Armageddon​—God se oorlog wat alle oorloë sal beëindig

“Hulle beskou dit as afskuwelik om ’n medemens dood te maak; daarom is oorlog in hulle oë iets onbegrypliks en afstootliks, waarvoor daar nie ’n woord in hulle taal is nie.”—BESKRYWING VAN DIE INNUÏT-VOLK VAN GROENLAND DEUR DIE NOORSE ONTDEKKINGSREISIGER FRIDTJOF NANSEN IN 1888.

WIE sal nie graag in ’n gemeenskap wil lewe waar oorlog iets “onbegrypliks en afstootliks” is nie? Wie smag nie na ’n wêreld waar daar nie eers ’n woord vir oorlog is nie omdat oorlogvoering onbekend is? So ’n wêreld klink dalk vergesog, veral as ons ons hoop op mense stel om dit teweeg te bring.

Maar in Jesaja se profesie belowe God self om so ’n wêreld tot stand te bring: “Hulle sal van hulle swaarde ploegskare moet smee en van hulle spiese snoeimesse. Nasie sal nie teen nasie die swaard ophef nie, en ook sal hulle nie meer leer om oorlog te voer nie.”—Jesaja 2:4.

Dit is duidelik dat vandag se wêreld met sy 20 miljoen soldate in aktiewe diens en omtrent 20 oorloë wat tans woed, wesenlik sal moet verander voordat hierdie belofte vervul kan word. Dit is nie verbasend nie dat die almagtige God, Jehovah, in menseaangeleenthede sal moet ingryp. Hierdie ingryping deur Jehovah bereik ’n klimaks in wat die Bybel Armageddon noem.—Openbaring 16:14, 16.

Hoewel die woord “Armageddon” in onlangse jare gebruik is om na ’n wêreldwye kernoorlog te verwys, omskryf een woordeboek die hoofbetekenis van die woord soos volg: “Die plek van ’n groot en finale stryd tussen die magte van goed en kwaad.” Sal die goeie ooit die kwaad oorwin, of is so ’n stryd blote fantasie?

Ons kan moed skep deur daarop te let dat die Bybel herhaaldelik praat van die einde van goddeloosheid. “Die sondaars sal van die aarde af uitgewis word”, voorspel die psalmis. “Wat die goddeloses betref, hulle sal daar nie meer wees nie” (Psalm 104:35). “Die regskapenes sal op die aarde woon, en die onberispelikes sal daarop oorbly”, sê die boek Spreuke. “Wat die goddeloses betref, hulle sal van die aarde af uitgeroei word; en die verraderlikes sal daarvan weggeruk word.”—Spreuke 2:21, 22.

Die Bybel maak dit ook duidelik dat die goddeloses hulle mag nie sonder ’n geveg sal opgee nie; daarom is ’n beslissende daad van God nodig om alle kwaad, insluitende die euwel van oorlog, uit te wis (Psalm 2:2). Die naam wat die Bybel aan hierdie unieke oorlog gee, Armageddon, is uiters betekenisvol.

Vorige veldslae naby Megiddo

Die woord “Armageddon” beteken “die berg Megiddo”. Die eertydse stad Megiddo, tesame met die omliggende Jisreëlvlakte, het ’n lang geskiedenis van beslissende veldslae. “Regdeur die geskiedenis was Megiddo en die Jisreëlvallei ’n plek waar veldslae gevoer is wat die loop van die beskawing bepaal het”, skryf die geskiedkundige Eric H. Cline in The Battles of Armageddon.

Soos Cline toon, was die veldslae wat naby Megiddo gevoer is, dikwels beslissend. Mongoolse leërmagte, wat in die 13de eeu ’n groot deel van Asië verower het, het hulle eerste nederlaag in hierdie vallei gely. Nie ver van Megiddo af nie het Britse troepe onder generaal Edmund Allenby die Turke gedurende die Eerste Wêreldoorlog verslaan. ’n Militêre geskiedkundige het Allenby se oorwinning beskryf as “een van die kortste beslissende veldtogte en een van die beslissendste veldslae in die hele geskiedenis”.

Beslissende veldslae in die Bybel is ook naby Megiddo gevoer. Die rigter Barak het die Kanaänitiese leër van Sisera daar oorwin (Rigters 4:14-16; 5:19-21). Gideon het in dié omgewing, met ’n klein groepie van 300 man, ’n ontsaglike Midianitiese krygsmag op die vlug gejaag (Rigters 7:19-22). Koning Saul en sy seun Jonatan het op die nabygeleë berg Gilboa gesterf toe ’n Filistynse krygsmag die Israelitiese leër verslaan het.—1 Samuel 31:1-7.

Weens die strategiese ligging van Megiddo en die aangrensende vallei is tientalle veldslae oor die afgelope 4 000 jaar daar gevoer. Een geskiedkundige het ten minste 34 getel!

Megiddo se geskiedenis en sy strategiese ligging hou ongetwyfeld verband met die figuurlike gebruik van die woord “Armageddon”. Hoewel hierdie woord net een keer in die Bybel voorkom, maak die konteks daarvan in die boek Openbaring dit baie duidelik dat Armageddon die lewe van elke persoon op aarde sal raak.

Armageddon volgens die Bybel

Hoewel baie oorloë wat in die verlede naby Megiddo gevoer is, beslissend was, het nie een goddeloosheid uit die weg geruim nie. In nie een het die magte van goed en kwaad in absolute sin teen mekaar geveg nie. So ’n oorlog moet logieserwys sy oorsprong by God hê. Soos Jesus eenkeer gesê het: “Niemand is goed nie, behalwe een, God” (Lukas 18:19). Verder verwys die Bybel spesifiek na Armageddon as God se oorlog.

In die Bybel sê die boek Openbaring dat “die konings van die hele bewoonde aarde” versamel sal word “vir die oorlog van die groot dag van God die Almagtige” (Openbaring 16:14). Die profetiese verslag voeg dan by: “En hulle het hulle versamel na die plek wat in Hebreeus Har–Magedon [of, Armageddon] genoem word” (Openbaring 16:16).a Later verduidelik Openbaring dat “die konings van die aarde en hulle leërs versamel” sal word “om die oorlog te voer teen die een wat op die perd sit en teen sy leër” (Openbaring 19:19). Hierdie ruiter word geïdentifiseer as niemand anders nie as Jesus Christus.—1 Timoteus 6:14, 15; Openbaring 19:11, 12, 16.

Wat moet ons uit hierdie verse aflei? Dat Armageddon ’n oorlog tussen God en die strydmagte van die ongehoorsame mensdom is. Waarom sal Jehovah en sy Seun, Jesus Christus, so ’n oorlog voer? Om maar een ding te noem, Armageddon sal “die verderwers van die aarde . . . verderf” (Openbaring 11:18). Ook sal dit ’n vreedsame wêreld inlui, “’n nuwe aarde wat ons volgens sy [God se] belofte verwag”, waarin “regverdigheid [sal] woon”.—2 Petrus 3:13.

Waarom is Armageddon nodig?

Vind jy dit moeilik om te dink dat Jehovah, ’n “God van liefde”, sy Seun, die “Vredevors”, sal aanstel om ’n oorlog te voer? (2 Korintiërs 13:11; Jesaja 9:6). As jy hulle beweegredes verstaan, sal dit sake beslis duidelik maak. Die boek Psalms beskryf Jesus as ’n berede krygsman. Waarom veg hy? Christus ry, verduidelik die psalmis, “ter wille van waarheid en nederigheid en regverdigheid”. Hy voer oorlog omdat hy regverdigheid liefhet en goddeloosheid haat.—Psalm 45:4, 7.

Die Bybel beskryf ook Jehovah se reaksie op die ongeregtigheid wat hy in die wêreld van vandag sien. “Die HERE het dit gesien, en hy is ontevrede omdat daar geen geregtigheid is nie”, skryf die profeet Jesaja. “Hy sal geregtigheid dra soos ’n pantser, en reddingskrag soos ’n helm. Hy sal hom beklee met die sterk begeerte om sake reg te stel en om te straf en die onregte wat mense ly, te vergeld.”—Jesaja 59:15, 17, Today’s English Version.

So lank as wat goddelose mense regeer, sal regverdige mense nie vrede en veiligheid geniet nie (Spreuke 29:2; Prediker 8:9). Dit is onrealisties om te dink dat ons korrupsie en goddeloosheid kan skei van mense wat dit beoefen. Blywende vrede en geregtigheid kom dus teen ’n prys—die verwydering van die goddeloses. “Die goddelose is ’n losprys vir die regverdige”, het Salomo geskryf.—Spreuke 21:18.

Aangesien God die Regter is, kan ons seker wees dat die oordele teen die goddeloses altyd regverdig sal wees. “Sal die Regter van die hele aarde nie doen wat reg is nie?” het Abraham gevra. Die antwoord is, soos Abraham uitgevind het, dat Jehovah altyd reg is! (Genesis 18:25). Wat meer is, die Bybel verseker ons dat Jehovah geen behae daarin skep om die goddeloses te vernietig nie; hy doen dit net as ’n laaste uitweg.—Esegiël 18:32; 2 Petrus 3:9.

Neem Armageddon ernstig op

Aan wie se kant sal ons in hierdie beslissende oorlog wees? Die meeste van ons neem outomaties aan dat ons aan die kant van die magte van die goeie is. Maar hoe kan ons daarvan seker wees? “Soek regverdigheid, soek sagmoedigheid”, spoor die profeet Sefanja ons aan (Sefanja 2:3). Die wil van God is dat “alle soorte mense gered moet word en tot juiste kennis van die waarheid moet kom”, sê die apostel Paulus.—1 Timoteus 2:4.

Die eerste stap tot redding is om die waarheid te leer omtrent Jehovah en sy voorneme om die aarde van goddeloosheid te bevry. Die tweede stap is om regverdigheid te beoefen, wat vir ons God se guns en beskerming meebring.

As ons hierdie belangrike stappe neem, kan ons in werklikheid uitsien na Armageddon, ’n oorlog wat inderdaad ’n einde aan menseoorloë sal maak. Wanneer hierdie oorlog verby is, sal mense regoor die aarde oorlog as iets onbegrypliks en afstootliks beskou. “Hulle sal nooit weer leer om oorlog te voer nie.”—Jesaja 2:4, New American Standard Bible.

[Voetnoot]

[Lokteks op bladsy 5]

God se ingryping in menseaangeleenthede word Armageddon genoem

[Prent op bladsy 6]

Megiddo

[Prent op bladsy 6]

Gideon en sy manne het ’n beslissende veldslag naby Megiddo gewen

[Prent op bladsy 6, 7]

Wanneer Armageddon verby is, sal mense regoor die aarde oorlog as iets onbegrypliks en afstootliks beskou

[Prent op bladsy 8]

Die eerste stap tot redding is om die waarheid omtrent Jehovah en sy voorneme te leer