“Moenie bang of verskrik wees nie”
“Moenie bang of verskrik wees nie. . . . Jehovah sal met julle wees.”—2 KRONIEKE 20:17.
1. Watter uitwerking het terrorisme op mense, en waarom is hulle vrees te verstane?
TERRORISME! Die blote woord vervul mense se harte met vrees en wek gevoelens van onveiligheid en hulpeloosheid. Dit laat gemengde gevoelens van afgryse, droefheid en woede ontstaan. En baie mense vrees dat hierdie woord iets beskryf wat die mensdom nog jare lank gaan teister. Die feit dat party lande terrorisme in sy baie vorme dekades lank al met net beperkte sukses bestry, toon dat hierdie vrees geregverdig is.
2. Hoe reageer Jehovah se Getuies op die probleem van terrorisme, en tot watter vrae gee dit aanleiding?
2 Daar is nietemin gegronde rede vir hoop. Jehovah se Getuies, wat die predikingswerk in 234 lande en gebiede van die aarde doen, is baie optimisties. Hulle vrees nie dat terrorisme altyd sal bestaan nie, maar is vol vertroue dat dit wel uitgewis gaan word—en binnekort ook. Is dit realisties om so optimisties soos hulle te wees? Wie sal ooit die wêreld van hierdie euwel kan bevry, en hoe sal dit gebeur? Aangesien almal van ons waarskynlik al deur die een of ander vorm van geweld geraak is, sal dit goed wees om die grondslag vir hierdie optimisme te ondersoek.
3. Watter dinge gee aanleiding tot vrees, en wat is oor ons tyd voorspel?
3 Mense is vandag om verskeie redes bang en verskrik. Dink aan die menigtes wat weens bejaardheid nie meer vir hulleself kan sorg nie, aan mense wat weens ongeneeslike siektes wegkwyn en aan gesinne wat sukkel om ’n bestaan te maak. Trouens, dink aan die onsekerheid van die lewe self! Dit lyk dalk of ’n skielike dood weens ’n ongeluk of ’n ramp om elke hoek en draai op ons wag, om ons te beroof van alles wat vir ons kosbaar is. Sulke vrees en angs, tesame met talle persoonlike konflikte en teleurstellings, het gemaak dat ons tyd presies is soos die apostel Paulus beskryf het: “Weet dít, dat daar in die laaste dae kritieke tye sal wees wat moeilik is om deur te kom. Want mense sal liefhebbers van hulleself wees, . . . sonder natuurlike geneentheid, nie bereid tot enige ooreenkoms nie, kwaadsprekers, sonder selfbeheersing, wreedaardig, sonder liefde vir die goeie.”—2 Timoteus 3:1-3.
4. Watter positiewe aspek bevat die somber prentjie in 2 Timoteus 3:1-3?
4 Hoewel hierdie teks ’n somber prentjie skilder, bied dit nogtans hoop. Let op dat die kritieke tye “in die laaste dae” van Satan se huidige goddelose stelsel van dinge sou bestaan. Dit beteken dat verligting op hande is en dat die goddelose wêreldstelsel binnekort vervang sal word deur die heerskappy van die volmaakte Koninkryk van God, waarvoor Jesus sy volgelinge leer bid het (Matteus 6:9, 10). Daardie Koninkryk is God se hemelse regering, wat “nooit vernietig sal word nie”, sê die profeet Daniël, maar “dit sal al hierdie [menslike] koninkryke verbrysel en daar ’n einde aan maak, en self sal dit tot onbepaalde tye bly staan”.—Daniël 2:44.
Christelike neutraliteit versus terrorisme
5. Hoe het nasies in onlangse tye op die bedreiging van terrorisme gereageer?
5 Terrorisme eis al dekades lank duisende lewens. Wêreldwye bewustheid van hierdie gevaar het aansienlik toegeneem ná die aanvalle in die stad New York en Washington, DC, op 11 September 2001. Met die oog op die erns en wêreldwye omvang van terrorisme het nasies regoor die aarde gou saamgespan om dit te bestry. Byvoorbeeld, volgens mediaberigte het “die ministers van buitelandse sake van 55 Europese, Noord-Amerikaanse en Sentraal-Asiatiese lande [op 4 Desember 2001] eenparig ’n plan aangeneem” met die doel om hulle pogings te koördineer. ’n Hooggeplaaste Amerikaanse amptenaar het hierdie optrede geloof en gesê dat dit “nuwe stukrag” gee aan die stryd teen terrorisme. Skielik het honderdmiljoene mense betrokke geraak by wat The New York Times Magazine “die begin van ’n epiese stryd” genoem het. Hoe suksesvol hierdie pogings sal wees, moet ons nog sien. Die gevolge van so ’n oorlog teen terreur het egter vrees en angs by baie gewek, maar nie by diegene wat op Jehovah vertrou nie.
6. (a) Waarom vind party dit soms moeilik om Jehovah se Getuies se standpunt van Christelike neutraliteit te verstaan? (b) Watter voorbeeld het Jesus vir sy volgelinge gestel wat politieke bedrywighede betref?
6 Jehovah se Getuies is welbekend vir hulle neutraliteit op politieke gebied. Hoewel die meeste mense moontlik bereid is om so ’n standpunt in vredestye te aanvaar, raak hulle minder verdraagsaam wanneer buitengewone omstandighede ontstaan. Vrees en onsekerheid wat deur oorlog veroorsaak word, gee dikwels aanleiding tot ’n sterk gevoel van nasionalisme. Dit maak dit dalk vir sommige moeilik om te verstaan waarom enigiemand onwillig is om volksbewegings te ondersteun. Ware Christene weet egter dat hulle Jesus se opdrag moet gehoorsaam om “geen deel van die wêreld” te wees nie (Johannes 15:19; 17:14-16; 18:36; Jakobus 4:4). Dit vereis dat hulle neutraal bly in politieke en maatskaplike aangeleenthede. Jesus het die regte voorbeeld gestel. Met sy volmaakte wysheid en uitsonderlike vermoëns kon hy ’n besondere bydrae tot die menseaangeleenthede van sy dag gelewer het. Maar hy het geweier om by die politiek betrokke te raak. Aan die begin van sy bediening het hy Satan se aanbod van heerskappy oor al die koninkryke van die wêreld ronduit verwerp. Later het hy met beslistheid geweier om ’n politieke amp te aanvaar.—Matteus 4:8-10; Johannes 6:14, 15.
7, 8. (a) Wat beteken Jehovah se Getuies se neutrale standpunt ten opsigte van die politiek nie, en waarom nie? (b) Hoe word deelname aan gewelddadige optrede teen regerings deur Romeine 13:1, 2 uitgesluit?
7 Die neutrale standpunt wat Jehovah se Getuies inneem, moet nie verkeerdelik beskou word as ’n bewys dat hulle gewelddade steun of goedkeur nie. As hulle dit sou doen, sou dit strydig wees met hulle bewering dat hulle knegte van “die God van liefde en van vrede” is (2 Korintiërs 13:11). Hulle het geleer hoe Jehovah oor geweld voel. Die psalmis het geskryf: “Jehovah ondersoek die regverdige sowel as die goddelose, en Sy siel haat beslis elkeen wat geweld liefhet” (Psalm 11:5). Hulle is ook bewus van Jesus se woorde aan die apostel Petrus: “Sit jou swaard terug in sy plek, want almal wat die swaard opneem, sal deur die swaard vergaan.”—Matteus 26:52.
8 Hoewel die geskiedenis duidelik toon dat valse Christene hulle dikwels tot “die swaard” gewend het, is dit nie waar van Jehovah se Getuies nie. Hulle neem nie aan enige van hierdie bedrywighede deel nie. Die Getuies gehoorsaam getrou die opdrag in Romeine 13:1, 2: “Laat elke siel onderdanig wees aan die hoër owerhede [regerings], want daar is geen gesag behalwe deur God nie; die bestaande owerhede is deur God in hulle relatiewe posisies geplaas. Daarom het hy wat die owerheid teëstaan, teen die reëling van God stelling ingeneem; dié wat daarteen stelling ingeneem het, sal ’n oordeel oor hulle ontvang.”
9. Op watter twee maniere bestry Jehovah se Getuies terrorisme?
9 Maar moet Jehovah se Getuies nie iets doen om terrorisme te help bestry, aangesien dit so boos is nie? Ja, hulle moet, en hulle doen dit ook. Eerstens neem hulle self nie aan enige terreurdaad deel nie. Tweedens leer hulle mense Christelike beginsels wat hulle alle vorme van geweld laat verwerp as hulle dit toepas.a Verlede jaar het die Getuies 1 202- 381 302 uur daaraan bestee om mense te help om met hierdie Christelike weg bekend te word. Dit was nie verkwiste tyd nie, want as gevolg van hierdie werk is 265 469 persone as Getuies van Jehovah gedoop, waardeur hulle in die openbaar getoon het dat hulle geweld geheel en al verwerp.
10. Wat is die kanse dat geweld in vandag se wêreld uit die weg geruim sal word?
10 Boonop erken Jehovah se Getuies dat hulle op hulle eie nooit die wêreld van boosheid kan bevry nie. Daarom stel hulle algehele vertroue in die een wat dit wel kan doen—Jehovah God (Psalm 83:18). Ten spyte van opregte pogings kan mense nie ’n einde aan geweld maak nie. Die geïnspireerde Bybelskrywer het ons vooraf oor ons tyd, “die laaste dae”, gewaarsku en gesê: “Goddelose mense en bedrieërs sal voortgaan van kwaad tot erger, terwyl hulle mislei en mislei word” (2 Timoteus 3:1, 13). Uit hierdie oogpunt gesien, is die kanse dat mense die stryd teen boosheid sal wen, uiters skraal. Daarenteen kan ons op Jehovah vertrou om geweld heeltemal en vir altyd uit die weg te ruim.—Psalm 37:1, 2, 9-11; Spreuke 24:19, 20; Jesaja 60:18.
Vreesloos ondanks ’n naderende aanval
11. Watter stappe het Jehovah reeds gedoen om ’n einde aan geweld te maak?
11 Aangesien die God van vrede geweld haat, kan ons verstaan waarom hy stappe begin doen het om die hoofoorsaak daarvan, Satan die Duiwel, te vernietig. Trouens, God het reeds deur die aartsengel Migael—sy pas gekroonde Koning, Christus Jesus—Satan ’n verpletterende nederlaag toegedien. Die Bybel beskryf dit so: “Oorlog het in die hemel uitgebreek: Migael en sy engele het teen die draak geveg, en die draak en sy engele het geveg, maar hy het nie geseëvier nie, en ook is daar vir hulle geen plek meer in die hemel gevind nie. Toe is die groot draak neergeslinger, die oorspronklike slang, die een wat Duiwel en Satan genoem word, wat die hele bewoonde aarde mislei; hy is na die aarde neergeslinger, en sy engele is saam met hom neergeslinger.”—Openbaring 12:7-9.
12, 13. (a) Wat is betekenisvol omtrent die jaar 1914? (b) Wat voorspel Esegiël se profesie vir ondersteuners van God se Koninkryk?
12 Bybelchronologie sowel as wêreldgebeure dui op die jaar 1914 as die tyd toe daardie oorlog in die hemel plaasgevind het. Sedertdien het wêreldtoestande net al hoe erger geword. Openbaring 12:12 verduidelik waarom en sê: “Daarom, wees bly, o hemele en julle wat daarin woon! Wee die aarde en die see, want die Duiwel het na julle toe neergedaal en het groot toorn, omdat hy weet dat hy ’n kort tydjie het.”
13 Dit is te verstane dat die Duiwel se toorn hoofsaaklik gerig is teen God se gesalfde aanbidders en hulle metgeselle, die “ander skape” (Johannes 10:16; Openbaring 12:17). Hierdie teenstand sal binnekort ’n hoogtepunt bereik wanneer die Duiwel ’n venynige aanval loods teen almal wat God se opgerigte Koninkryk ondersteun en vertroue daarin stel. Hierdie volskaalse aanval word in Esegiël hoofstuk 38 beskryf as ’n aanval deur “Gog van die land Magog”.
14. Hoe is Jehovah se Getuies in die verlede beskerm, en sal dit altyd die geval wees?
14 Sedert Satan uit die hemel gewerp is, is God se knegte soms teen Satan se aanvalle beskerm deur die pogings van sekere politieke elemente, wat in Openbaring 12:15, 16 in simboliese taal beskryf word. In teenstelling hiermee wys die Bybel daarop dat geen menslike instansie gedurende Satan se finale aanval diegene wat hulle vertroue in Jehovah stel, sal verdedig nie. Moet dit Christene bang of verskrik laat voel? Beslis nie!
15, 16. (a) Jehovah se gerusstellende woorde aan sy volk in die dae van Josafat gee hedendaagse Christene watter rede vir optimisme? (b) Watter voorbeeld het Josafat en die volk vir God se hedendaagse knegte gestel?
15 God sal sy knegte ondersteun so seker as wat hy sy tipiese nasie in koning Josafat se dag ondersteun het. Ons lees: “Skenk aandag, o hele Juda en inwoners van Jerusalem en koning Josafat! Só het Jehovah vir julle gesê: ‘Moenie bang of verskrik wees weens hierdie groot menigte nie; want die stryd is nie julle s’n nie, maar God s’n. . . . Julle sal in hierdie geval nie hoef te veg nie. Neem stelling in, staan stil en sien die redding van Jehovah ten behoewe van julle. O Juda en Jerusalem, moenie bang of verskrik wees nie. Trek môre teen hulle uit, en Jehovah sal met julle wees.’”—2 Kronieke 20:15-17.
16 Die volk van Juda is verseker dat hulle nie sou hoef te veg nie. Net so ook sal God se knegte nie die wapen opneem om hulleself te verdedig wanneer hulle deur Gog van Magog aangeval word nie. Hulle sal eerder ‘stilstaan en die redding van Jehovah ten behoewe van hulle sien’. Die feit dat hulle stilstaan, beteken natuurlik nie dat hulle hoegenaamd niks sal doen nie, net soos God se volk in die dae van Josafat ook nie niks gedoen het nie. Ons lees: “Dadelik het Josafat laag gebuig met sy gesig na die aarde, en die hele Juda en die inwoners van Jerusalem het voor Jehovah neergeval om hulde aan Jehovah te bewys. . . . Verder het [Josafat] met die volk beraadslaag en sangers tot Jehovah opgestel en dié wat in heilige feesgewaad lof gebring het terwyl hulle voor die gewapende manne uit gegaan en gesê het: ‘Loof Jehovah, want sy liefderyke goedhartigheid is tot onbepaalde tyd’” (2 Kronieke 20:18-21). Ja, selfs ondanks die vyand se aanval het die volk aangehou om Jehovah daadwerklik te loof. Dit is die voorbeeld wat Jehovah se Getuies moet volg wanneer Gog sy aanval teen hulle loods.
17, 18. (a) Watter positiewe gesindheid weerspieël Jehovah se Getuies vandag wat Gog se aanval betref? (b) Watter herinnering is onlangs aan jong Christene gegee?
17 Tot dan—en selfs nadat Gog se aanval begin het—sal Jehovah se Getuies voortgaan om God se Koninkryk te ondersteun. Hulle sal voortgaan om krag en beskerming te vind in hulle omgang met die meer as 94 600 gemeentes regoor die wêreld (Jesaja 26:20). Wat ’n geleë tyd om Jehovah moedig te loof! Die feit dat hulle Gog se naderende aanval verwag, laat hulle beslis nie terugdeins uit vrees nie. Dit spoor hulle eerder aan om na die beste van hulle vermoë ’n groter lofoffer te bring.—Psalm 146:2.
18 Hierdie positiewe gesindheid word goed weerspieël deur duisende jongmense regoor die wêreld wat die voltydse bediening betree het. Om te toon hoeveel beter die keuse van so ’n lewensweg is, is die traktaat Jongmense—Wat gaan julle met julle lewe doen? by die streekbyeenkomste in 2002 vrygestel. Christene, jonk en oud, is dankbaar vir sulke tydige herinneringe.—Psalm 119:14, 24, 99, 119, 129, 146.
19, 20. (a) Waarom het Christene geen rede om bang of verskrik te wees nie? (b) Wat sal die volgende studieartikel doen?
19 Ten spyte van wêreldtoestande hoef Christene nie bang of verskrik te wees nie. Hulle weet dat Jehovah se Koninkryk binnekort alle vorme van geweld vir ewig en altyd uit die weg sal ruim. Hulle put ook vertroosting uit die wete dat die opstanding lewe sal teruggee aan baie wat dit deur geweld verloor het. Terwyl dit party vir die eerste keer die geleentheid sal gee om van Jehovah te leer, sal dit ander in staat stel om hulle toegewyde diens aan hom voort te sit.—Handelinge 24:15.
20 As ware Christene besef ons hoe belangrik dit is om Christelike neutraliteit te handhaaf, en ons is vasbeslote om dit te doen. Ons wil vashou aan die wonderlike vooruitsig om ‘stil te staan en die redding van Jehovah te sien’. Die volgende artikel sal ons geloof versterk deur ons bewus te maak van hedendaagse gebeure wat progressief verdere insig in die vervulling van Bybelprofesieë gee.
[Voetnoot]
a Sien die Ontwaak! van 22 Maart 1990, bladsy 21, en 8 Augustus 1991, bladsy 18, asook Die Wagtoring van 1 Januarie 1996, bladsy 5, en 1 Augustus 1998, bladsy 5, vir voorbeelde van persone wat ’n lewe van geweld die rug toegekeer het om Getuies te word.
Kan jy verduidelik?
• Waarom is baie mense vandag so pessimisties?
• Waarom is Jehovah se Getuies optimisties oor die toekoms?
• Wat het Jehovah reeds gedoen in verband met die oorsaak van alle geweld?
• Waarom het ons geen rede om Gog se aanval te vrees nie?
[Prent op bladsy 13]
Jesus het die regte voorbeeld van Christelike neutraliteit gestel
[Prente op bladsy 16]
Duisende jong Getuies het die voltydse bediening met vreugde betree
[Foto-erkenning op bladsy 12]
UN PHOTO 186226/M. Grafman