Ons lesers vra

Is Jehovah se Getuies ’n Protestantse godsdiens?

Jehovah se Getuies beskou hulle nie as ’n Protestantse godsdiens nie. Waarom nie?

Protestantisme het in die 16de eeu in Europa ontstaan in ’n poging om die Rooms-Katolieke Kerk te hervorm. Die woord “Protestant” is by die Ryksdag van Speyer in 1529 vir die eerste keer op die volgelinge van Martin Luther toegepas. Sedertdien beskryf die term oor die algemeen almal wat die leerstellings en doelwitte van die Hervorming aanhang. Merriam-Webster’s Collegiate Dictionary, 11de Uitgawe, omskryf ’n Protestant dus as “’n lid van enige van etlike kerkgroepe wat die universele gesag van die Pous verwerp en die Hervorming se beginsels van regverdiging deur geloof alleen, die priesterdom van alle gelowiges en die oppergesag van die Bybel as die enigste bron van geopenbaarde waarheid bevestig”.

Hoewel Jehovah se Getuies die universele gesag van die pous verwerp en die oppergesag van die Bybel heelhartig ondersteun, verskil hulle in talle belangrike opsigte van Protestantse godsdienste. Trouens, The Encyclopedia of Religion verwys na Jehovah se Getuies as “eiesoortig”. Beskou drie opsigte waarin hulle anders is.

Eerstens, hoewel Protestantse gelowe sekere aspekte van Katolieke aanbidding verwerp, het die leiers van die Hervorming sekere Katolieke leerstellings behou, soos geloof in die Drie-eenheid, die helse vuur en die onsterflikheid van die mensesiel. Jehovah se Getuies glo egter dat hierdie leerstellings nie net die Bybel weerspreek nie, maar ook ’n verdraaide beskouing van God bevorder.—Sien bladsye 4-7 van hierdie tydskrif.

Tweedens, die godsdiens wat Jehovah se Getuies voorstaan, is nie een van negatiewe protes nie, maar een van positiewe onderrigting. Hulle neem die Bybel se raad ter harte: “’n Dienaar van die Here moenie rusie maak nie. Inteendeel, hy moet vriendelik wees teenoor almal, bekwaam om ander te leer en iemand wat onreg kan dra. Met vriendelikheid moet hy teenstanders teregwys” (2 Timoteus 2:24, 25, Nuwe Afrikaanse Bybelvertaling). Jehovah se Getuies wys wel teenstrydighede uit tussen wat die Bybel sê en wat baie godsdiensgroepe leer. Maar hulle doen dit nie met die doel om ander godsdiensorganisasies te hervorm nie. Hulle doelwit is eerder om opregte individue te help om juiste kennis van God en sy Woord, die Bybel, te verkry (Kolossense 1:9, 10). Wanneer mense wat ander oortuigings het, aanhou om met hulle te verskil, vermy Jehovah se Getuies vrugtelose debatte.—2 Timoteus 2:23.

Derdens, in teenstelling met die Protestantse beweging, wat in honderde groepe versplinter het, behou Jehovah se Getuies ’n verenigde, wêreldwye broederskap. Wat Bybelleringe betref, volg Jehovah se Getuies in meer as 230 lande die apostel Paulus se raad om ‘eenstemmig te praat’. Daar is geen verdeeldheid onder hulle nie. Hulle is eerder in die ware sin van die woord “verenig . . . in dieselfde denke en in dieselfde gedagtegang” (1 Korintiërs 1:10). Hulle streef daarna om onder mekaar “die eenheid van die gees in die verenigende band van vrede te bewaar”.—Efesiërs 4:3.