Korrespondensie met gevangenes

¹ Die Koninkryksboodskap word aan mense in alle kringe verkondig. Positiewe verslae word steeds ontvang oor mense in strafinrigtings wat gunstig gereageer het. Bybelstudies en vergaderinge word in ’n paar inrigtings gehou. Dit het daartoe gelei dat nuwe dissipels hulle lewe aan Jehovah toegewy het en hulle laat doop het.

² In ’n paar gevalle word daar deur middel van briefwisseling vir gevangenes getuig. In hierdie verband meen ons dat dit nodig is om weer eens ’n woordjie van waarskuwing te rig. Daar is gevind dat sommige gevangenes wat gretig is om met ander te korrespondeer twyfelagtige beweegredes het. Hoewel dit gepas sal wees om, waar nodig, aan gevangenes te skryf en hulle van skriftuurlike informasie en bemoediging of Bybellektuur te voorsien, moet geld of persoonlike geskenke nie gestuur word nie, ondanks die feit dat dit dalk deur die korrespondent aangevra word.

³ Ons raai dit sterk aan dat slegs bekwame broers met manlike gevangenes korrespondeer. Bekwame susters moet aan vroulike gevangenes skryf. Individuele lede van die gemeente moet nie tronke na willekeur besoek en noue omgang met gevangenes hê nie.

⁴ Wanneer gevangenes belangstelling toon, is dit die beste om die name en adresse van sulke persone aan die gemeente te gee in die gebied waar die spesifieke inrigting is. Die bekwame broers aldaar sal aansoek doen om hierdie gevangenes te besoek en sal, indien moontlik, reëlings tref om met diegene wat opreg in die waarheid belangstel te studeer.

⁵ Indien vrae opduik oor briewe aan gevangenes of besoeke aan strafinrigtings, moet dit asseblief eers met die presiderende opsiener bespreek word. Hy kan aan die Genootskap skryf as verdere riglyne verlang word.