Hy het gehelp om lig “tot aan die uiterste van die aarde” te versprei
DIE apostel Paulus is gebruik om geestelike lig “tot aan die uiterste van die aarde” te versprei. Gevolglik het baie “wat die regte gesindheid vir die ewige lewe gehad het . . . gelowiges geword”.—Handelinge 13:47, 48; Jesaja 49:6.
’n Vurige begeerte om geestelike lig te versprei, kon ook duidelik gesien word in die toegewyde lewe en ywer in die Christelike bediening van William Lloyd Barry, ’n lid van die Bestuursliggaam van Jehovah se Getuies. Broer Barry is op 2 Julie 1999 oorlede terwyl hy ’n deel op die streekbyeenkomsprogram in Hawaii behartig het.
Lloyd Barry is op 20 Desember 1916 in Nieu-Seeland gebore. Sy ma en pa het reeds groot belangstelling begin toon in die Bybelwaarhede wat uiteengesit is in die publikasies van C. T. Russell, wat deur die Wagtoring- Bybel- en Traktaatgenootskap uitgegee is. Broer Barry het dus in ’n toegewyde Christenhuisgesin grootgeword.
Hoewel broer Barry in sport en geleerdheid belanggestel het en selfs ’n graad in die wetenskappe verwerf het, het hy sy aandag hoofsaaklik op geestelike dinge toegespits. Op 1 Januarie 1939 het hy dus die voltydse bediening betree en ’n lid van die Bethelgesin by die kantoor van die Genootskap in Australië geword. Nadat die regering in 1941 ’n verbod op die werksaamhede van die Genootskap geplaas het, het broer Barry kantoorwerk gedoen, en hy is soms gevra om artikels te skryf om medegelowiges te bemoedig. Hy het ook ’n goeie voorbeeld in die openbare bediening gestel.
In Februarie 1942 is broer Barry met ’n ander voltydse kneg getroud. Sy dierbare vrou, Melba, het al hierdie jare getrou saam met hom gewerk in baie dele van die aarde. Hulle het hulle voorberei vir diens in die buiteland deur die 11de klas van die Wagtoring-Bybelskool Gilead in die Verenigde State by te woon. Hulle is gestuur na ’n land wat baie mense as ‘’n uiterste van die aarde’ sou beskou—Japan. Nadat hulle in November 1949 daar aangekom het, het hulle in die hawestad Kobe as sendelinge begin dien. Op daardie stadium was daar net 12 verkondigers van die goeie nuus in Japan. Broer Barry het die taal en gebruike van sy nuwe tuiste aangeleer en ’n innige liefde opgebou vir die Japannese mense, saam met wie hy die volgende 25 jaar gedien het. Sy liefde vir diegene “wat die regte gesindheid vir die ewige lewe gehad het”, kon duidelik gesien word deur die Christenbroederskap in Japan wat al hoe groter geword het, en dit het hom gehelp om dekades lank goeie toesig oor die werk in die tak te hou.
In die middel van 1975, toe daar sowat 30 000 Getuies in Japan was, is die Barrys oorgeplaas na Brooklyn, New York. As ’n geesgesalfde Christen is broer Barry gevra om as ’n lid van die Bestuursliggaam van Jehovah se Getuies te dien (Romeine 8:16, 17). Sy skryfondervinding was baie nuttig in sy nuwe rol in die Skryfafdeling. En sy uitgebreide tak- en internasionale ondervinding het hom toegerus om ’n waardevolle bydrae te lewer as ’n lid van die Uitgewerskomitee van die Bestuursliggaam.
Deur die jare heen het broer Barry sy liefde vir die Ooste en die mense van die Ooste behou. Studente wat Gileadskool bygewoon het sowel as lede van die Bethelgesin kon seker wees dat sy toesprake en kommentare hartverblydende verhale sou insluit oor baie wat in die sendingwerk gedien het. Broer Barry het sy eie ondervindinge so entoesiasties vertel dat ’n mens duidelik voor jou geestesoog kon sien hoe die Koninkrykspredikingswerk aan ‘die uiterstes van die aarde’ gedoen is. Van hierdie ondervindinge word in sy lewensverhaal gemeld wat in The Watchtower van 15 September 1960 gepubliseer is.
Ons is daarvan oortuig dat broer Barry, as ’n ‘mede-erfgenaam met Christus’, sal voortgaan om belangstelling te toon in diegene “wat die regte gesindheid vir die ewige lewe” het. Hy sal natuurlik geweldig gemis word deur almal wat hom geken en liefgehad het as ’n geestelike man wat volkome toegewyd was aan Jehovah en innige geneentheid vir God se volk gehad het. Maar ons is verheug dat broer Barry tot die einde van sy aardse loopbaan getrou volhard het.—Openbaring 2:10.
[Prent op bladsy 16]
Lloyd Barry en John Barr toe “Insight on the Scriptures” in 1988 vrygestel is
[Prent op bladsy 16]
Gegradueerdes van die 11de klas van Gilead toe hulle ná 40 jaar in Japan bymekaargekom het