Jehovah is ‘Die Een wat aan ons ontkoming verskaf’

“Jehovah sal hulle help en aan hulle ontkoming verskaf.”—PS. 37:40.

1, 2. Watter grondwaarheid aangaande Jehovah is vir ons ’n bron van vertroosting en krag?

SKADUWEES wat deur die son geskep word, staan nie stil nie. Terwyl die aarde draai, beweeg en verander die skaduwees voortdurend. Maar die Skepper van die aarde en son verander nie (Mal. 3:6). “By hom”, sê die Bybel, “is daar geen verandering van die draaiing van die skaduwee nie” (Jak. 1:17). Hierdie grondwaarheid aangaande Jehovah is waarlik vir ons ’n bron van vertroosting en krag, veral wanneer ons voor moeilike beproewinge en uitdagings te staan kom. Waarom?

² Soos ons in die vorige artikel gesien het, was Jehovah ‘die Een wat ontkoming verskaf’ het in Bybeltye (Ps. 70:5). Hy is onveranderlik en bly by sy woord; daarom het sy hedendaagse aanbidders alle rede om op hom te vertrou om hulle te “help en aan hulle ontkoming [te] verskaf” (Ps. 37:40). Hoe het Jehovah in hedendaagse tye aan sy knegte ontkoming verskaf? Hoe sal hy dit moontlik vir ons persoonlik doen?

Verlos van teenstanders

3. Waarom kan ons seker wees dat teenstanders Jehovah se volk nie sal verhinder om die goeie nuus te verkondig nie?

³ Geen sataniese teenstand sal Jehovah se Getuies ooit verhinder om Jehovah die uitsluitlike aanbidding te gee wat hy verdien nie. God se Woord verseker ons: “Geen wapen wat teen jou gesmee sal word, sal enige sukses hê nie, en elke tong wat in die gereg teen jou sal opstaan, sal jy veroordeel” (Jes. 54:17). Teenstanders het al probeer, maar het nie daarin geslaag om God se volk te verhinder om hulle predikingsopdrag uit te voer nie. Beskou twee voorbeelde.

4, 5. Met watter teenstand het Jehovah se volk in 1918 te kampe gehad, en met watter gevolg?

⁴ In 1918 het Jehovah se volk ’n vlaag van vervolging ervaar wat deur geestelikes aangestig is en daarop gemik was om hulle predikingswerk stop te sit. Op 7 Mei is federale lasbriewe uitgereik vir die inhegtenisname van J. F. Rutherford, wat destyds toesig gehou het oor die wêreldwye predikingswerk, en ’n paar ander by die hoofkwartier. Binne twee maande is broer Rutherford en sy metgeselle ten onregte skuldig bevind aan sameswering en lang tronkvonnisse opgelê. Het teenstanders daarin geslaag om die howe te gebruik om die predikingswerk permanent aan bande te lê? Natuurlik nie!

⁵ Onthou Jehovah se belofte: “Geen wapen wat teen jou gesmee sal word, sal enige sukses hê nie.” In ’n dramatiese ommeswaai is broer Rutherford en sy metgeselle op 26 Maart 1919—nege maande nadat hulle gevonnis is—op borgtog uit die tronk vrygelaat. Die volgende jaar, op 5 Mei 1920, is die aanklagte teen hulle teruggetrek. Die broers het hulle vryheid gebruik om voort te gaan met die Koninkrykswerk. Met watter gevolg? ’n Ontsaglike vermeerdering het sedertdien plaasgevind! Alle eer hiervoor gaan aan ‘die Een wat ontkoming verskaf’.—1 Kor. 3:7.

6, 7. (a) Watter veldtog is teen Jehovah se Getuies in Nazi-Duitsland gevoer, en hoe het dit afgeloop? (b) Van watter feit getuig die hedendaagse geskiedenis van Jehovah se volk?

⁶ Beskou nou ’n tweede voorbeeld. In 1934 het Hitler gesweer dat hy Jehovah se Getuies in Duitsland sou uitwis. Dit was geen ydele dreigement nie. Hulle is toe oral in hegtenis geneem en opgesluit. Duisende Getuies is vervolg; honderde is in konsentrasiekampe doodgemaak. Het Hitler se veldtog om die Getuies uit te wis, geslaag? Het hy die verkondiging van die goeie nuus in Duitsland heeltemal stopgesit? Glad nie! Gedurende die vervolging het ons broers die predikingswerk ondergronds voortgesit. Ná die ineenstorting van die Nazi-regime het hulle hulle vryheid gebruik om aan te hou preek. Vandag is daar meer as 165 000 Koninkryksverkondigers in Duitsland. ‘Die Een wat ontkoming verskaf’, het weer eens sy belofte nagekom: “Geen wapen wat teen jou gesmee sal word, sal enige sukses hê nie.”

⁷ Die hedendaagse geskiedenis van Jehovah se Getuies lewer bewys dat Jehovah nooit sal toelaat dat sy volk as ’n groep uitgewis word nie (Ps. 116:15). Maar wat van ons as individue? Hoe verskaf Jehovah ontkoming aan ons persoonlik?

Wat van fisiese beskerming?

8, 9. (a) Hoe weet ons dat ons onmiddellike fisiese beskerming nie verseker is nie? (b) Watter feit moet ons erken?

⁸ Ons weet dat ons onmiddellike fisiese beskerming as individue nie verseker is nie. Ons neem dieselfde standpunt in as die drie getroue Hebreërs wat geweier het om hulle voor koning Nebukadnesar se goue beeld neer te buig. Daardie godvresende jong manne het nie net aangeneem dat Jehovah hulle wonderdadig teen fisiese leed sou beskerm nie. (Lees Daniël 3:17, 18.) Jehovah hét hulle egter uit die vlamme van die vuuroond verlos (Dan. 3:21-27). Maar selfs in Bybeltye was wonderdadige verlossing eerder die uitsondering as die reël. Talle getroue knegte van Jehovah is deur teenstanders doodgemaak.—Heb. 11:35-37.

⁹ Wat van vandag? As ‘die Een wat ontkoming verskaf’, kan Jehovah beslis persone uit gevaarlike situasies verlos. Kan ons met sekerheid sê of Jehovah in spesifieke gevalle ingegryp het of nie? Nee. Iemand wat wel aan ’n gevaarlike situasie ontkom het, kan nietemin voel dat Jehovah ingegryp het. Dit sal vermetel van ander wees om sy gevoel hieroor te betwis. Terselfdertyd moet ons realisties wees en erken dat talle getroue Christene as gevolg van vervolging gesterf het, soos gebeur het gedurende die Nazi-era. Ander het onder tragiese omstandighede gesterf (Pred. 9:11). Ons kan vra: ‘Het Jehovah versuim om “ontkoming [te] verskaf” aan getroues wie se lewe kortgeknip is?’ Dit kan nouliks die geval wees.

10, 11. Waarom staan die mens magteloos teenoor die dood, maar wat kan Jehovah daaromtrent doen?

¹⁰ Dink hieraan: Die mens staan magteloos teenoor die dood, want geen mens kan “aan sy siel ontkoming verskaf uit die hand van Sjeool”, of Hades, die mensdom se gemeenskaplike graf nie (Ps. 89:48). Maar wat van Jehovah? ’n Suster wat die Nazi-skrikbewind oorleef het, vertel wat haar Getuiemoeder eenkeer vir haar gesê het om haar te vertroos ná die dood van geliefdes in die konsentrasiekampe: “As die dood die mensdom altyd in sy greep sou hou, sou dit sterker wees as God, nie waar nie?” Die dood sal beslis nie staande bly teen die almagtige Bron van die lewe nie! (Ps. 36:9). Almal in Sjeool, of Hades, is in Jehovah se geheue, en hy sal aan elkeen van hulle ontkoming verskaf.—Luk. 20:37, 38; Op. 20:11-14.

¹¹ Intussen is Jehovah regstreeks betrokke by die lewens van sy getroue aanbidders van vandag. Kom ons ondersoek nou drie maniere waarop hy ongetwyfeld ‘die Een is wat aan ons ontkoming verskaf’.

Geestelike beskerming

12, 13. Waarom is geestelike beskerming van die allergrootste belang, en hoe voorsien Jehovah dit aan ons?

¹² Jehovah bied ons geestelike beskerming, wat van die allergrootste belang is. As ware Christene besef ons dat daar iets is wat baie waardevoller is as ons huidige lewe. Ons kosbaarste besitting is ons persoonlike verhouding met Jehovah (Ps. 25:14; 63:3). Sonder hierdie verhouding sal ons huidige lewe nie veel betekenis hê nie en sal ons geen vooruitsig op ’n toekomstige lewe hê nie.

¹³ Gelukkig gee Jehovah ons almal die nodige hulp om ’n hegte verhouding met hom te behou. Ons het sy Woord, sy heilige gees en sy wêreldwye gemeente om ons te help. Hoe kan ons hierdie voorsienings ten volle benut? As ons sy Woord gereeld en ywerig bestudeer, sal dit ons geloof versterk en ons hoop helder hou (Rom. 15:4). As ons opreg bid vir sy gees, sal ons hulp ontvang om die versoeking te weerstaan om ons aan twyfelagtige gedrag skuldig te maak (Luk. 11:13). As ons op hoogte bly van die riglyne wat die slaafklas deur middel van Bybelpublikasies sowel as by vergaderinge en byeenkomste voorsien, sal ons gevoed word met geestelike “voedsel op die regte tyd” (Matt. 24:45). Hierdie voorsienings beskerm ons geestelik en help ons om na aan God te bly.—Jak. 4:8.

14. Vertel ’n ondervinding wat geestelike beskerming beklemtoon.

¹⁴ Ter beklemtoning van hierdie geestelike beskerming kan ons dink aan die ouers wat aan die begin van die vorige artikel genoem is. ’n Paar dae nadat hulle dogter Theresa as vermis aangegee is, het hulle verpletterende nuus ontvang: Sy is vermoor.a Die vader vertel: “Ek het tot Jehovah gebid om haar te beskerm. Ek moet erken dat ek aanvanklik, toe sy dood aangetref is, gewonder het waarom my gebede nie verhoor is nie. Ek weet natuurlik dat Jehovah nie waarborg dat hy sy volk as individue wonderdadig sal beskerm nie. Ek het voortdurend vir insig gebid. Ek is vertroos deur die wete dat Jehovah sy volk geestelik beskerm—dit wil sê, hy voorsien wat nodig is sodat ons ’n goeie verhouding met hom kan behou. Hierdie soort beskerming is die belangrikste omdat dit ’n uitwerking op ons ewige toekoms kan hê. In hierdie sin het Jehovah Theresa beskerm; sy het hom getrou gedien toe sy gesterf het. Ek het my berus in die feit dat haar vooruitsig op ’n toekomstige lewe in sy liefdevolle hande is.”

Onderskraag tydens siekte

15. Hoe kan Jehovah ons help wanneer ons deur siekte geteister word?

¹⁵ Jehovah kan ons “op ’n siekbed” onderskraag, soos hy in Dawid se geval gedoen het (Ps. 41:3). Hoewel Jehovah nie in ons tyd ontkoming verskaf deur middel van wonderdadige genesing nie, help hy ons wel. Hoe? Die beginsels in sy Woord kan ons help om wyse besluite oor behandeling en ander sake te neem (Spr. 2:6). Ons kan nuttige inligting en praktiese wenke in artikels in Die Wagtoring en Ontwaak! vind wat ons spesifieke gesondheidsprobleem bespreek. Jehovah kan ons deur middel van sy gees “die krag wat bo die normale is”, gee om ons situasie die hoof te bied en om ons onkreukbaarheid te handhaaf, ongeag wat gebeur (2 Kor. 4:7). Met hierdie hulp hoef ons nie so oorweldig te word deur ons siekte dat ons ons geestelike fokus verloor nie.

16. Hoe slaag een broer daarin om sy siekte te verduur?

¹⁶ Dink aan die jong broer na wie daar aan die begin van die vorige artikel verwys is. In 1998 is hy gediagnoseer met amiotrofiese laterale sklerose, of ALS, wat hom uiteindelik heeltemal verlam het.b Hoe slaag hy daarin om sy siekte te verduur? Hy verduidelik: “Daar was al tye dat ek weens pyn en frustrasie gevoel het dat die dood my enigste uitweg is. Wanneer ek oorweldig voel, bid ek tot Jehovah om my drie dinge te gee: ’n kalm hart, geduld en volharding. Ek voel dat Jehovah hierdie gebede verhoor het. ’n Kalm hart laat my nadink oor vertroostende gedagtes, soos hoe dit in die nuwe wêreld sal wees wanneer ek weer sal kan loop, ’n lekker ete sal kan geniet en met my gesin sal kan praat. Geduld help my om al die ongerief en probleme wat met verlamming gepaardgaan, te verduur. Volharding help my om getrou te bly en nie my geestelike balans te verloor nie. Ek kan my werklik met die psalmis Dawid vereenselwig, want ek voel dat Jehovah my op my siekbed onderskraag.”—Jes. 35:5, 6.

Voorsien van lewensmiddele

17. Wat belowe Jehovah om vir ons te doen, en wat beteken hierdie belofte?

¹⁷ Jehovah belowe om op materiële gebied vir ons te sorg. (Lees Matteus 6:33, 34 en Hebreërs 13:5, 6.) Dit beteken nie dat ons die verkryging van materiële noodsaaklikhede aan die toeval kan oorlaat of dat ons moet weier om te werk nie (2 Tess. 3:10). Wat hierdie belofte wel beteken, is: As ons in ons lewe eers God se Koninkryk soek en gewillig is om te werk om ’n bestaan te maak, kan ons op Jehovah staatmaak om ons te help om die lewensbenodigdhede te verkry (1 Tess. 4:11, 12; 1 Tim. 5:8). Hy kan op onverwagte maniere voorsien wat ons nodig het, moontlik deur middel van ’n medegelowige wat ons te hulp kom of vir ons werk aanbied.

18. Vertel ’n ondervinding wat toon dat daar in tye van nood in ons behoeftes voorsien kan word.

¹⁸ Dink aan die enkelmoeder wat aan die begin van die vorige artikel gemeld is. Toe sy en haar jong dogter na ’n nuwe gebied getrek het, het sy gesukkel om werk te kry. Sy verduidelik: “Ek het in die oggend velddiens gedoen en elke middag werk gaan soek. Ek onthou dat ek eendag winkel toe gegaan het om melk te koop. Ek het na die groente gestaan en kyk, maar ek het nie genoeg geld gehad om daarvan te koop nie. Ek was nog nooit in my lewe so terneergedruk nie. Toe ek daardie dag van die winkel af tuiskom, was daar ’n klomp sakke vol allerhande soorte groente op my agterstoep. Daar was genoeg kos om ons maande te hou. Ek het in trane uitgebars en Jehovah gedank.” Hierdie suster het weldra uitgevind dat die sakke daar gelos is deur ’n broer in die gemeente wat ’n groentetuin het. Sy het later aan hom geskryf: “Hoewel ek jou daardie dag innig bedank het, het ek Jehovah ook gedank omdat hy jou goedhartigheid gebruik het om my te herinner aan sy liefde.”—Spr. 19:17.

19. Watter vertroue sal Jehovah se knegte tydens die groot verdrukking hê, en wat moet ons vasbeslote wees om nou te doen?

¹⁹ Wat Jehovah in Bybeltye sowel as in ons dag gedoen het, gee ons ongetwyfeld rede om op hom as ons Helper te vertrou. Binnekort, wanneer die groot verdrukking oor Satan se wêreld kom, sal ons Jehovah se hulp nodiger hê as ooit tevore. Maar Jehovah se knegte sal met volle vertroue op hom kan staatmaak. Hulle sal hulle kop kan oplig en hulle kan verbly, in die wete dat hulle verlossing naby is (Luk. 21:28). Laat ons intussen vasbeslote wees om, ongeag watter beproewinge oor ons kom, ons vertroue in Jehovah te stel, met die volle versekering dat ons onveranderlike God inderdaad ‘die Een is wat aan ons ontkoming verskaf’.

[Voetnote]

Onthou jy?

• Hoe kan Jehovah ontkoming verskaf aan diegene wie se lewe kortgeknip is?

• Waarom is geestelike beskerming van die allergrootste belang?

• Wat beteken Jehovah se belofte om op materiële gebied vir ons te sorg?

[Prent op bladsy 8]

Broer Rutherford en sy metgeselle is in 1918 in hegtenis geneem maar later vrygelaat, en die aanklagte teen hulle is teruggetrek

[Prent op bladsy 10]

Jehovah kan ons “op ’n siekbed” onderskraag