Branch Letter

Liewe Koninkryksverkondigers

“God het dit deurentyd laat groei” (1 Kor. 3:6). Hoe opwindend was dit tog om gedurende die 2003-diensjaar die groei te sien in die gebied waarna die takkantoor in Suid-Afrika omsien.

April was ’n uitstekende maand! Suid-Afrika het nuwe hoogtepunte gehad met 73 456 verkondigers en 97 066 Bybelstudies; Namibië 1 725 Bybelstudies, 26 216 ure, 18 811 tydskrifte en 9 130 herbesoeke; Lesotho 2 942 verkondigers en 4 220 Bybelstudies en Botswana 1 288 verkondigers. Ook die broers in Swaziland en St. Helena word geprys vir hulle harde werk.

Jehovah seën die werk onder die dowes. Die eerste gebaretaalgemeente is op 1 Julie in Johannesburg gestig en sal na die dowes in die grootste deel van Gauteng omsien. Die gebaretaalgroepe in Kaapstad, Durban, Windhoek en Gaborone maak ook goeie vordering.

Teen die einde van Julie is 35 nuwe Koninkryksale toegewy en nog baie is in aanbou. Die 25 Streekboukomitees en die baie vrywilligers word bedank vir die waardevolle diens wat hulle lewer.

Die drukkery by Roodekrans word tans vergroot ten einde lektuur vir die groeiende veld te voorsien. Die kontrakteurs vorder goed, en die uitbreiding behoort vroeg in 2004 voltooi te wees. ’n Groot, ultramoderne drukpers sal na verwagting teen April 2004 hier wees. Hierdie pers sal tot 25 tydskrifte per sekonde kan druk. Nuwe toerusting vir ’n boekbindery sal ook gedurende 2004 geïnstalleer word.

Noudat ons die 2004-diensjaar ingaan, bid ons saam met julle dat Jehovah ‘dit deurentyd sal laat groei’.

Julle broers

Suid-Afrikaanse takkantoor