Bied die goeie nuus aan—Met die Openbaring-boek
1 Die seuns van Korag het oor Jehovah geskryf: “Dat hierdie God onse God is, vir ewig en altyd; Hý sal ons lei tot die dood toe” (Ps. 48:15). Daardie getroue manne het met vertroue op Jehovah staatgemaak, en hulle hele lewe ooreenkomstig goddelike instruksies gelewe. Wat ’n puik voorbeeld het hulle tog vir ons gestel! Diegene wat vandag deur Jehovah gelei word, ondervind verkwikking en verligting (Jes. 58:11). Hulle vermy die lot van diegene wat die “blinde leiers” van hierdie goddelose stelsel volg en wat hulle volgelinge na ’n “sloot” van ellende en verwarring lei.—Matt. 15:14.
2 Goddelike leiding is veral vandag belangrik, aangesien die wêreld om ons heen al hoe meer verward en gevaarlik word. Baie mense is verward en sien uit na bevredigende antwoorde. Hoe gepas is dit dan tog dat ons hulle aanspoor om die Openbaring-boek te lees! Hierdie publikasie gee goddelike leiding deur die wêreldskokkende gebeurtenisse van ons dag te verduidelik in die lig van die profesieë in Openbaring. Sulke informasie laat hulle verlig voel en gee gegronde leiding oor hoe mense vandag ’n lewe kan lei wat vir God welgevallig is.
VESTIG DIE AANDAG OP DIE OPENBARING-BOEK
3 ’n Opvallende kenmerk van die Openbaring-boek is sy prente, wat goeie leermiddels is. Gebruik hierdie prente goed wanneer jy die boek in die velddiens aanbied. Op bladsy 302 is daar byvoorbeeld ’n pragtige prent van Koninkrykseëninge. Dit is ’n kunstenaar se voorstelling van die woorde in 2 Petrus 3:13 en Openbaring 21:4, die twee tekste in ons Onderwerp vir gesprekke.
4 Nadat ons ons voorgestel het, kan ons die gesprek só begin: “Ons besoek mense om die betekenis te bespreek van die gebeure wat vandag in die wêreld rondom ons plaasvind. Party wêreldleiers meen dat ons op die punt is om ’n nuwe era van vrede in te gaan. Dink jy dat dit die geval is? [Laat huisbewoner antwoord.] Al lyk dit asof regerings party politieke geskille oplos, lyk dit of die mens se gesindheid teenoor mekaar en die omvang van geweld alte dikwels die mens se pogings teëwerk om vrede te maak. Maar in 2 Petrus 3:13 verseker die Bybel ons van ’n nuwe aardse gemeenskap wat onder ’n hemelse regering werk. [Lees teks en maak boek oop op bladsy 302.] Dit is ’n kunstenaarsvoorstelling van die dinge waaroor hierdie teks praat. Waarvan hou jy in hierdie prent? [Laat huisbewoner antwoord.] Oor die toestande wat op die aarde sal heers, sê die Bybel ook in Openbaring 21:4 [lees teks op bladsy 303, paragraaf 6]. Nie eens die dood sal die vrede skend wat God teweeg sal bring nie.” Jy kan ’n verskeidenheid inleidings wat in julle gebied gepas sal wees op bladsye 9-15 van die Redenering-boek vind.
5 Hoewel ons die aandag op die Koninkrykseëninge wil vestig wanneer ons die goeie nuus aanbied, moet ons belangstellendes ook help om te besef hoe belangrik Jesus Christus se boodskap is wat hy in die boek Openbaring uitgespreek het. Daarom wil ons ons boodskap afsluit met ’n dringende versoek en aanbied om opregtes te help sodat hulle kan besef dat hierdie stelsel en diegene wat dit ondersteun binnekort geoordeel sal word.
6 Die profesieë van Openbaring is ’n groot bron van verkwikking en vreugde. Jehovah rig ’n uitnodiging aan alle opregtes van hart om sy leiding te volg en hulleself tot voordeel te strek. Laat ons die Openbaring-boek ywerig aanbied sodat almal deur Jehovah se wyse leiding gerig kan word.