Hoe jou lewe sinvoller kan wees

’N BAIE ou spreuk sê: “Vermoei jou nie om ryk te word nie, laat staan jou slimheid. Sou jy jou oë daarop laat afvlieg? Maar weg is dit! want skielik maak dit vir hom vlerke en vlieg soos die arend na die hemel toe!” (Spreuke 23:4, 5). Met ander woorde, dit is nie verstandig om onsself uit te put in ’n poging om ryk te word nie, want rykdom kan wegvlieg soos op ’n arend se vlerke.

Soos die Bybel toon, kan materiële rykdom gou verdwyn. Dit kan oornag verdwyn as gevolg van ’n natuurramp, ’n ekonomiese ineenstorting of ander onvoorsiene gebeurtenisse. Daarbenewens word selfs diegene wat materiële sukses behaal dikwels ontnugter. Beskou byvoorbeeld die geval van John, wie se werk behels het dat hy politici, sportfigure en koninklikes onthaal.

John sê: “Ek het alles in my werk gesit. Ek het finansieel baie goed gedoen, in luuksehotelle gebly en partykeer selfs met ’n privaat straler werk toe gegaan. In die begin het ek dit geniet, maar ek het geleidelik verveeld geraak. Die mense wat ek tevrede probeer stel het, het oppervlakkig gelyk. My lewe het geen sin gehad nie.”

Soos John uitgevind het, is ’n lewe sonder enige geestelike waardes onbevredigend. In Jesus Christus se welbekende Bergpredikasie het hy getoon hoe ’n mens blywende geluk kan geniet. Hy het gesê: “Gelukkig is dié wat bewus is van hulle geestelike behoefte, want die koninkryk van die hemele behoort aan hulle” (Matteus 5:3). Dit is dus beslis verstandig om geestelike sake eerste in ons lewe te stel. Maar ander faktore kan ook help om die lewe sinvoller te maak.

Jou gesin en vriende maak werklik saak

Sou jy die lewe geniet as jy geen kontak met jou gesin en geen intieme vriende gehad het nie? Beslis nie. Ons Skepper het ons gemaak met ’n behoefte om liefde te gee en te ontvang. Dit is een rede waarom Jesus die belangrikheid daarvan beklemtoon het om ‘ons naaste lief te hê soos onsself’ (Matteus 22:39). Die gesin is ’n gawe van God wat ons van ’n ideale milieu voorsien om onselfsugtige liefde te betoon.—Efesiërs 3:14, 15.

Hoe kan ons gesin ons lewe sinvoller maak? Wel, ’n verenigde gesin kan vergelyk word met ’n pragtige tuin wat ’n verkwikkende toevlug bied teen die druk van die daaglikse lewe. In die gesin kan ons eweneens verkwikkende kameraadskap en warmte vind wat gevoelens van eensaamheid verdryf. ’n Gesin voorsien natuurlik nie outomaties so ’n toevlug nie. Maar namate ons ons gesinsbande versterk, kom ons nader aan mekaar, en word ons lewe verryk. Die tyd en aandag wat ons byvoorbeeld daaraan bestee om liefde en respek teenoor ons huweliksmaat te betoon, is daaglikse beleggings wat uiteindelik baie goeie vrugte kan afwerp.—Efesiërs 5:33.

As ons kinders het, moet ons probeer om die regte milieu te voorsien waarin ons hulle kan grootmaak. Dit kan veeleisend wees om tyd saam met hulle deur te bring, die kommunikasiekanale oop te hou en hulle geestelik te onderrig. Maar hierdie tyd en inspanning kan ons groot bevrediging verskaf. Suksesvolle ouers beskou kinders as ’n seën, as ’n erfdeel van God waarna hulle goed moet omsien.—Psalm 127:3.

Goeie vriende kan ook tot ’n bevredigende en sinvolle lewe bydra (Spreuke 27:9). Ons kan baie vriende maak deur meegevoel te betoon (1 Petrus 3:8). Ware vriende sal ons ophelp wanneer ons struikel (Prediker 4:9, 10). En “’n ware metgesel . . . is ’n broer wat gebore word vir die tyd wanneer daar benoudheid is”.—Spreuke 17:17, NW.

Hoe bevredigend kan ware vriendskap tog wees! As ’n mens saam met ’n vriend is, is ’n sonsondergang skouspelagtiger, ’n maaltyd smaakliker en musiek aangenamer. ’n Hegte gesin en betroubare vriende is natuurlik net twee fasette van ’n sinvolle lewe. Watter ander dinge het God voorsien wat ons lewe sinvoller kan maak?

Bevrediging van ons geestelike behoefte

Soos vroeër gesê is, het Jesus Christus geluk met ’n bewustheid van ons geestelike behoefte verbind. Ons is met geestelike sowel as sedelike vermoëns geskep. Daarom verwys die Bybel na “die geestelike mens” en “die geheime persoon van die hart”.—1 Korintiërs 2:15; 1 Petrus 3:3, 4.

Volgens An Expository Dictionary of New Testament Words, deur W. E. Vine, verwys die figuurlike hart na “al die verstandelike en sedelike bedrywighede, die rasionele sowel as die emosionele elemente, van die mens”. Ter verduideliking voeg Vine by: “Met ander woorde, die hart word figuurlik gebruik vir die geheime oorspronge van die persoonlike lewe.” Dieselfde naslaanwerk sê ook dat “die hart, waar dit diep binne geleë is, ‘die verborge mens’, . . . die werklike mens bevat”.

Hoe kan ons die behoeftes van “die geestelike mens”, of “die verborge mens”, dit wil sê “die geheime persoon van die hart” bevredig? ’n Belangrike stap in daardie rigting en om ons geestelike behoefte te bevredig, is om die punt te erken wat die geïnspireerde psalmis gemaak het toe hy gesing het: “Erken dat die HERE God is: Hy het ons gemaak, en ons is syne, sy volk en die skape van sy weide” (Psalm 100:3). As ons dit erken, sal ons redelikerwys tot die slotsom kom dat ons teenoor God aanspreeklik is. As ons by “sy volk en die skape van sy weide” ingesluit wil word, moet ons in ooreenstemming met sy Woord, die Bybel, optree.

Is dit iets slegs? Nee, want ons lewe kan sinvoller wees as ons daarvan bewus is dat ons gedrag vir God saak maak. Dit spoor ons aan om beter mense te wees—beslis ’n doelwit wat die moeite werd is. “Welgeluksalig is die man wat die HERE vrees, wat ’n groot welbehae in sy gebooie het”, sê Psalm 112:1. Eerbiedige vrees vir God en opregte gehoorsaamheid aan sy gebooie kan ons lewe sinvoller maak.

Waarom gee dit ons bevrediging as ons aan God gehoorsaam is? Omdat ons ’n gewete het, ’n gawe wat God aan alle mense geskenk het. Die gewete is ’n sedelike ondersoeker wat dit wat ons gedoen het of wil doen, goedkeur of afkeur. Ons het al almal ondervind hoe vreeslik dit is wanneer ons gewete ons kwel (Romeine 2:15). Maar ons gewete kan ons ook beloon. Wanneer ons onselfsugtig teenoor God en ons medemens optree, voel ons gelukkig en tevrede. Ons vind dat ‘dit groter geluk verskaf om te gee as om te ontvang’ (Handelinge 20:35). Daar is ’n belangrike rede hiervoor.

Ons Skepper het ons so gemaak dat die begeertes en behoeftes van ons medemens ons raak. As ons ander help, maak dit ons eie hart bly. Daarbenewens verseker die Bybel ons dat God dit beskou as ’n guns wat ons aan hom bewys het wanneer ons aan iemand gee wat behoeftig is.—Spreuke 19:17.

Kan aandag aan ons geestelike behoeftes, behalwe dat dit ons innerlike bevrediging gee, ons op ’n praktiese manier help? Wel, ’n Midde-Oosterse sakeman met die naam Raymond glo dat dit kan. “My doelwit was heel eenvoudig om geld te maak”, sê hy. “Maar sedert ek in my hart aanvaar het dat daar ’n God is en dat die Bybel toon wat hy van ons verlang, is ek ’n ander man. Om ’n bestaan te maak, neem nou die tweede plek in my lewe in. Omdat ek God probeer behaag, is ek die vernietigende gevoel van haat gespaar. Hoewel my vader gedurende ’n konflik gesterf het, het ek geen begeerte om wraak te neem op diegene wat daarvoor verantwoordelik was nie.”

Soos Raymond uitgevind het, kan dit help om diep emosionele wonde te genees as ’n mens goed in die behoeftes van “die geestelike mens” voorsien. Maar tensy ons die daaglikse probleme die hoof bied, kan die lewe nie heeltemal bevredigend wees nie.

Ons kan “die vrede van God” hê

In hierdie gejaagde wêreld is daar min dae wat vlot verloop. Ongelukke gebeur, planne loop skeef en mense stel ons teleur. Hierdie terugslae kan ons ons geluk ontneem. Maar aan diegene wat Jehovah God dien, beloof die Bybel ’n innerlike tevredenheid—“die vrede van God”. Hoe verkry ons hierdie vrede?

Die apostel Paulus het geskryf: “Moet oor niks besorg wees nie, maar laat julle versoeke in alles deur gebed en smeking tesame met danksegging by God bekend word; en die vrede van God wat alle denke te bowe gaan, sal julle harte en julle verstandelike vermoëns deur middel van Christus Jesus bewaak” (Filippense 4:6, 7). Pleks van ons probleme alleen te probeer dra, moet ons vurig bid en ons daaglikse sorge op God werp (Psalm 55:23). Ons geloof dat hy reageer op sulke smekinge deur sy Seun, Jesus Christus, sal toeneem namate ons geestelik groei en sien hoe God ons help.—Johannes 14:6, 14; 2 Tessalonisense 1:3.

Nadat ons vertroue in Jehovah God, die “Hoorder van die gebed”, opgebou het, sal ons beproewinge, soos langdurige siekte, bejaardheid of die dood van ’n geliefde, beter kan verduur (Psalm 65:3). Maar om ’n waarlik sinvolle lewe te hê, moet ons ook aan die toekoms dink.

Verheug jou in die hoop vir die toekoms

Die Bybel beloof “nuwe hemele en ’n nuwe aarde”, ’n regverdige, liefdevolle hemelse regering wat oor ’n gehoorsame mensdom heers (2 Petrus 3:13). In daardie nuwe wêreld wat God belowe, sal oorlog en ongeregtigheid met vrede en geregtigheid vervang word. Dit is nie net ’n verbygaande wens nie, maar dit is ’n oortuiging wat elke dag sterker kan word. Dit is beslis goeie nuus en sekerlik ’n rede tot blydskap.—Romeine 12:12; Titus 1:2.

John, wat aan die begin gemeld is, voel nou dat sy lewe sinvoller is. “Hoewel ek nooit baie godsdienstig was nie, het ek altyd in God geglo”, sê hy. “Maar ek het niks omtrent hierdie geloof gedoen totdat twee van Jehovah se Getuies my besoek het nie. Ek het hulle bestook met vrae soos: ‘Waarom is ons hier? Wat hou die toekoms in?’ Hulle bevredigende skriftuurlike antwoorde het my vir die eerste keer in my lewe doelgerig laat voel. Dit was net die begin. Ek het ’n dors na die waarheid ontwikkel wat daartoe gelei het dat ek al my waardes verander het. Hoewel ek materieel nie meer ryk is nie, voel ek geestelik soos ’n miljoenêr.”

Soos John het jy dalk baie jare lank nie jou geestelike vermoëns gebruik nie. Maar jy kan dit opwek deur “’n wyse hart” te ontwikkel (Psalm 90:12). Met vasbeslotenheid en inspanning kan jy ware vreugde, vrede en hoop hê (Romeine 15:13). En jou lewe kan ook sinvoller wees.

[Prent op bladsy 6]

Gebed kan ons “die vrede van God” gee

[Prente op bladsy 7]

Weet jy wat gesinslewe meer bevredigend kan maak?