Toewyding van die Wagtoring-onderrigsentrum—’n fees vir Jehovah

SEDERT die ou tyd het vreugdevolle feeste deel van ware aanbidding uitgemaak. Party van die feeste wat in eertydse Israel gehou is, het dae lank geduur en is deur derduisende aanbidders van Jehovah bygewoon. Die inhuldiging van Salomo se tempel het sewe dae geduur en is gevolg deur die week lange Huttefees. Dit het die Israeliete die geleentheid gebied om na te dink oor die wonderlike manier waarop Jehovah met hulle gehandel het. Hulle het teruggegaan huis toe, “verheug en opgeruimd oor al die goeie dinge wat die HERE . . . gedoen het”.—1 Konings 8:66.

Wat op 17-22 Mei 1999 by die Wagtoring-onderrigsentrum in Patterson, New York, VSA, plaasgevind het, het die besoekers herinner aan daardie eertydse vrolike feeste. Dit was ’n week van spesiale bedrywighede om die toewyding te vier van ’n kompleks met 28 geboue wat ontwerp is om die aardwye Bybelonderrigtingswerk te bevorder. Voorsiening is gemaak sodat al 5 400 lede van die hoofkantoorpersoneel by Brooklyn, Wallkill en Patterson gedurende daardie onvergeetlike week uitgebreide toere van die Patterson-fasiliteite kon doen. Onder die gaste was meer as 500 persone wat met die bouwerk van die onderrigsentrum gehelp het, verteenwoordigers van 23 takke van die Wagtoringgenootskap en ander van nabygeleë gemeentes—altesaam ten minste 8 100.

Toeruitstallings was opvoedkundig

Spesiale uitstallings, opvoedkundige video-aanbiedings en onbegeleide toere is gereël om die besoekers meer inligting omtrent die onderrigsentrum te gee. In die hoofportaal is die besoekers se aandag onmiddellik getrek deur ’n skaalmodel van die tempel wat gedurende die tyd van Jesus se aardse bediening in Jerusalem bestaan het. Ander uitstallings het die vroeë geskiedenis van die Wagtoring-Bybelskool Gilead uitgebeeld, asook geskiedkundige streekbyeenkomste, gemeentelike vergaderinge, die hedendaagse ontwikkeling van tuisbybelstudies—waarvan daar elke week miljoene gehou word—en die werk wat deur die Regsafdeling gedoen word om te sorg dat hierdie werk ongestoord voortgaan in gehoorsaamheid aan Jesus se opdrag.—Matteus 28:19, 20.

In die aangrensende ouditorium, wat 1 700 sitplekke het, kon besoekers gedurende die toewydingsfeestelikhede ’n video van 33 minute sien met die titel “Nie deur krag nie—Deur my gees!” Hierdie video het gewys hoe die Wagtoring-onderrigsentrum tot stand gekom het. Onderhoude het gevalle gemeld wat duidelik toon dat Jehovah sake gerig en die pogings geseën het om hierdie 15 jaar lange projek suksesvol te voltooi. Duisende het aan die bouwerk deelgeneem. Op een stadium in 1994 was daar 526 werkers op die bouterrein, 350 voltydse vrywilligers, 113 tydelike werkers en 63 wat daagliks kom help het. Baie ander het die werk met bydraes ondersteun. Hulle almal besef dat dit sonder Jehovah se gees nooit moontlik sou gewees het nie.—Sagaria 4:6.

Diegene wat op die toere gegaan het, kon sien dat die werk wat by die onderrigsentrum gedoen word om die bevordering van Goddelike onderrigting draai. Die uitstalling by die ingang van Gileadskool op die grondverdieping van die skoolgebou het die ryk geestelike erfenis en geskiedenis van die skool uitgebeeld. Sedert die eerste klas van Gileadskool in 1943 by die skool se oorspronklike kampus in South Lansing, New York, gehou is, het dit al meer as 7 000 studente vir die sendingdiens opgelei. Uitstallings op die eerste verdieping van die skoolgebou was oor die Skool vir Takkomiteelede en die Skool vir Reisende Opsieners, waarvan die klasse daar gehou word. Sedert die begin van die Skool vir Takkomiteelede in November 1995 het dit verdere opleiding voorsien vir 360 takkomiteelede uit 106 lande.

Terwyl die besoekers getoer het, het hulle gou agtergekom dat hulle in die meeste areas meer as net ’n uitstalling van prente kon sien. Hulle kon reg in die verskillende afdelings ingaan, die kantore en ander werksplekke besoek en goed sien watter werk gedoen word. ’n Hoogtepunt van die toer was die Oudio-/Videodienste-gebou. Watter uitstekende fasiliteite word tog hier gebruik om die Bybelonderrigtingswerk te bevorder! Deur middel van ’n reeks leersame uitstallings en kort video’s is besoekers gehelp om te verstaan hoe stemopnames en video’s gemaak word. Hulle het iets geleer oor die deeglike navorsing wat daarby betrokke is om toneelrekwisiete en kostuums voor te berei. Hulle het gesien hoe die toneeldekor met minimale koste maar met die grootste aandag aan besonderhede aanmekaargesit is. Hulle het gesien hoe musiek gebruik word om mense te laat voel dat hulle werklik in die toneel is wat hulle sien. Sedert 1990 het die Genootskap tien video’s met verskillende Bybeltemas in 41 tale vervaardig, buiten die ander video’s vir diegene wat Amerikaanse Gebaretaal gebruik.

Baie op die toer het gegaan na die Fotolaboratorium, die Kunsafdeling, Inligtingsdienste, wat rekenaaropleiding en -ondersteuning bied, die Diensafdeling, wat toesig hou oor die bedrywighede van 11 242 gemeentes en 572 reisende opsieners, en die Skryfafdeling se Korrespondensiekantoor, waar ongeveer 14 000 navrae elke jaar hanteer word. Hulle was beïndruk deur die navorsing wat gedoen word voordat briewe uitgestuur word en deur die opregte besorgdheid wat betoon is teenoor diegene wie se navrae bewys lewer dat hulle ernstige probleme die hoof probeer bied.

’n Voortdurende stroom mense op toer het Vertaaldienste besoek. Hulle was verbaas om uit te vind dat nog 102 tale gedurende die afgelope vyf jaar by die aantal tale gevoeg is waarin die Genootskap Bybellektuur voorsien. Regoor die wêreld lees ongeveer 80 persent van Jehovah se Getuies die Genootskap se publikasies in ’n ander taal as Engels. Om in hulle behoeftes te voorsien, is daar meer as 1 700 vrywilligers in 100 lande wat vertaalwerk doen. Daar was uitstallings van Die Wagtoring in die tale van die Amerikas, Europa, Asië en Afrika. Besoekers kon die Nuwe Wêreld-vertaling van die Bybel in die 31 tale sien waarin dit beskikbaar is. Hulle het uitgevind dat Wagtoringpublikasies nou in 332 tale beskikbaar is en dat die brosjure Wat vereis God van ons? in 219 van daardie tale uitgegee word.

Daar is vir besoekers aan die Regsafdeling gewys op hoeveel verskillende gebiede regsadvies regoor die wêreld nodig is. In ’n video het hulle ’n werklike hofsaak gesien waarin ’n Getuieprokureur ’n saak aangaande bloedoortappings behartig het. Hulle het ook gesien wat gedoen word om te verseker dat die openbare verkondiging van die goeie nuus ongestoord voortgaan (Filippense 1:7). Die aandag is gevestig op die beslissing in Maart vanjaar deur ’n federale distrikshof wat die munisipaliteit van Oradell, New Jersey, VSA, gelas het om sy wette te verander wat vereis dat Jehovah se Getuies permitte en kentekens moet dra om aan hulle openbare bediening van huis tot huis in daardie gemeenskap deel te neem.

Dit was beslis nie al wat die besoekers gesien het nie. Hulle het gekyk na uitstallings van die konstruksiewerk in die werkswinkel waar die voorafgegiete panele gemaak is en het onder meer op die toer die vuilwatersuiweringsaanleg, die kragsentrale, die waterversagtingsaanleg en die talle werkswinkels vir instandhoudingswerk gesien. Dit was ’n unieke geleentheid.

Toewydingsprogram beklemtoon Goddelike onderrigting

Die eintlike toewydingsprogram is op Woensdag, 19 Mei, gehou en het om 4:00 nm. begin. Die vreugdevolle skare van 6 929 het lede van die hoofkantoorpersoneel en gaste van die Genootskap ingesluit, asook die 372 by die Kanada-takkantoor wat elektronies verbind was.

Dit was vir die gehoor ’n groot genoeë om die verkwikkende woorde van verwelkoming van Milton G. Henschel, die president van die Wagtoringgenootskap, te hoor. Theodore Jaracz, ’n lid van die Bestuursliggaam en voorsitter van die geleentheid, het daarna William Malenfant aan die woord gestel. Hy het “Hoogtepunte van die bouprogram” bespreek en ’n onderhoud gevoer met drie broers wat ’n belangrike rol in die ontwikkeling, ontwerp en bou van die Wagtoring-onderrigsentrum gespeel het. In die onderhoude het hulle gesê dat daar gedurende die jare van die bouwerk meer as 8 700 tydelike werkers was wat op eie koste gekom het om met die projek te help. Wat ’n uitstekende bewys van die eenheid en vrygewigheid wat deur Goddelike onderrigting moontlik gemaak word!

Daarna was daar ’n simposium met die titel “Goddelike onderrigting op wêreldskaal”. Dit is deur vier lede van die Bestuursliggaam aangebied. John E. Barr het beklemtoon dat Goddelike onderrigting op God se Woord, die Bybel, gegrond word, wat Christene aanspoor om “voort [te] gaan om vrug te dra in elke goeie werk en toe te neem in die juiste kennis van God” (Kolossense 1:10). Daniel Sydlik het bespreek hoe Goddelike onderrigting teokraties georganiseer word, van die hoof van die Christengemeente, Jesus Christus, af tot by elke lid van die wêreldwye broederskap (1 Korintiërs 12:12-27). Die laaste twee dele van die simposium, wat deur Gerrit Lösch en Carey Barber ontwikkel is, het getoon hoe Goddelike onderrigting bedienaars bekwaam maak om mense regoor die wêreld te bereik en hulle te leer sodat hulle ook op God se weg kan wandel.—Jesaja 2:1-4; 2 Korintiërs 3:5.

Om die gehoor vertroud te maak met die verskillende skole wat by hierdie onderrigsentrum gehou word, is onderhoude en besprekings gehou met die instrukteurs van die skole sowel as ander wat daarby betrokke is. Hulle het getoon watter rol elke skool daarin speel om die Goddelike onderrigtingsprogram op ’n aardwye skaal uit te voer. Daar is gewys dat Gileadskool ’n studie van elke boek van die Bybel, die hedendaagse geskiedenis van Jehovah se volk en voorbereiding vir sendingdiens dek. In die Skool vir Takkomiteelede word ’n uitvoerige studie van die talle pligte van takkomiteelede gedoen. Die Skool vir Reisende Opsieners is ontwerp om nie net in die behoeftes van die reisende broers te voorsien nie, maar ook om hulle toe te rus om die soort geestelike hulp te voorsien waarby die gemeentes veral baat sal vind.

Lloyd Barry van die Bestuursliggaam het die uitstekende program afgesluit met die toewydingstoespraak oor die onderwerp “Bou saam met ons Grootse Skepper”. Hy het daarop gewys dat die Skepper, Jehovah, behae skep in al sy skeppingswerke en ons vra om ons saam met hom te verheug (Jesaja 65:18). Aangesien ‘hy wat alles gebou het God is’, gaan die uiteindelike eer aan Jehovah God vir al hierdie bouwerk (Hebreërs 3:4). Nadat die spreker hierdie gedagtes oorgedra het, het hy ’n hartgrondige gebed gedoen en die Wagtoring-onderrigsentrum aan Jehovah, ons Grootse Skepper, toegewy.a

Die hele week se feesvieringe sal ongetwyfeld lank onthou word deur diegene wat dit bygewoon het. Kan jy die Wagtoring-onderrigsentrum besoek? Ons is seker dat ’n besoek aan die fasiliteite asook ’n toer daarvan vir jou ’n aansporing sal wees om meer te leer aangaande ons liefdevolle Skepper en om volgens sy regverdige standaarde te lewe.

[Voetnoot]

[Prente op bladsy 10]

’n Vol ouditorium en die res van die gehoor in die eetsaal

[Prente op bladsy 10]

Die toere was veral ’n vreugdevolle aspek van die program