Ons lesers vra
Was die Vloed van Noag se dag werklik ’n wêreldwye vloed?
Die Vloed van Noag se dag het meer as 4 000 jaar gelede plaasgevind. Daar is dus geen ooggetuies op aarde om ons daarvan te vertel nie. Maar daar is ’n geskrewe verslag van daardie ramp, wat sê dat die vloedwater die hoogste berg van daardie tyd bedek het.
Daardie geskiedkundige verslag sê: “Die sondvloed het veertig dae op die aarde voortgeduur . . . En die waters het die aarde so erg oorweldig dat al die hoë berge wat onder die ganse hemel was, bedek is. Tot vyftien el [ongeveer 6,5 meter] bokant hulle het die waters hulle oorweldig, en die berge is bedek.”—Genesis 7:17-20.
Party wonder dalk of die verhaal dat die hele aarde deur water bedek is ’n mite of ten minste ’n oordrywing is. Glad nie! Trouens, in sekere mate is die aarde nog steeds oorstroom. Seewater bedek ongeveer 71 persent van die aardoppervlak. In werklikheid is die vloedwater dus nog steeds hier. En as die gletsers en poolkappe sou smelt, sou die seevlak styg en stede soos New York en Tokio bedek.
Geoloë wat die landskap van die noordwestelike Verenigde State bestudeer, meen dat tot 100 rampspoedige vloede die gebied in die verre verlede oorstroom het. Blykbaar het daar tydens een van hierdie vloede ’n muur van water wat 600 meter hoog was en teen 105 kilometer per uur voortbeweeg het, met verwoestende krag deur die gebied gestroom—’n vloed van 2 000 kubieke kilometer water wat meer as tweebiljoen ton geweeg het. Soortgelyke bevindings het ander wetenskaplikes daarvan oortuig dat ’n wêreldwye vloed ’n besliste moontlikheid is.
Vir diegene wat glo dat die Bybel God se Woord is, is ’n wêreldwye vloed egter meer as ’n moontlikheid. Dit is ’n feit. Jesus het vir God gesê: “U woord is die waarheid” (Johannes 17:17). Die apostel Paulus het geskryf dat dit God se wil is dat “alle soorte mense gered moet word en tot juiste kennis van die waarheid moet kom” (1 Timoteus 2:3, 4). Hoe kon Paulus volgelinge van Jesus die leerstellige waarheid omtrent God leer as Sy Woord mites bevat?
Jesus het nie net geglo dat die Vloed plaasgevind het nie, maar hy het ook geglo dat dit ’n wêreldwye vloed was. In sy groot profesie oor sy teenwoordigheid en die einde van hierdie stelsel van dinge het hy daardie gebeure met Noag se tyd vergelyk (Matteus 24:37-39). Die apostel Petrus het ook oor die vloedwater in Noag se dag geskryf: “Deur dié middele is die wêreld van daardie tyd vernietig toe dit met water oorstroom is.”—2 Petrus 3:6.
As Noag ’n mitiese figuur en ’n wêreldwye vloed ’n fabel was, sou die waarskuwings wat Petrus en Jesus vir mense in die laaste dae gegee het, sinloos wees. In plaas daarvan om as ’n waarskuwing te dien, sou dit mense se geestelike sinne eerder verwar en hulle kanse om ’n groter verdrukking as Noag se Vloed te oorleef, in gevaar stel.—2 Petrus 3:1-7.
Toe God oor sy blywende barmhartighede teenoor sy volk gepraat het, het hy gesê: “Net soos ek gesweer het dat die waters van Noag nie weer oor die aarde sal gaan nie, so het ek gesweer dat ek nie verontwaardig teenoor jou sal raak of jou sal bestraf nie.” Net so seker as wat die Vloed van Noag se dag die aarde oorweldig het, so seker is dit dat God se liefderyke goedhartigheid met diegene sal wees wat op hom vertrou.—Jesaja 54:9.