Is daar net een ‘ware kerk’?

“NET soos daar een Christus is, so is daar een liggaam van Christus, een Bruid van Christus: ‘een Katolieke en apostoliese Kerk’.”—Dominus Iesus.

Dit is hoe ’n Rooms-Katolieke kardinaal, Joseph Ratzinger, sy kerk se leer dat daar net een ware kerk kan wees, uiteengesit het. Daardie kerk, het hy gesê, is die “een Kerk van Christus, wat die Katolieke Kerk is”.

‘Nie Kerke in die ware sin nie’

Hoewel pous Johannes-Paulus II nadruklik beweer het dat die dokument Dominus Iesus “geen aanmatigende of minagtende toon teenoor ander godsdienste” bevat nie, het Protestantse kerkleiers hulle sterk daarteen uitgespreek. Byvoorbeeld, tydens die Presbiteriaanse Algemene Vergadering wat in Junie 2001 in Belfast, Noord-Ierland, gehou is, het een geestelike gesê dat die dokument die werk was van “’n invloedryke groep in die Rooms-Katolieke Kerk . . . wat baie benoud is oor die verdraagsame gees wat deur Vatikaan II ingelui is”.

Robin Eames, die Aartsbiskop van die Kerk van Ierland, het gesê dat hy “bitter teleurgesteld” sou wees as die dokument “’n terugkeer tot die tyd voor Vatikaan II” is. In ’n kommentaar oor die Vatikaan se bewering dat kerke wat sekere Katolieke leerstellings verwerp, “nie Kerke in die ware sin is nie”, het Eames gesê: “Dit klink vir my na ’n belediging.”

Wat het aanleiding gegee tot Dominus Iesus? Die Rooms-Katolieke Kurie was blykbaar bekommerd oor wat al godsdiensrelativisme genoem is. The Irish Times sê dat “die ontstaan van ’n veelvoudige teologie—die gedagte dat een godsdiens net so goed soos ’n ander is, . . . kardinaal Ratzinger al hoe meer hoofbrekens besorg het”. Dit wil voorkom of hierdie beskouing aanleiding gegee het tot sy kommentare oor een ware kerk.

Maak dit saak aan watter kerk jy behoort?

“Godsdiensrelativisme” of “veelvoudige teologie” is natuurlik vir party baie redeliker en aantrekliker as enige bewering dat daar net een ware kerk kan wees. Vir hulle behoort godsdiens bloot ’n kwessie van persoonlike voorkeur te wees. ‘Op die ou end’, sê hulle, ‘maak dit nie werklik saak aan watter kerk jy behoort nie.’

Dit klink dalk na ’n verdraagsamer beskouing—hoewel een van die gevolge daarvan was dat godsdiens in tallose verskillende gelowe versplinter het. ‘Hierdie uiteenlopendheid in godsdiens’, sê baie, ‘is bloot ’n gesonde manier om uiting te gee aan individuele vryheid.’ Volgens die skrywer Steve Bruce is sulke “godsdiensverdraagsaamheid” egter niks anders as “godsdiensonverskilligheid” nie.—A House Divided: Protestantism, Schism, and Secularization.

Wat is dan die regte beskouing? Is daar net een ware kerk? Is dit die Rooms-Katolieke Kerk? Is ander kerke net so aanneemlik vir God? Aangesien hierdie vrae ons verhouding met ons Skepper raak, is dit beslis belangrik dat ons sy beskouing oor die saak kry. Hoe kan ons dit doen? Deur God se geïnspireerde Woord, die Bybel, te ondersoek (Handelinge 17:11; 2 Timoteus 3:16, 17). Kom ons kyk wat dit sê oor die onderwerp van een ware kerk.

[Foto-erkenning op bladsy 2]

VOORBLAD: Mark Gibson/Index Stock Photography