Verligting van hongersnood is op pad!
‘WATTER soort hongersnood?’ vra jy dalk. ’n Honger na geestelike voedsel! ’n Eertydse Hebreeuse profeet het hierdie hongersnood voorspel: “‘Kyk! Daar kom dae’, is die woord van die Soewereine Heer Jehovah, ‘en ek sal ’n honger in die land stuur, nie ’n honger na brood nie en nie ’n dors na water nie, maar om die woorde van Jehovah te hoor’” (Amos 8:11). Om die geestelike hongersnood te help verlig, is die 48 lede van die 112de klas van die Wagtoring-Bybelskool Gilead, wat in Patterson, New York, geleë is, na 19 verskillende lande op 5 vastelande en eilande van die see gestuur.
Hulle is toegerus, nie met letterlike vleis en graan nie, maar met kennis, ondervinding en opleiding. Hulle het vyf maande lank intensiewe Bybelstudie gedoen wat hulle geloof versterk het vir sendingdiens in ander lande. Op 9 Maart 2002 het die 5 554 wat die gradueringsprogram bygewoon het, met vreugde daarna geluister.
Stephen Lett, wat as ’n lid van die Bestuursliggaam van Jehovah se Getuies dien, het die program entoesiasties geopen. Hy het ’n spesiale woord van welkom gerig aan al die gaste wat van verskillende wêrelddele af gekom het. Toe het hy Jesus se woorde, “julle is die lig van die wêreld”, op die werk van die toekomstige sendelinge toegepas (Matteus 5:14). Hy het verduidelik: ‘In julle toewysings sal julle verskeie aspekte van Jehovah se wonderlike werke “verlig”, wat opregtes van hart in staat sal stel om die prag van Jehovah en sy voornemens te sien.’ Broer Lett het die sendelinge aangemoedig om die lig van God se Woord te gebruik om die duisternis van valse leerstellings bloot te stel en leiding aan waarheidsoekers te gee.
Die regte gesindheid noodsaaklik vir sukses
Ná die voorsitter se inleidingskommentare het Baltasar Perla, ’n lid van die Verenigde State se Takkomitee, die eerste van ’n reeks toesprake gehou, wat bedoel is om die gegradueerdes te help om suksesvolle sendelinge te wees. Sy tema was: “Wees moedig en sterk en tree op” (1 Kronieke 28:20). Koning Salomo van eertydse Israel het ’n veeleisende toewysing ontvang om iets te doen wat hy nog nooit gedoen het nie—om ’n tempel in Jerusalem te bou. Salomo het opgetree, en met Jehovah se ondersteuning is die tempel voltooi. Broer Perla het die les op die klas toegepas en gesê: ‘Julle het ’n nuwe toewysing ontvang, naamlik om as sendelinge te dien, en julle moet moedig en sterk wees.’ Die studente het beslis bemoediging geput uit die versekering dat Jehovah hulle nie in die steek sal laat of sal verlaat nie, solank hulle na aan hom bly. Broer Perla het die gehoor ontroer deur af te sluit met die persoonlike opmerking: ‘Julle kan as sendelinge baie bereik. Sendelinge het my en my familie die waarheid geleer!’
“Vertrou op Jehovah vir sukses” was die tema van die toespraak wat gehou is deur Samuel Herd, nog ’n lid van die Bestuursliggaam. Die studente begin nou ’n loopbaan in die sendingwerk, en hulle sukses hang in ’n groot mate af van hulle verhouding met Jehovah. Broer Herd het hulle vermaan: ‘Julle het baie kennis van die Bybel opgedoen deur middel van julle studies by Gilead. Julle het vreugdevol ontvang. Maar om werklik suksesvol te wees, moet julle nou vir ander begin gee wat julle geleer het’ (Handelinge 20:35). Die sendelinge sal baie geleenthede hê om dit te doen terwyl hulle ‘hulle uitgiet’ ten behoewe van ander.—Filippense 2:17.
Watter afskeidsraad sou die instrukteurs vir die studente hê? Mark Noumair se tema, “Sit stil totdat jy sien hoe die saak afloop”, was op Rut 3:18 gebaseer. Die spreker het die voorbeeld van Naomi en Rut gebruik en die gegradueerdes aangemoedig om volle vertroue te hê in die reëlings wat God se aardse organisasie in werking gestel het en om teokratiese gesag te respekteer. Broer Noumair het die studente se harte geraak met die woorde: ‘Daar sal dalk tye wees wanneer jy nie verstaan waarom ’n besluit wat jou raak, geneem is nie of wanneer jy dalk sterk daaroor voel dat iets op ’n ander manier gedoen moet word. Wat gaan jy doen? Gaan jy opstaan en sake in eie hande neem of gaan jy “stilsit” en op God se leiding vertrou, seker dat hy mettertyd net goed sal laat geskied?’ (Romeine 8:28). Die raad dat hulle hulle moet ‘toespits op die bevordering van Koninkryksbelange en ’n oog moet hou op wat Jehovah se organisasie doen en nie op persoonlikhede nie’, sal ongetwyfeld vir die toekomstige sendelinge waardevol wees in hulle buitelandse toewysings.
Wallace Liverance, wat self ’n sendeling was en nou as ’n Gileadinstrukteur dien, het die laaste van die eerste reeks toesprake gehou. Die tema van sy toespraak was: “Bly doelgerig, bly in God se diens.” Hy het getoon dat die profeet Daniël, uit die val van Babilon en uit Jeremia se profesie, afgelei het dat die Israeliete se bevryding uit ballingskap naby was (Jeremia 25:11; Daniël 9:2). Daniël was bewus van Jehovah se tydrooster, en dit het hom gehelp om toegespits te bly op die ontvouing van God se voorneme. In teenstelling hiermee het die Israeliete in die profeet Haggai se dag gesê: “Die tyd het nie gekom . . . nie” (Haggai 1:2). Hulle het die tye waarin hulle gelewe het, uit die oog verloor, behep geraak met hulle eie gemak en selfvervulling en opgehou met die werk waarvoor hulle uit Babilon verlos is, die herbouing van die tempel. Broer Liverance het ten slotte gesê: “Bly dus doelgerig deur Jehovah se voorneme te alle tye in gedagte te hou.”
Die Gileadinstrukteur Lawrence Bowen het as die voorsitter gedien vir ’n deel met die tema “Jehovah seën dié wat die lewende Woord gebruik” (Hebreërs 4:12). Hierdie deel het gehandel oor die velddiensondervindinge van die klas en die aandag gevestig op hoe Jehovah diegene seën wat die Bybel gebruik wanneer hulle getuig en onderrig. Die voorsitter het daarop gewys dat Jesus Christus ’n goeie voorbeeld vir alle bedienaars van God gestel het: ‘Jesus kon waarlik sê dat dit wat hy ander geleer het, nie uit homself was nie, maar dat hy God se woord gespreek het.’ Opregtes van hart het die waarheid herken en positief daarop gereageer (Johannes 7:16, 17). Dieselfde gebeur vandag.
Gileadopleiding rus ’n mens toe vir elke goeie werk
Daarna het Richard Abrahamson en Patrick LaFranca, wat al lank lede van die Bethelgesin is, ’n onderhoud gevoer met ses Gileadgegradueerdes wat nou in verskillende vertakkings van spesiale voltydse diens is. Die gegradueerdes van die 112de klas is aangemoedig toe hulle hoor dat hierdie ses voltydse bedienaars, ongeag wat hulle huidige toewysing is, nog steeds die opleiding gebruik wat hulle by Gilead ontvang het om die Bybel te bestudeer, navorsing te doen en met mense oor die weg te kom.
Theodore Jaracz, ’n lid van die Bestuursliggaam, het die hooftoespraak van die program gehou. Die tema daarvan was: “Wat bereik word as ons sataniese haat verduur.” Gedurende die afgelope vyf maande het die studente in ’n liefdevolle en teokratiese milieu gewoon. Maar soos hulle in hulle klasse geleer het, lewe ons in ’n vyandige wêreld. Jehovah se volk word regoor die wêreld aangeval (Matteus 24:9). Broer Jaracz het verskeie Bybelverslae gebruik en getoon dat ‘ons ’n spesiale teiken van die Duiwel is. Ons moet ons verhouding met Jehovah versterk en standvastig wees sodat ons die toetse kan weerstaan’ (Job 1:8; Daniël 6:4; Johannes 15:20; Openbaring 12:12, 17). Broer Jaracz het ten slotte gesê dat daar, ondanks die haat wat teen God se volk voortduur, ‘geen wapen is wat teen ons gesmee word, soos Jesaja 54:17 sê, wat enige sukses sal hê nie. Jehovah sal toesien dat ons op sy tyd en sy manier verlos word.’
Die gegradueerdes van die 112de klas van Gilead is “ten volle toegerus” en sal ongetwyfeld baie doen om die honger na geestelike voedsel te verlig in die lande waar hulle gaan dien (2 Timoteus 3:16, 17). Ons sien gretig daarna uit om verslae te ontvang van hoe hulle die heilsame boodskap aan mense in hierdie lande bring.
[Venster op bladsy 23]
KLASSTATISTIEK
Aantal lande verteenwoordig: 6
Aantal lande waarheen gestuur: 19
Aantal studente: 48
Gemiddelde ouderdom: 33,2
Gemiddelde jare in die waarheid: 15,7
Gemiddelde jare in die voltydse bediening: 12,2
[Prent op bladsy 24]
112de Gradueringsklas van die Wagtoring-Bybelskool Gilead
In die lys hieronder word rye van voor na agter genommer, en name word van links na regs in elke ry aangegee.
(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.