterker as Satan. Daar is niks wat Jehovah se vyande kan doen om die uitvoering van sy Goddelike wil, naamlik dat “alle mense gered word en tot kennis van die waarheid kom”, stop te sit nie (1 Timotheüs 2:4). Die volgende verslae van Koninkryksverkondigers in Australië beklemtoon dit.
◻ Nadat ’n vrou 20 jaar lank niks met godsdiens te doen gehad het nie, het sy weer die Bybel begin lees. Hierdie hernieude belangstelling in die Bybel het veroorsaak dat sy talle vrae gehad het; dus het sy tot God gebid om hulp om die antwoorde te vind. Sy wou na die waarheid soek, maar sy het geweet dat dit nie haar probleem sou oplos as sy na haar vorige geloof sou teruggaan nie. Sy het toe maar haar soeke begin deur na ’n tweedehandse boekwinkel te gaan en te vra of hulle enige boeke oor godsdiens het.
Die winkeleienares het onthou dat sy ’n godsdiensboek gehad het, nie in die winkel nie, maar by die huis. Die boek se titel was Jy kan vir ewig in die Paradys op aarde lewe, wat deur Jehovah se Getuies uitgegee word. Die vrou het die boek gretig gelees en die antwoorde op baie van haar Bybelvrae gevind. Nadat sy in die telefoongids na Jehovah se Getuies gesoek het, het sy uiteindelik met hulle in aanraking gekom en ’n gereelde Bybelstudie begin.
◻ ’n Jong vrou het ’n amulet in ’n plaaslike koerant te koop aangebied. Die advertensie het daarna verwys as ’n ‘Middeleeuse amulet wat baie krag het’. Een van Jehovah se Getuies het die advertensie gesien. Sy het besluit om die telefoonnommer daarin te skakel en met die vrou oor die bron van die amulet se sogenaamde krag te praat. ’n Bespreking oor die Bybel se beskouing oor demoniese bedrywighede het gevolg. Die jong vrou met die amulet het gesê dat sy net die vorige dag tot God gebid het om hulp met haar probleme met demone. Die Getuie het reëlings getref vir nog ’n bespreking oor die telefoon.
Toe sy bel, was die jong vrou nie tuis nie. Die ma het die oproep ontvang en gesê: “Ek weet nie wat jy vir my dogter gesê het nie, maar ’n wonderwerk het plaasgevind!” Sy het vertel dat haar dogter ná die eerste oproep al haar sataniese prente en boeke weggegooi het en die Bybel begin lees het.
Kort daarna is reëlings getref vir ’n persoonlike besoek aan die jong vrou. Sy het onmiddellik ’n gereelde Bybelstudie met Jehovah se Getuies aanvaar. Sy het ook met die Getuies begin assosieer deur hulle Christelike vergaderinge by te woon. Jehovah het weer eens die demone ’n nederlaag toegedien deur die juiste kennis van Bybelwaarhede te laat skyn.