Weeklikse deelname aan die bediening verskaf groter vreugde
1 “Vir ons is dit onmoontlik om nie te spreek oor wat ons gesien en gehoor het nie” (Hand. 4:20). Hierdie woorde van die apostels Petrus en Johannes het getoon dat die verkondiging van die goeie nuus ’n noodsaaklike deel van hulle lewe was. Die Bybelverslag sê aangaande al die apostels: “Hulle het nie opgehou om die mense elke dag in die tempel en in hulle huise te leer en die evangelie te verkondig dat Jesus die Christus is nie.”—Hand. 5:42, NAV.
2 Hierdie gereelde verkondiging van die goeie nuus was ook kenmerkend van die apostel Paulus, wat “elke Sabbat in die sinagoge gespreek en Jode sowel as Grieke oortuig” het (Hand. 18:4). Selfs as ’n bewaakte gevangene onder huisarres het hy gereeld die goeie nuus van die Koninkryk gepreek en dit aan ander geleer.—Hand. 28: 30, 31.
3 Die gereelde verkondiging van die goeie nuus het vir ons broers in die eerste eeu baie seëninge en vreugde meegebring. Sommige wat as ongeleerd en eenvoudig beskou is, het vrymoedig en bekwaam geword namate hulle Jesus in hulle spraak nagevolg het (Hand. 4:13). Wat ’n vreugde moes dit nie gewees het om te weet dat hulle onderrigting redding vir baie regskapenes gebring het nie!
BENUT WEEKLIKSE DIENSREËLINGS
4 ’n Rooster om gereeld elke week te getuig, kan jou help om sulke seëninge te geniet. Ons kalender gee die eerste Sondag van elke maand sowel as die tweede en vierde Saterdag aan as spesiale dae vir die veldbediening. Volg jy hierdie rooster? Deur dit te doen en nog een naweek by te voeg, kan jy ’n weeklikse deelname aan die veldbediening geniet. Baie het hulle sake so gereël dat hulle ten minste elke naweek ’n deelname aan velddiens kan hê. Gemeentes reël velddiensvergaderinge vir elke Saterdag en Sondag. Baie van hulle het ook middeweekse reëlings.
5 Indien jy nie gereeld op die eerste Sondag en die tweede en vierde Saterdag van die maand aan die bediening deelneem nie, kan jy dit gerus as ’n doelwit stel terwyl jy daarna streef om elke week aan die bediening deel te neem. Jou boekstudiehouer sal bly wees om jou die nodige hulp te verleen om ’n praktiese rooster op te stel wat by jou omstandighede pas. Onthou die goeie nuus ‘moet aan al die nasies verkondig word’ (Mark. 13:10). Oorweeg gerus hierdie wenke biddend sodat jy ook elke week aan hierdie belangrike werk kan deelneem.
SEËNINGE WAT JY KAN GENIET
6 Jy kan moontlik nie die goeie nuus verkondig in dieselfde mate as pioniers nie. Maar as jy gereeld elke week daaraan deelneem, sal jou bediening effektiewer wees en jou vreugde sal ooreenstemmend toeneem. Toe die 70 deur Jesus uitgestuur is, het hulle “met blydskap teruggekom” en hulle ondervindinge vertel (Luk. 10:17). Gereelde deelname aan die predikingswerk selfs onder moeilike omstandighede sal jou vreugde laat toeneem.
7 Almal word aangespoor om tyd af te staan om elke week die goeie nuus met ander te deel. As jy dit doen, sal jy ’n bekwamer onderrigter word en sal jou vreugde toeneem, en dit alles strek Jehovah tot eer.