Koninkryksverkondigers berig

Hulp vir dié wat “dors” in Rusland

“GELUKKIG is dié wat honger en dors na regverdigheid, want hulle sal versadig word”, het Jesus gesê (Matteus 5:6). Die volgende ondervindinge lig toe hoe Jehovah se Getuies help om die geestelike dors van baie in Rusland te les, waar godsdiensvryheid meer as 70 jaar lank ingekort is.

▪ ’n Vrou met die naam Valentina het ernstige Bybelvrae gehad wat baie jare lank onbeantwoord gebly het. Sy het byvoorbeeld gewonder: ‘Tot wie het Jesus gebid?’ Sy het geredeneer dat Jesus tot iemand moes gebid het wat hoër as hy is en het gewonder wat die naam van hierdie Een is.

Sy het na die Russies-Ortodokse Kerk gegaan. Maar sy het nie die antwoorde op haar vrae in daardie godsdiens gevind nie. Sy was steeds nie tevrede nie en daarom het sy na ’n Protestantse kerk gegaan, maar weer eens het sy geen duidelike antwoorde gevind nie. Omdat Valentina nie geweet het waarheen anders sy kon gaan nie, het sy die Bybel begin lees en self antwoorde probeer kry—maar sonder sukses. Sy het om hulp gebid.

’n Hele ruk later het Jehovah se Getuies aan haar deur geklop. Hulle het haar uit die Bybel gewys dat God se naam Jehovah is. Uiteindelik het sy uitgevind tot wie Jesus gebid het! Sy het die Bybel gereeld saam met die Getuies begin studeer. Sy het dikwels die hele nag wakker gebly om die lektuur van die Wagtoringgenootskap te lees en Bybeltekste na te slaan. Dit was nie lank nie of Valentina het tot die slotsom gekom dat sy die waarheid gevind het. Binne drie maande het sy aan die predikingswerk begin deelneem, en twee maande later is sy gedoop. Haar biddende soeke na die waarheid is beloon.

▪ ’n Getuie het per bus gereis om in ’n verafgeleë gebied te gaan getuig. Gedurende die rit het hy met ’n jong vrou oor die Bybel se beloftes gepraat, maar die jong vrou het nie belanggestel nie. Twee maande later het die Getuie ’n tweede reis na dieselfde gebied onderneem om ’n openbare toespraak daar te gaan hou. Ná die toespraak het hy ’n besoeker genader en hom gevra: “Het iemand al met jou oor die goeie nuus van die Bybel gepraat?” Die man het geantwoord: “Ja, jy het.” Die Getuie het gedink hy maak ’n grap. Maar die jong man het verduidelik dat hy twee maande tevore die gesprek tussen die Getuie en die jong vrou gedurende die busrit gehoor het. “Ek wou meer weet, maar jy het van die bus afgeklim, en ek het nie gedink dat ek ooit weer een van Jehovah se Getuies sou sien nie. Maar toe het ek ’n man by my werk ontmoet wat die Bybel saam met die Getuies studeer. En nou is ek hier!”

Die man en sy vrou het die Bybel begin bestudeer. Ná ’n baie kort tydjie kon hy sien dat sy werk in stryd met Bybelbeginsels was. Omdat hy ’n goeie gewete voor God wou behou, het hy van werk verander. Nou vertel hy ander by elke geleentheid van God se Koninkryk. Sy vrou maak ook vordering in haar studie van die Bybel.

Jehovah se Getuies in die uitgestrekte gebied van Rusland is bly dat hulle ’n deel daaraan kan hê om vir alle opregte mense te sê: “‘Kom!’ En laat enigeen wat dors is, kom; laat enigeen wat wil die water van die lewe neem, verniet.”—Openbaring 22:17.