Waarom lyk die lewe sinloos?

HET jy enige rede om te glo dat die lewe ooit meer sal wees as ’n “kortstondige oomblik van leë bestaan waardeur” ons “soos ’n skaduwee” beweeg, soos koning Salomo dit gestel het? (Prediker 6:12, The New English Bible). God se geïnspireerde Woord, die Bybel—’n onfeilbaar betroubare bron van inligting—belowe dat die lewe in die toekoms werklik sinvol sal wees.—2 Timoteus 3:16, 17.

Die Bybel sê vir ons wat God se oorspronklike voorneme met die aarde was. Dit verduidelik ook waarom die wêreld vol ongeregtigheid, onderdrukking en lyding is. Waarom is dit belangrik dat ons hierdie dinge verstaan? Want die vernaamste rede waarom mense dink dat die lewe heeltemal sinloos is, is dat hulle onbewus is van God se voorneme met die planeet en die mensdom daarop of verkies om dit te ignoreer.

Wat is God se voorneme met die aarde?

Jehovah Goda het die aarde gemaak om ’n volmaakte paradystuiste vir die mensdom te wees—’n plek waar mans en vroue vir ewig ’n vol, bevredigende lewe in menslike volmaaktheid sou geniet. Hierdie grondwaarheid verskil van die algemeen aanvaarde maar onskriftuurlike idee dat God die aarde gemaak het as ’n toetsterrein vir mense om vas te stel of hulle verdien om ’n sinvoller lewe in ’n geestewêreld te lei.—Sien die venster “Moet ons die aarde verlaat om ’n sinvolle lewe te geniet?” op bladsy 6.

God het die man en vrou na Sy beeld geskep en hulle die vermoë gegee om Sy wonderlike eienskappe te weerspieël (Genesis 1:26, 27). Hy het hulle volmaak geskep. Hulle het alles gehad wat nodig was om vir ewig ’n produktiewe, sinvolle lewe te geniet. Dit sou insluit om die aarde te vul en te onderwerp en die hele planeet in ’n paradys te omskep, net soos die tuin van Eden.—Genesis 1:28-31; 2:8, 9.

Wat het skeefgeloop?

Dit is duidelik dat iets lelik skeefgeloop het. Die mensdom oor die algemeen is ’n treurige weerspieëling van God se beeld. Die aarde is beslis nie ’n paradys nie. Wat het gebeur? Ons oorspronklike ouers, Adam en Eva, het hulle wilsvryheid misbruik. Hulle wou “soos God” wees en vir hulleself besluit wat op sedelike gebied “goed en kwaad” is. Deur dit te doen, het hulle die opstandige weg gevolg wat Satan die Duiwel reeds ingeslaan het.—Genesis 3:1-6.

Boosheid is dus nie deel van die een of ander geheimsinnige, voorafbepaalde plan van God nie. Dit het ontstaan toe Satan—en later Adam en Eva—teen God se heerskappy in opstand gekom het. As gevolg van hulle opstand het ons oorspronklike ouers die Paradys en volmaaktheid verloor en sonde en die dood nie net oor hulleself gebring nie, maar ook oor hulle nakomelinge—die hele mensdom (Genesis 3:17-19; Romeine 5:12). Dit is wat gelei het tot die toestande en omstandighede wat die lewe so sinloos laat lyk.

Waarom is boosheid nie onmiddellik uitgewis nie?

Party wonder: ‘Waarom het God boosheid nie onmiddellik uitgewis deur Satan en die ander rebelle eenvoudig te vernietig en weer oor te begin nie?’ Sou dit werklik verstandig gewees het? Hoe sou jy reageer as jy hoor van ’n magtige regering wat enigiemand wat sy gesag bevraagteken, onmiddellik teregstel? Vervreem hierdie soort optrede nie redelike mense nie en ondermyn dit nie ’n regering se sedelike gesag nie?

God het besluit om nie onmiddellik teen die rebelle op te tree nie. In sy wysheid het hy tyd toegelaat sodat die geskille wat in Eden geopper is oor die manier waarop hy regeer, eens en vir altyd besleg sou word.

Die verwydering van alle boosheid

Dit is baie belangrik om te onthou dat God sal toelaat dat boosheid slegs vir ’n beperkte tyd sal bestaan. Hy doen dit in die wete dat hy die hartseer gevolge daarvan heeltemal ongedaan kan maak ná die beslegting van die uiters belangrike geskille wat geopper is met die opstand teen sy manier van regeer.

God het nie van sy voorneme met die aarde en die mensdom afgesien nie. Deur die profeet Jesaja verseker Jehovah ons dat Hy die Maker van die aarde is, die een “wat dit nie verniet geskep het nie, wat dit gevorm het om bewoon te word” (Jesaja 45:18). Binnekort sal hy die aarde begin herstel in die volmaakte toestand wat hy oorspronklik daarvoor in gedagte gehad het. Nadat daar onweerlegbaar bewys is dat sy manier van regeer reg is, sal hy geregverdig wees om sy onweerstaanbare krag te gebruik om sy wil te laat geskied en alle boosheid met wortel en tak uit te roei (Jesaja 55:10, 11). In die modelgebed het Jesus Christus God versoek om dit te doen. Jesus het ons geleer om te bid: “Laat u wil geskied, soos in die hemel, so ook op die aarde” (Matteus 6:9, 10). Wat sluit dit in?

God se wil vir die aarde

Dit sluit in dat ‘die sagmoediges die aarde sal besit’ (Psalm 37:9-11, 29; Spreuke 2:21, 22). Jesus Christus sal “die arme verlos wat om hulp roep, ook die geteisterde”. Hy sal hulle red “van onderdrukking en van geweld” (Psalm 72:12-14). Daar sal nie meer oorlog wees nie; en die dood, trane, pyn en lyding sal ook nie meer daar wees nie (Psalm 46:9; Openbaring 21:1-4). Menigtes wat gesterf het gedurende die tyd wat God boosheid geduld het, sal opgewek word tot lewe hier op die aarde, en hulle sal die geleentheid gegee word om by hierdie en ander seëninge baat te vind.—Johannes 5:28, 29.

Trouens, Jehovah sal die skade wat Satan se opstand veroorsaak het, ongedaan maak. Sy regstellende optrede sal so omvattend wees dat “die vorige benoudhede [al die dinge wat vandag droefheid en pyn veroorsaak] vergete sal wees” (Jesaja 65:16-19). Daardie toekoms is gewaarborg. God lieg nie. Al sy beloftes word bewaarheid. Die lewe sal nie meer “leeg en ’n gejaag na die wind” wees nie (Prediker 2:17, The New English Bible). Die lewe sal eerder sinvol wees.

Maar wat van vandag? Kan kennis van wat die Bybel leer en ’n begrip van God se voorneme met die aarde jou lewe nou reeds sinvoller maak? Die laaste artikel in hierdie reeks bespreek hierdie vraag.

[Voetnoot]

[Venster op bladsy 6]

Moet ons die aarde verlaat om ’n sinvolle lewe te geniet?

Eeue lank het mense wat geen kennis van God se voorneme met die aarde het nie, geleer dat ons die aarde moet verlaat voordat ons ’n waarlik sinvolle lewe kan geniet.

Party het gesê dat siele “’n hoër bestaan gevoer het voordat hulle individuele menseliggame binnegaan” (New Dictionary of Theology). Ander het gesê dat die siel “in die liggaam opgesluit [word] as straf vir die sondes wat dit in sy hemelse toestand gepleeg het”.—Cyclopedia of Biblical, Theological, and Ecclesiastical Literature.

Griekse filosowe, soos Sokrates en Plato, het die volgende geleer: Slegs wanneer die siel van die beperkings van ’n fisiese menseliggaam ontsnap, sal dit “verlos word van sy omswerwinge en dwaashede en vrese, sy ongetemde begeertes en al die ander euwels wat die mensdom teister” en sal dit “tot in alle ewigheid saam met die gode” woon.—Plato’s Phaedo, 81, A.

Later het sogenaamde Christenleiers die Griekse filosowe se “veronderstellings oor die inherente onsterflikheid van die siel” in hulle leringe opgeneem.—Christianity—A Global History.

Stel hierdie idees teenoor drie grondwaarhede in die Bybel:

1. God se voorneme is dat die aarde ’n permanente tuiste vir die mensdom moet wees, nie ’n tydelike toetsterrein om vas te stel wie verdien om saam met hom in die hemel te lewe nie. As Adam en Eva God se wette gehoorsaam het, sou hulle nog steeds hier op ’n paradysaarde gelewe het.—Genesis 1:27, 28; Psalm 115:16.

2. Volgens die meeste godsdienste het die mens ’n siel—’n onstoflike entiteit wat binne-in die mens woon—maar die Bybel leer iets eenvoudigers. Die mens is “’n lewende siel” wat uit die “stof van die aarde” gevorm is (Genesis 2:7). Die Bybel beskryf die siel nooit as onsterflik nie. Dit sê dat die siel doodgemaak of vernietig kan word, wat beteken dat dit heeltemal ophou bestaan (Psalm 146:4; Prediker 9:5, 10; Esegiël 18:4, 20). Die eerste siel, Adam, het gesterf en het teruggekeer na die stof waaruit hy geskep is. Hy het teruggekeer na ’n toestand van niebestaan.—Genesis 2:17; 3:19.

3. Die mens se toekomstige lewensvooruitsigte is nie afhanklik van ’n onsterflike siel wat na die een of ander geesteryk gaan nie, maar van God se belofte van ’n opstanding uit die dood tot lewe op ’n paradysaarde.—Daniël 12:13; Johannes 11:24-26; Handelinge 24:15.