Beplan vooruit vir hulppionierdiens
1 Voordat ons ons daarop toelê om ’n doelwit te bereik, moet ons beplan. Dalk wil ons gedurende ons vakansie ’n streekbyeenkoms bywoon. Dit kan behels dat ons vooruit beplan om te spaar, verblyf te reël, ons motor te laat versien vir die reis, ensovoorts. Al hierdie reëlings is nodig as ons ons doel wil bereik.—Spr. 21:5.
2 Beplanning is eweneens nodig as ons ’n aandeel in die hulppionierdiens wil hê. Tienduisende van ons broers en susters wêreldwyd neem gereeld aan hierdie vertakking van diens deel en vind persoonlik baie daarby baat. Die volgende wenke kan jou help om reëlings te tref om, miskien reeds volgende maand, aan die hulppionierdiens deel te neem.
3 Kies ’n maand wanneer jy kan reël om die meeste tyd in die velddiens deur te bring sodat jy die doelwit van 60 uur kan bereik. Dit kan insluit dat jy van jou beskikbare vakansietyd gebruik. Jongmense op skool kan vakansies vir hulppionierdiens gebruik.
4 Maande met vyf volle naweke bied gewoonlik meer beskikbare tyd vir die veldbediening. Praat met ander wat dalk of as pioniers of as verkondigers saam met jou kan werk.—Spr. 20:18.
5 Stel ’n praktiese rooster op sodat jy jou tyd ten beste kan benut. Tref reëlings om ’n groot deel van jou tyd in die huis-tot-huiswerk deur te bring. Sit ook tyd opsy vir straat-en winkel-tot-winkelwerk asook vir herbesoeke en Bybelstudies. Hou aandgetuieniswerk in gedagte waar dit moontlik is, en ondersteun die gemeentelike velddiensreëlings gedurende die week en oor naweke. Dit kan wedersyds bemoedigend wees as jy dit ondersteun en saam met ander broers en susters werk. Hou aan om Jehovah in gebed oor die saak te nader (Kol. 4:2). Vra vir sy leiding terwyl jy beplan om aan die hulppionierdiens deel te neem.
6 Baie het die voltydse diens eers as hulppioniers gesmaak, en dit het hulle aangespoor om gewone pioniers te word. Ons kom elke dag nader aan die vervulling van Jehovah se wonderlike beloftes aangaande die einde van hierdie goddelose stelsel van dinge en die inkomende Koninkryk van regverdigheid deur Christus Jesus. Watter seën kan dit tog wees vir die wat die een of ander vertakking van die voltydse diens kan geniet! Beplan vooruit daarvoor, en mag Jehovah jou pogings seën.