Bied die Goeie Nuus Aan—Met behulp van gedrukte wenke
1 Dit verg baie tyd en inspanning om jou in ’n ambag te bekwaam. In party ambagte moet ’n persoon sy vaardighede deurgaans verfyn deur verdere studie of opleiding. Ons moet eweneens in die waarheid vooruitgang maak en met ons bediening tred hou as ons bekwame knegte van ons God Jehovah wil wees.
2 Toe Jesus die 70 uitgestuur het, het hy vir hulle geleer wat hulle moet sê en hoe hulle moet optree (Luk. 10: 1-11). Hy het beginsels aangaande die Christelike lewenswyse en sake rakende hulle bediening met hulle hersien. Die apostel Paulus het ook beklemtoon hoe noodsaaklik dit is om vaardighede in die bediening skerp te hou toe hy Timotheüs vermaan het: “Let op jouself en op die leer” (1 Tim. 4:16). Dit toon dat die regte opleiding nodig is ten einde sukses in die Christenbediening te behaal. Daarom voorsien “die getroue en verstandige dienskneg” talle hulpmiddele, waarvan een Ons Koninkryksbediening is.
NUTTIGE HERINNERINGE
3 Deur die jare heen het hierdie maandelikse voorsiening vir ons talle nuttige herinneringe gegee. Dit bevat aanbevole aanbiedings, die aanbod vir die maand, instruksies rakende ons huis-tot-huisbediening, en ander inligting oor hoe ons ons velddiens kan verbeter. Maar om ten volle by sulke leiding baat te vind, moet ons die dinge toepas wat ons leer. Deur dit te doen, benut ons die wysheid en ondervinding van broers wat baie ondervinding as aktiewe verkondigers van die goeie nuus het. Psalm 19:8 sê: “Die getuienis [“vermaning”, NW] van die Here is gewis: dit gee wysheid aan die eenvoudige.” Veral diegene wat onlangs begin het om die goeie nuus te verkondig, kan dus baat vind by die nuttige raad wat in elke nommer van Ons Koninkryksbediening verskyn. Diegene wat al baie jare velddiens doen, is ook verstandig as hulle ten volle gebruik maak van die uitstekende wenke en leiding wat gegee word. Hetsy ons dus nuut of ervare in die bediening is, dit bring ’n ryk beloning as ons die nuttige herinneringe met waardering toepas.—Ps. 119:2; vergelyk Spreuke 1:5.
4 Beskou die voorbeeld van ’n broer wat die raad in die nommer vir Julie 1983 onder die opskrif “Bied die goeie nuus aan—Deur tydskrifroetes op te bou” ter harte geneem het. Hoe het
hy daarby baat gevind? Hy besoek nou sowat 60 mense gereeld en voorsien hulle van die jongste tydskrifte. Hierdie broer en diegene wat hy nou gereeld besoek, is inderdaad geseën omdat hy die raad in Ons Koninkryksbediening toegepas het.
5 In die nommer vir Augustus 1981 het die artikel “Word julle gebied deeglik gedek?” ’n baie nuttige wenk bevat rakende huise waar niemand tuis is nie. Die voorstel is gedoen dat nie-tuise noukeurig neergeskryf en weer besoek word voordat julle die gebied verlaat. Een gemeente het hierdie wenk toegepas en gevind dat toe die verkondigers ’n uur of wat later teruggekeer het, hulle 50 persent van die mense tuisgevind het wat vroeër nie tuis was nie. Hulle het dus ook die vreugde gesmaak wat dit ons verskaf as ons goeie wenke toepas.
6 Terwyl ’n egpaar met vakansie was, het hulle die wenk in die nommer vir Desember 1984 onder “Bied die goeie nuus aan—Gedurende vakansietyd” toegepas. Hulle was op die uitkyk na geleenthede om ’n informele getuienis te lewer en kon sodoende lektuur versprei en talle aangename gesprekke geniet. Hulle het hulle vakansie gevolglik meer geniet. Toe hulle vriende en familielede besoek het, was hulle ondervindinge ’n grondslag vir opbouende gesprekke.
7 Jesus het sy apostels aangespoor: “As julle hierdie dinge weet, salig is julle as julle dit doen” (Joh. 13:17). Hy het geweet dat sy dissipels waarlik gelukkig in hulle bediening sou wees as hulle die dinge toepas wat hy hulle geleer het. Ja, ons sal genot uit die bediening put as ons die voorsienings van Jehovah se organisasie benut. Laat ons aanhou om die herinneringe en wenke in Ons Koninkryksbediening te gebruik sodat ons bekwame knegte van Jehovah kan wees.